1Angngallemi Musa se’re tubaine Kus nampa nabaineang; iaminjo napa’jari alasang Miryam siagang Harun untu’ ancallai Musa.
2Nakana ke’nanga, "Apaka tete ri Musa ji bawang akkulle a’bicara Batara? Sai akkulle tonji a’bicara tete ri katte?" Nalangngereki Batara anjo apa nakananga ke’nanga.
3Anjo Musa tau sanna’ tuna pa’mai’na, tena sangkammanna ri sikontu tau attallasaka ri anne linoa.
4Ti’ring Nakanamo Batara mae ri Musa, Harun siagang Miryam, "Ikau sipattallu a’lampako mange ri KemaKu." Nampa a’lampamo ke’nanga mange anjoreng
5siagang naummi Batara lalang ri benteng rammanga. Ammentengi Batara ri pakke’bu’ KemaNa siagang Nakio’mi Harun siagang Miryam. Majumi mange ri dallekang anjo tau ruaya,
6na Nakanamo Batara, "Pilangngeri anne kana-kanangKu! Punna nia’ battu ri kalase’rennu a’jari na’bi, Kupa’nyatai KalengKu mae ri ia lalang ri paccini’na siagang a’bicarA’ siagang ia lalang so’na.
7Mingka tena nakamma anjo mae ri atangKu Musa. Iami tau majarre’ pa’maika ri alla’na ummakKu.
8Siagang iNakke a’bicarA’ sidallekang siagang ia, a’nyatai siagang tena nasangkamma boto-botoang. Ba’lalo manna rupangKu le’ba’mi nacini’! Angngapa nubarani angngewai Musa, anjo atangKu?"
9Teaimi sipato’ larroNa Batara mae ri ke’nanga sipa’rua, nampa a’lampa.
10Ri wattunna a’lampa anjo rammanga ambokoi KemaNa Batara, a’jari garring salami Miryam nicini’; kebo’mi bukkulenna sangkamma kapasa’. Ri wattunna assaile Harun mae ri Miryam, na nacini’ angkanaya nitabami ri garring kammaya anjo,
11angkanami mae ri Musa, "Tulungi ikambe Tuang, teaki’ lappassangi ikambe nisessa lanri dosa nagaukanga ikambe lalang kadongokanna ikambe.
12Teaki’ lappassangi anjo Miryam a’jari sanrapang ana’ beru lassuka nampa mate memang, nampa a’jari botto’ batangkalenna."
13Jari ammarrammi Musa mae ri Batara, angkana, "O, Allata’ala, kupalaki, sollanna Kipammollei ammotere’ battu ri garrinna!"
14Appialimi Batara angkana, "Ebara’ angkana nipi’rui rupanna ri manggena, sai a’jari siriki sa’genna tuju alloa? Pakabellai battu ri pakkemaanga lalang tuju allo sallona; nampa punna le’ba’mo anjo akkullemi ammotere’ antama."
15Jari nipasulu’mi Miryam battu pakkemaanga lalang tuju allo, siagang ta’lettekai anjo bansaya battu anjoreng sa’genna nipa’biang ammotere’ Miryam ri pakkemaanga.
16Nampa nabokoi ke’nanga Hazerot siagang mange akkema ri parang lompo Paran.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel