Alkitab Mobile SABDA
[VER] : [MAKASAR]     [PL]  [PB] 
 <<  Hakim-hakim 10 >> 

1Ri matenamo Abimelekh, tu niarenga Tola, ana’na Pua, a’jari pamimping untu’ allappassangi tu Israelka. Cucunnai Dodo, battu ri suku Isakhar. Anjorengi ri Samir, ri daera monconna Efraim ammantang.

2Ruampuloi antallu taung ampimpingi umma’ Israel nampa mate. Anjorengi ri Samir nitarawang.

3Le’baki Tola, tuniarenga Yair ampimpingi tu Israelka. Ruampuloi anrua taung sallona ammarenta. Anjo Yair tau battu ri Gilead.

4Nia’ tallumpulo tau ana’ bura’nena. Nia’ tallumpulo keledaina ke’nanga siagang tallumpulo desana ri daera Gilead. Anjo desa-desaya tuli niarengiji desa-desa Yair.

5Matemi Yair, nitarawangang ri Kamon.

6Dorakami pole umma’ Israel mae ri Batara. Tenamo namangngu’rangi ke’nanga ri Batara, siagang tenamo nanynyomba mae ri Ia. Rewata-rewata Baal siagang Asytoret a’giling nasomba ke’nanga. Kammayatompa rewata-rewata bansa Siria, Sidon, Moab, Amon siagang Filistin, yangasemminjo nasomba ke’nanga.

7Jari larromi Batara mae ri umma’ Israel. Sa’genna nibalang parekang ke’nanga nikoasai ri bansa Filistin siagang bansa Amon.

8Sampuloi assagantuju taung sallona anjo ruaya bansa anjallakkang ngasengi tu Israelka ri Gilead, iamintu daera tu Amori irayanganna Binanga Yordan. Nasessa ta’liwa’-liwa’mi ke’nanga tu Israelka.

9Ba’lalo a’limbammi tu Amon ri Binanga Yordan untu’ ambunduki suku Yehuda, Benyamin siagang Efraim. Sa’genna sanna’mo sessana umma’ Israel.

10Jari akkio’mi umma’ Israel appala’ tulung ri Batara, angkana, "Dorakami ikambe mae ri Katte; tenamo namangngu’rangi ikambe mae ri Katte, o Allata’ala! Anynyombami ikambe mae ri rewata-rewata Baalka."

11Appialimi Batara angkana, "Riolo nijajako ri bansa Mesir, Amori, Amon, Filistin, Sidon, Amalek siagang bansa Maon. Nampa anjo wattua akkio’mako mae ri Nakke appala’ tulung. U’rangi sai, apa tena Kulappassangko battu ri kakoasanna ke’nanga?

12(10:11)

13Mingka manna nakamma, ba’lalo nubokoi tonjA’ nunampa mange anynyomba ri rewata-rewataya. Kamma-kamma anne taerokaMa’ allappassangko.

14A’lampamako mange ri anjo rewata-rewata le’baka nupile. Akkio’mako mae ri ke’nanga! Boli’mi kamma naanjo ke’nanga antulungko ri wattu lalannu ri kasukkaranga."

15Mingka nakanamo umma’ Israel mae ri Batara, "Dorakami ikambe, Batara. Kigaukammi manna apa erotTa, assala’ Kitulungi ikambe anne alloa."

16Nampa napela’ ngasemmo ke’nanga sikontu patung barhalaya, nanynyombamo ke’nanga ri Allata’ala. Natu’guru’ pangngamaseammo Allata’ala anciniki ke’nanga lalang kasukkarang.

17Anjo wattua sitabangi sadia-sadia tantara Amon untu’ a’bundu’. Akkemai ke’nanga ri Gilead. Na’rappung tommo umma’ Israel siagang akkema ri Gilead.

18Massing sikuta’nammi anjoreng ra’ya’na siagang pamimping-pamimping battua ri Israel, apaka nia’ ri ke’nanga barani angngangka’ sanjata angngewai bansa Amon. Anjo taua lanipa’jari pamimping ri sikontu tau niaka ri Gilead.



 <<  Hakim-hakim 10 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel