Alkitab Mobile SABDA
[VER] : [MAKASAR]     [PL]  [PB] 
 <<  Imamat 7 >> 

1Iaminne paratorang-paratorang ri passala’na koro’bang passambe karugianga. Anjo koro’banga teai sipato’ tangkasa’na.

2Olo’-olo’ untu’ koro’banga musti nisamballei ri tampa’ pammolongang untu’ koro’bang nitunua, nampa nipatiri’ cera’na ri appaka sa’rinna tampa’ pakkoro’bangnganga.

3Imanga musti napassareangi irate ri tampa’ pakkoro’bangnganga sikontu jannana anjo olo’-oloka, iamintu: Ingkonna a’jannaya, janna niaka antongkoki bone parru’na, lempanna siagang jannana, siagang atenna kaminang bajika.

4(7:3)

5Yangasenna anjo musti natunui irate ri tampa’ pakkoro’bangnganga a’jari koro’bang kanre-kanreang mae ri Batara. Anjo koro’banga iamintu untu’ koro’bang passambe karugiang.

6Sikamma tu bura’nea lalang ri kaluargana imang-imanga akkullei nakanre anjo dageng koro’banga, mingka musti nakanrei ke’nanga ri tampa’ le’baka nipattantu, nasaba’ anjo koro’banga teai sipato’ tangkasa’na.

7Untu’ koro’bang pammopporang dosaya siagang koro’bang passambe karugianga sangkammai paratoranna, iamintu: Dageng olo’-olo’ nikoro’bangkanga iami bageanna imang tugasaka ampassareangi anjo koro’banga.

8Kukkulu’na anjo olo’-oloka bageanna todong imanga.

9Tunggala’ koro’bang nipatalaya ia nitunua lalang ri pattunuanga yareka nipallua lalang ri pamaja’ yareka nilanggaya, a’jari bageanna imang tugasaka ampassareangi anjo wattua.

10Mingka koro’bang nipatala tenaya nanipallui, baji’ nanicampuruka siagang minynya’ kammayatompa kalotoroka, yangasenna untu’ imang-imang jari-jarina Harun, siagang musti nipasangkamma-kammai bagena mae ri ke’nanga.

11Iaminne paratorang-paratorang ri passala’na koro’bang passiamakkang nipassareanga mae ri Batara.

12Punna nipassareang anjo koro’banga untu’ appala’ sukkuru’, anjo olo’-oloka musti nikoro’bangkangi siagang roti tenaya nammake pa’gambang. Anjo rotia akkullei kapala’, nipareka battu labu’ nipasileoka minynya’ zaitun, akkulle tongi roti kalotoro’ nipisika siagang nisapua siagang minynya’, yareka kanrejawa labu’ nipasileoka siagang minynya’ zaitun.

13Pantaranganna anjo musti nipassareang tongi roti ammakea pa’gambang.

14Battu ri anjo a’rupa-rupaya roti musti nipassareangi sipa’gang mae ri Batara; iaminjo bageanna imang angngalleai cera’na anjo olo’-oloka nampa napatiri’ mae ri tampa’ pakkoro’bangnganga untu’ koro’bang passiamakkang.

15Dagenna musti nikanre memang ri allo nipassareanna anjo olo’-oloka, manna sike’de’ takkulleai niboli’ sa’genna ammuko bari’basa’.

16Punna nia’ tau angngerang koro’bang passiamakkang untu’ anrupai tinja’na, yareka untu’ koro’bang lanri ero’ kalenna, tena naparallu nikanre ngaseng memang anjo alloa. Punna nia’ la’binna akkullei nikanre ammukona.

17Punna ri makatalluna alloa nia’ ija tassesa, anjo dagenga musti nitunui sa’genna cappu’.

18Mingka punna ri makatalluna alloa na nikanre ija anjo dagenga, tenamo nalanitarima anjo koro’banga siagang tenamo nalangngerang barakka’ mae ri kalenna anjo tau angngeranga koro’bang, ba’lalo a’jari harammi. Inai-nai angkanrei, salai anjo taua, siagang musti natanggongi kodina.

19Dageng nitabaya ri apa-apa ra’masa’ musti nitunui sa’genna cappu’ siagang takkulleai nikanre. Dageng koro’bang passiamakkanga, tau tenaya bawang nara’masa’ akkulle angkanrei.

20Punna nia’ tau angkanrei anjo dagenga ri wattu ra’masa’na, tenamo nanibilangi anggota umma’Na Allata’ala.

21Punna nia’ tau angkanrei anjo dageng koro’banga ri wattu le’ba’na nasero apa-apa ra’masaka, baji’ na apa-apa battua ri rupataua kammayatompa na apa-apa battua ri olo’-oloka, tena tommo nanibilangi anggota umma’Na Allata’ala.

22Napassareangi Batara mae ri Musa anne paratorang-paratoranga

23untu’ bansa Israel. Jannana sapia, gimbalaka yareka bembea, takkulleai nikanre.

24Jannana olo’-olo’ mate kale-kalea yareka mate nikokkoka ri olo’-olo’ sekke’, takkulleai nikanre mingka akkullei nipake untu’ kaparalluang maraeng.

25Inai-nai angkanrei janna olo’-olo’ biasaya nipassareang untu’ koro’bang kanre-kanreang mae ri Allata’ala, tenamo nanibilangi anggota umma’Na Allata’ala.

26Tu Israel, manna pole kemae ammantang, takkulleai angnganre cera’ jangang-jangang yareka cera’ olo’-olo’ maraengannaya.

27Inai-nai andakkai anjo paratoranga, tenamo nanibilangi anggota umma’Na Allata’ala.

28Napassareangi Batara mae ri Musa anne paratorang-paratoranga

29untu’ bansa Israel. Inai-nai angngerang koro’bang passiamakkang, musti nasa’laki sipa’gang untu’ passare attantu mae ri Batara.

30Ia kalenna musti angngerangi anjo koro’bang kanre-kanreanga. Jannana siagang barambanna anjo olo’-oloka musti nipassareangi a’jari passare nipappicinikang mae ri Batara.

31Imanga musti natunui jannana anjo olo’-oloka irate ri tampa’ pakkoro’bangnganga, mingka barambanna iami bageanna sikamma imanga.

32Bongga kananna musti nipassareangi a’jari sumbangang nisa’la’

33mae ri imang tugasaka ampassareangi cera’na siagang jannana anjo koro’bang passiamakkanga.

34Barambanna siagang bongga kananna iami passare nisa’la’ Naallea Batara battu ri passare napappicinikanga bansa Israel siagang nipassareanga mae ri sikamma imanga. Iaminjo sumbanganna bansa Israel mae ri sikamma imanga sa’genna satunggu-tungguna.

35Battu ri kanre nipassareanga mae ri Batara, iaminjo bageang nipassareanga mae ri Harun siagang ana’-ana’na ri allo nilanti’na ke’nanga a’jari imang.

36Ri anjo alloa Batara Naparentakangi mae ri bansa Israel sollanna anjo battua ri passarena ke’nanga, iaminjo a’jari bageanna sikamma imanga. Anjo paratoranga musti naturuki bansa Israel sa’genna satunggu-tungguna.

37Kammaminjo paratorang paratoranga ri passala’na koro’bang nitunua, koro’bang nipatalaya, koro’bang pammopporang dosaya, koro’bang passambe karugianga, koro’bang pallantikanga siagang koro’bang passiamakkanga.

38Napassareangi Batara anjo parenta-parentaya mae ri Musa ri Moncong Sinai, ri wattunna Nasuro bansa Israel assare koro’bang ri parang lompona Sinai.



 <<  Imamat 7 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran