1Nalangngere’na Yakub angkana nia’ gandung nibalukang ri Mesir, nakanamo ri ana’-ana’na, "Angngapa nummantang ngaseng sannang bawang?
2Kulangngere’ kabaraki angkana nia’ gandung nibalukang ri Mesir. A’lampamako mange anjoreng ammalli gandung, sollanna tena nimate cipuru’."
3Jari a’lampami anjo sampuloa daenna Yusuf untu’ mange ammalli gandung ri Mesir.
4Mingka tena napa’biangi Yakub a’lampa Benyamin, andi’naya Yusuf; tena nakellai a’lampa lanri mallaki angkana gassingka anggappai bala anjo anaka.
5Lanri naallei kacipurang pa’rasangang Kanaan, a’lampami ana’-ana’na Yakub siagang tau maraenga mange ri Mesir untu’ ammalli gandung.
6Ia a’baluka gandung mae ri tau battua ri sikontu linoa, iamintu Yusuf; iami guburnur ri Mesir. Lanri kammana battumi sikamma daenna Yusuf nampa anynyomba ri dallekanna Yusuf.
7Ri wattu nacini’na Yusuf anjo sikamma daenna, narupami ke’nanga. Mingka sara-sarai tanaassenga ke’nanga. Kasara’mi bicaranna ri ke’nanga. Akkuta’nangi angkana, "Ikau ngaseng anne tu battu kemaeko?" Appialimi ke’nanga angkana, "Ikambe tubattu ri Kanaan. Battui ikambe untu’ ammalli apa lanakanrea ikambe."
8Manna naassengi Yusuf anjo sikamma daenna, mingka ia tena niassengi ri ke’nanga.
9Nampa nau’rangimi so’nana Yusuf ri passala’na ke’nanga. Nakanamo Yusuf, "Ikau ngaseng anne mata-matako; battu ngasengko ero’ ansalidiki kalammaanna pa’rasanganna ikambe."
10Appialimi ke’nanga angkana, "Tena, karaeng. Ikambe anne atanta, poro battunaji bawang untu’ ammalli apa lanakanrea.
11Ikambe anne tau assari’battang ngasengki’ karaeng. Ikambe anne tau baji’ ngasengki’, teaiki’ mata-mata."
12Nakanamo Yusuf ri ke’nanga, "A’balle-balle ngasengko! Battuko ero’ ansalidiki angkana kemae kalammaanna anne pa’rasanganga."
13Appialimi ke’nanga angkana, "Ikambe anne sampuloki’ anrua assari’battang, karaeng. Ikambe anne ana’ battu ri se’re mangge ri pa’rasangang Kanaan. Nia’ se’re battu ri kambe matemi. Nampa nia’ pole se’re bungkoa kamma-kamma anne niaki siagang manggena ikambe."
14Appialimi Yusuf angkana, "Kammatojengi kanangku. Ikau ngaseng anne mata-matako.
15Erokka’ ancobako: Assumpa’ lanri arenna karaenga angkanaya takkullea ngasengko ambokoi anne pa’rasanganga punna tena nabattu anjo andi’nu bungkoa mae anrinni.
16Kalase’rennu musti ammotere’ angngallei. Ia maraenga lanitahangi sa’genna a’butti kanannu ngaseng. Punna tena, lanri arenna karaenga, ikau ngaseng anne ma’nassa mata-matako!"
17Nampa nipantama ke’nanga ri balla’ tarungkua tallungngallo sallona.
18Ri makatalluna alloa nakanamo Yusuf ri ke’nanga, "Inakke tau mallaka’ siagang tau mannurukia’ ri Allata’ala. Lakulappassangko, mingka nia’ se’re sara’na.
19Untu’ nupa’butti angkanaya tau lambusu’ ngasengko, kalase’rennu lanitahang anrinni ri tarungkua. Ia maraenga akkullei ammotere’ siagang naerangi anjo le’baka nuballi untu’ kaluarganu ia cipuruka lalang kamma-kamma anne.
20Le’baki anjo musti nuerangi andi’nu bungkoa mae ri nakke. Iaminjo buttina sallang angkana ma’nassa kontutojengi anjo kanannu, siagang tenamo nulanihukkung mate." Situjumi ke’nanga ri anjo natappukia guburnurka.
21Nampa nakanamo massing para ia ke’nanga, "Kamma-kamma anne nihukkung maki’ passabakkang salanta mae ri anditta pirangngalloang; appala’ tulungi mingka tena nijampangi, manna nasessamo nicini’. Iaminjo saba’na nakianggappamo sessa ri kamma-kammaya anne."
22Nakanamo Ruben, "Sai kukana memang riolo ri kau ngaseng angkana teako apa-apai anjo anaka. Mingka tea ngasengko appilangngeri. Nakamma-kamma anne nibalasa’mi mae ri katte kamateanna."
23Napahangi Yusuf anjo bicaranna ke’nanga. Mingka tanaassengai ke’nanga angkana napahangi Yusuf anjo bicaranna ke’nanga, lanri ammakei Yusuf tau untu’ ampalembai bicaranna.
24Nabokoimi Yusuf anjo ke’nanga nampa angngarru’. Ri wattunna akkullemo pole a’bicara, ammotere’mi pole mae ri ke’nanga. Nampa naalle Simeon, na nasuro sikko’ ri dallekanna sikamma sari’battanna.
25Naparentakammi Yusuf sollanna nibonei gandung sikamma anjo karung naeranga daenna, nampa anjo doe’na ke’nanga massing nipantamaki ri anjo karunga. Kammayatompa sollanna nisare ke’nanga kanre untu’ nabokong ke’nanga ri aganga. Nigaukammi anjo parentana.
26Le’baki anjo napanai’mi sikamma daenna Yusuf anjo gandunga ri keledaina ke’nanga. Nampa a’lampamo ke’nanga battu anjoreng.
27Ri tampa’ pa’bangngianna ke’nanga, nia’mo kalase’renna ke’nanga ansungkei karung gandunna, lanri ero’na nasare kanre keledaina. Nabuntulu’mi anjo doeka irateanna anjo gandunga.
28Akkio’mi ri sikamma sari’battanna nakana, "Nipoterangi doekku! Ciniki, niaki lalang ri karungku!" Malla’mi nasa’ring ke’nanga. Lalang malla’na ke’nanga, massing nakanamo para ia, "Apa Nagaukang Allata’ala mae ri katte?"
29Ri wattunna battumo ke’nanga ri Kanaan, nacaritami ri manggena ke’nanga sikontu apa le’baka nakasia’ ke’nanga. Nakana ke’nanga,
30"Kasara’ sikali bicaranna anjo guburnur Mesir mae ri kambe. Nampa natudu pole ikambe ammata-matai pa’rasanganna.
31Appialimi ikambe angkana, ‘Ikambe tubaji’ ngasengki’, teaiki’ mata-mata; ikambe tau lambusukki’.
32Ikambe sampuloki’ anrua assari’battang, ana’ battu ri se’re mangge. Se’re sari’battanna ikambe matemi. Naia bungkoa niaki siagang manggena ikambe ri Kanaan.’
33Nakana anjo guburnurka, ‘Erokka’ ancoba ngasengko, untu’ angngassengi angkana apaka ma’nassa tau lambusu’ ngasengko. Kalase’rennu musti ammantang. Maraenga akkullei ammotere’ angngerang gandung mange ri kaluargana ia sessaya napakamma cipuru’ ri kamma-kammaya anne.
34Punna ammotere’ mako angngerangi mae anjo andi’nu bungkoa lakuassemmi angkana teaiko mata-mata, passangalinna tau lambusu’. Jari anjo sari’battannu kutahanga lakupoterammi mae ri kau ngaseng, siagang akkulle mako ammantang ri anne pa’rasanganga. Kammayatompa bebasakko a’danggang.’"
35Nampa, ri wattunna napasulu’ bone karunna ke’nanga, massing nagappami pammoneang doe’na ke’nanga siagang doe’na. Malla’mi ke’nanga siagang manggena ke’nanga.
36Nakanamo manggena ke’nanga, "Ikau ngasemmi a’jari passabakkang natappela’ ngaseng anakku. Yusuf tenami. Simeon tena tommi. Nampa kamma-kamma anne lanualle tongi pole Benyamin. Teai sipato’ pa’risikku."
37Nakanamo Ruben ri manggena, "Passareammi Benyamin ri nakke bapa’. Inakke langngerangi ammotere’. Punna tena, akkullei kibuno ruaya anakku bura’nea."
38Mingka nakanamo Yakub, "Tena! Takkulleai nuerang Benyamin a’lampa. Matemi daenna, kamma-kamma anne kalenna mami ammantang. Gassingka anggappai bala lalang ri lampanu. Inakke anne toama’. Anjo susa lanupabattua ri nakke la’jari sabaki ri kamateangku."
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel