1Nacini’mi Yakub nia’ battu mae Esau nirurungang ri patambilangngang taunna. Lanri kammana nasa’la’-sa’la’mi ana’na. Nia’ ri Lea, ri Rahel siagang ri ruaya baine piarana.
2Naboli’mi anjo ruaya baine piarana siagang ana’na ke’nanga ri dallekang, nampa Lea siagang ana’-ana’na, nampa Rahel siagang Yusuf kaminang ri boko dudu.
3Nampa a’jappa Yakub ri dallekanna ngaseng ke’nanga. A’reppeseki mae ri daenna, su’ju’mi ri dallekanna daenna pintuju.
4Mingka larimi Esau anruppai Yakub, nampa naraka’ siagang nabau. Nampa sikarrukimo anjo tau ruaya.
5Ri wattunna nacini’ Esau sikamma anjo bainea siagang ana’-ana’na, akkuta’nammi angkana, "Inai anjo ke’nanga niaka nuagang?" Appialimi Yakub angkana, "Anakku ngaseng ke’nanga. Nasarema’ ana’ Allata’ala."
6Le’baki anjo massing majumi anjo baine piarana Yakub siagang ana’-ana’na, nampa su’ju’ ke’nanga.
7Nampa battu tommo Lea siagang ana’-ana’na, na kala’busanna a’reppese’ tommi Yusuf siagang Rahel. Su’ju’ ngasemmi ke’nanga.
8Akkuta’nammi Esau angkana, "Apa ero’nu ri anjo sikamma pa’rappungang kubuntuluka sumpadeng?" Appialimi Yakub angkana, "Untu’ ampakasannangi atinta Daeng."
9Mingka nakanamo Esau, "Angganna’mi pa’barang-barangangku, tena nuparallu assarea’ hadia."
10Nakanamo Yakub, "Teaki’! Punna sannang atinta ri nakke Daeng, kitarima laloi anne passareku. Untu’ inakke punna kuciniki tanjatta sanrapangi kucini’ tanja’Na Allata’ala, lanri bajitta mae ri nakke.
11Kupalaki, nakitarima anne passare kueranga. Baji’ pa’mai’mi Allata’ala mae ri nakke na Nasarema’ sikontu apa kuparalluanga." Tuli napala’ dudumi Yakub ri daenna, nakala’busanna ero’mi Esau antarimai anjo passarena.
12Nampa nakanamo Esau, "Umbamo kipparuru untu’ a’jappa. Inakke la’jappa rioloa’, ri dallekannu."
13Nampa nakanamo Yakub, "Kiassengi angkana dodongi sikamma anne ana’-anaka. Siagang musti tutua’ ri sikamma anne olo’-olo’ appasusua. Punna akkaro-karoi niemba, manna nasiallo bawang, ma’nassa lamate ngasengi anne olo’-oloka.
14A’jappa riolo maki’, lappassamma’ a’jappa palang-palang. La’jappaja’ silinta’-lintakku siagang anne olo’-oloka kammayatompa ana’-anakku sa’genta akkulle kurapi’ ri Edom."
15Nakanamo Esau, "Baji’mi punna kamma. Lakuboliki siapa are jaina ana’ buaku nania’ nuagang." Mingka appialimi Yakub angkana, "Tea’ maki’ susa-susai, ero’naji kupakasannang atinta."
16Kammaminjo, anjo alloa ammotere’mi Esau mae ri Edom.
17Mingka Yakub a’lampami mange ri Sukot, nampa ambangung balla’ untu’ kalenna siagang tampa’ pa’la’langanna olo’-olo’na. Lanri kammana minjo na naaremmo anjo tampaka Sukot.
18Lalang ri pa’lampanna Yakub battu ri Mesopotamia, battumi siagang salama’ ri kota Sikhem, ri pa’rasangang Kanaan. Nampa nabangummo kemana ri se’reang parang ri ampi’na kotaya.
19Anjo parang napattampakia ambangung kema, naballi battu ri tu turungang Hemor, manggena Sikhem, naballinna sibilangngang doe’ pera’.
20Nampa ambangung tampa’ pakkoro’bangngang anjoreng ri tampaka. Naaremmi "El, Allata’alana Israel".
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel