1Nasuroi Batara anjo Musa
2ampassareangi anne paratorang-paratorang kammaya mae ri tu Israel. Sikamma tu bura’nea yareka tu baine attinjaka untu’ antangkasi tallasa’na untu’ Batara salaku tau attinja’,
3takkulleai angnginung je’ne’ anggoro’ siagang inungang terasa’. Manna inungang terasa’ antekammaya iamintu nipareka battu ri anggoro’ yareka rappo-rappoang maraengannaya, takkulleai nainung. Takkulleai angnganre rappo anggoro’ beru yareka kalotoroka, yareka manna pole apa-apa mamo battua ri poko’ anggoroka; lisere’na yareka pucu’na takkulleai nakanre.
4(6:3)
5Lalang attinja’na takkulleai napolong uu’na yareka takkulleai accukkuru’. Lalang anjo wattua, anjo uu’na siagang janggo’na musti naboliki a’jari la’bu. Tassikkoki mae ri tinja’na sa’genna le’ba’ anjo tinja’na ansa’laki kalenna untu’ Batara.
6Anjo uu’na a’jari pammatei angkanaya nasa’laki kalenna untu’ Allata’ala. Lalang anjo attinja’na takkulleai nara’massi kalenna; takkulleai a’reppese’ mae ri mayaka, manna pole namaya’na manggena, amma’na, yareka sari’battanna.
7(6:6)
8Lalang a’jarina tau attinja’, ia a’jari tunisa’laki untu’ Batara.
9Punna a’jari ra’masa’ uu’na tau le’baka nisa’la’ lanri nia’na a’reppese’ ri tau mate silalonnaya, musti attayangi tuju allo sallona; punna le’baki anjo musti nacukkuruki uu’na siagang janggo’na, nampami a’jari tangkasa’.
10Ri allo makasagantujua musti angngerangi ruang kayu jangang-jangang bodobangkeng yareka bukkuru’ mae ri imanga ri dallekang pakke’bu’ KemaNa Batara.
11Anjo jangang-jangang sikayua musti napassareangi imanga untu’ koro’bang pammopporang dosa, nampa sikayua pole untu’ koro’bang nitunu untu’ antangkasi kara’massanna. Ri ia memang anjo alloa musti natangkasi ammotere’ uu’na mae ri Batara
12siagang naberui kalenna salaku tau attinja’. Anjo wattu le’bakamo allalo tenamo nanirekengi pole lanri le’ba’mi a’jari ra’masa’. Salaku koro’bang passambe karugiang musti assarei sikayu ana’ gimbala’ umuru’ sitaunga.
13Punna le’ba’mo wattunna se’rea tau attinja’, musti nigaukangi anne upacara kammaya: Anjo taua musti niantaraki mange ri pakke’bu’ KemaNa Batara
14siagang angngerang mae ri Batara tallung kayu olo’-olo’ tenaya callanna: sikayu ana’ gimbala’ laki umuru’ sitaunga untu’ koro’bang nitunu, sikayu ana’ gimbala’ gana umuru’ sitaunga untu’ koro’bang pammopporang dosa, siagang sikayu gimbala’ laki untu’ koro’bang passiamakkang.
15Musti assare tongi sibaku’ roti tenaya nammake pa’gambang, iamintu roti a’bo’donga ia nipareka battu ri labu’ nipasileoka siagang minynya’ zaitun, kammayatompa kanrejawa nipisi’ nisapua minynya’ zaitun. Pantaranganna anjo sikammaya musti assare tongi koro’bang nipatala siagang koro’bang inung-inungang.
16Musti naerang ngasengi imanga sikammaya anjo mange ri dallekanNa Batara, nampa assare koro’bang pammopporang dosa siagang koro’bang nitunu.
17Siagang anjo rotia sibaku’, musti napassareang tongi anjo gimbala’ lakia mae ri Batara a’jari koro’bang passiamakkang. Kammayatompa anjo koro’bang nipatalaya siagang koro’bang inung-inunganga musti napassareang tongi mae ri Batara.
18Anjo tau attinjaka musti nacukkuruki uu’na ri pakke’bu’ KemaNa Batara, nampa napasambila anjo uu’na antama’ ri pepe’ tampa’ koro’bang passiamakkanga, ia sitabanga nitunu.
19Le’baki anjo, punna le’ba’mi nipallu bongga ri dallekanna anjo gimbala’ lakia, musti naallei imanga anjo nampa napadongko’ siagang sibatu roti a’bo’dong siagang sibatu kanrejawa nipisi’ battu ri anjo bakuka, antama’ ri limanna anjo tau attinjaka.
20Nampa imanga musti napappicinikangi anjo kanrea salaku passare nisa’la mae ri Batara; iaminjo bageang matangkasa’ a’jari bageanna imanga; pantaranganna anjo bageang barambanga siagang bongganna anjo gimbala’ lakia a’jari bageanna imanga, situru’ paratoranga. Punna le’ba’mi anjo kammaya, nampami akkulle anjo tau attinjaka angnginung je’ne’ anggoro’.
21Iaminjo paratoranga untu’ tau attinjaka; mingka punna nia’ tau attinja’ a’janji koro’bang alla’bi ri tinja’na, musti narupai siganna’na anjo apa napa’janjianga.
22Nasuroi Batara anjo Musa
23ampabattui mae ri Harun siagang sikamma ana’na angkanaya musti nakanangi ke’nanga anne kana-kana kammaya ri wattunna nabarakkaki ke’nanga bansa Israel:
24Dasi-dasi Nanabarakkakiko siagang Naparakaiko Batara.
25Dasi-dasi Namabaji’ pa’mai’ siagang malammoro’ pa’mai’ Batara mae ri kau.
26Dasi-dasi Nanakamaseangko siagang Nasareko passiamakkang Batara.
27Siagang Nakana Batara, "Punna nasa’bu’ ke’nanga arengKu salaku barakka’ mae ri bansa Israel, iNakke lambarakkaki ke’nanga."
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel