1Iaminne dattara’ areng-arenna sikamma kapala golongang nipelaka mange ri Babel siagang ammotereka siagang inakke, Ezra, mange ri Yerusalem, ri wattu Artahsasta ammarenta:
2Gersom, battu ri golongang Pinehas Daniel, battu ri golongang Itamar Hatus ana’na Sekhanya, battu ri golongang Daud Zakharia, battu ri golongang Paros, siagang 150 bura’ne battu ri golonganna (nia’ catatang pattottoranna ke’nanga) Elyoënai ana’na Zerahya, battu ri golongang Pahat-Moab, siagang 200 bura’ne Sekhanya ana’na Yahaziel, battu ri golongang Zatu, siagang 300 bura’ne Ebed ana’na Yonatan, battu ri golongang Adin, siagang 50 bura’ne Yesaya ana’na Atalya, battu ri golongang Elam, siagang 70 bura’ne Zebaja ana’na Mikhael, battu ri golongang Sefaca, siagang 80 bura’ne Obaja ana’na Yehiel, battu ri golongang Yoab, siagang 218 bura’ne Selomit ana’na Yosifya, battu ri golongang Bani, siagang 160 bura’ne Zakharia ana’na Bebai, battu golongang Bebai, siagang 28 bura’ne Yohanan ana’na Hakatan, battu ri golongang Azgad siagang 110 bura’ne Elifelet, Yehiel siagang Semaya, battu ri golongang Adonikam, siagang 60 bura’ne (ri bokoi ke’nanga battu) Utai siagang Zabud, battu ri golongang Bigwai, siagang 70 bura’ne.
3(8:2)
4(8:2)
5(8:2)
6(8:2)
7(8:2)
8(8:2)
9(8:2)
10(8:2)
11(8:2)
12(8:2)
13(8:2)
14(8:2)
15Sikontu anjo kalompoka kupa’rappungangi ri biring binangaya, assolong mangea ri kota Ahawa. Nampa akkema ikambe anjoreng tallungallo sallona. Le’baki kuparessa, kuassemmi angkana nia’ siapa are imang ri alla’na ke’nanga, mingka manna sitau tania’ battu ri suku Lewi.
16Nampa kukio’ salapang tau battu ri sikamma pamimpinga, iamintu: Eliezer, Ariel, Semaya, Elnatan, Yarib, Elnatan, Natan, Zakharia, Mesulam, siagang pole rua guru iamintu Yoyarib siagang Elnatan.
17Nampa kusuro ke’nanga mange ri Ido, kapalana tau jaia ri Kasifya. Kupalaki sollanna Ido, sikamma agang-aganna anjamaya ri Balla’Na Batara ri Yerusalem, akkiringi tau mae ri kambe untu’ allayani ri Balla’Na Batara ri Yerusalem.
18Lanri kabajikang pa’mai’Na Allata’ala, nakirimmi ke’nanga mae ri kambe iamintu Serebya, se’re tu Lewi sannaka cara’de’na battu ri golongang Mahli. Nia’ tommi naagang battu ana’-ana’na siagang siapa are sari’battanna. Yangasenna ke’nanga nia’ 18 tau jaina.
19Nakiring tommi mae ri kambe tu niarenga Hasabya siagang Yesaya, battu ri golongang Merari, siagang ruampulo bija-bijanna ke’nanga.
20Pantaranganna nia’ todong 220 tau iamintu pajama-jamaya ri Balla’Na Batara, ia niaka arenna lalang ri dattaraka. Battu riolo iji nanapattantumo Karaeng Daud siagang sikamma tumalompoa ri kakaraenganga untu’ ambantui tu Lewi.
21Nampa kupa’la’bammo kupau anjoreng ri biring Binanga Ahawa angkana sikontu taua musti appuasai siagang napakatunai kalenna ri dallekanNa Allata’ala. Appala’ doammi ikambe sollanna nipimping ikambe ri Allata’ala lalang ri anjo pa’jappanga, siagang Najagai ikambe, ana’-ana’na ikambe, siagang sikontu barang-baranna ikambe.
22Angngalika’ appala’ tantara a’jarang mae ri karaenga untu’ anjagai ikambe battu ri musua lalang pa’jappanga. Nasaba’ le’ba’mi kupau ri ia angkana Nabarakkaki Allata’alana ikambe sikamma tau anynyombaya ri Ia siagang Nakabirisi na Nahukkung sikamma tau tenaya najarre’ tappa’na mae ri Ia.
23Jari appuasami ikambe siagang appala’ doammi ikambe mae ri Allata’ala appala’ pannulung sollanna Najagai ikambe; na Napilangngerimo pappala’ doanna ikambe.
24Battu ri sikamma imanga kupilei 12 tau iamintu: Serebya, Hasabya siagang 10 tau maraengannaya.
25Nampa kutimbang untu’ ke’nanga pera’, bulaeng, siagang pakkakasa’-pakkakasa’ le’baka nasumbangkang karaenga, sikamma tumailalanga, kammayatompa sikontu tu Israel, untu’ nipake lalang ri Balla’Na Batara ri Yerusalem. Yangasenna anjo kupassareangi mae ri sikamma anjo imanga.
26Iaminne dattara’na sikamma anjo sumbanganga: pera’ ~~– 22 tong battala’na; 100 pakkakasa’ pera’ ~~– 70 kilo battala’na; bulaeng ~~– 3.400 kilo battala’na; 20 mangko’ bulaeng ~~– 8,4 kilo battala’na; 2 mangko’ tambaga sannaka ga’gana, sangkammai anggaranna mangko’ bulaeng.;
27(8:26)
28Nampa kukanamo ri sikamma anjo imanga, "Nisa’la’ ngasengko untu’ Batara, Allata’ala nisombaya ri boe-boeta. Kammayatompa sikontu anjo pakkakasa’ bulaeng siagang pera’ nisumbangkanga untu’ Batara, nisa’laki untu’ Batara.
29Katutui bajiki anjo barang-baranga sa’genna battu mange ri Balla’Na Batara. Punna battu mako mange anjoreng, musti nutimbangi anjo barang-baranga, nampa nupassareang mae ri sikamma imang kapalaya siagang pamimping-pamimpinna tu Lewia, kammayatompa pamimping-pamimping tu Israel ri Yerusalem."
30Nampa natarimamo sikamma imanga siagang tu Lewia anjo peraka, bulaenga, siagang anjo sikamma pakkakasaka untu’ naerang ke’nanga mange ri Yerusalem.
31Ri tanggala’ sampulo anrua bulang makase’re, a’lampami ikambe ambokoi Binanga Ahawa mange ri Yerusalem. Lalang ri pa’jappanna ikambe, nijagaimi ikambe ri Allata’alana ikambe battu ri bundu’na siagang pangngadanna musua.
32Ri wattunna battu ikambe mange ri Yerusalem, ammari-marimi ikambe tallungallo sallona.
33Nampa ri maka patangallona a’lampami ikambe mange ri Balla’Na Batara. Natimbammi ikambe anjo peraka, bulaenga, siagang sikamma anjo pakkakasaka. Le’baki anjo napassareammi ikambe yangasenna anjo mae ri Imang Meremot ana’na Uria, nisa’bi ri Eleazar ana’na Pinehas siagang rua tu Lewi iamintu Yozabad ana’na Yesua siagang Noaja ana’na Binui.
34Sikontu anjo baranga nirekengi siagang nitimbangi, nampa nicata’ ngaseng.
35Ri anjo todong alloa, sikontu anjo tau ammoterekamo battu ri pa’rasangang pammelakkanga, assaremi koro’bang nitunu untu’ Allata’alana Israel. Assaremi ke’nanga 12 kayunna sapi laki untu’ sikontu tu Israel, 96 kayunna gimbala’ laki, siagang 77 kayunna ana’ gimbala’; pantaranganna anjo nia’ todong 12 kayunna bembe untu’ koro’bang ri nipammopporanna dosana ke’nanga. Sikontu anjo olo’-oloka nitunui untu’ koro’bang mae ri Batara.
36Nampa anjo dokumeng napassareanga karaenga mae ri ke’nanga, napassareammi ke’nanga mae ri sikamma guburnur siagang sikamma pamarentaya ri propinsi Efrat bageang ilau’. Jari sikamma anjo pamarentaya nasaremi bantuang ra’yaka sollanna akkulle ke’nanga tuli nagaukang ibadana lalang ri Balla’Na Batara ri Yerusalem.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel