Alkitab Mobile SABDA
[VER] : [MAKASAR]     [PL]  [PB] 
 <<  Mazmur 22 >> 

1Untu’ pamimping pakelong. Situru’ lagu: Jonga ri wattu bari’basa’. Pammujina Daud. (22-2) Allata’alaku, o, Allata’alaku, angngapa naKibokoia’? Akkioka’, mingka tuli bellaKi’ na tena naKitulunga’.

2(22-3) O, Allata’alaku, akkioka’ ri wattu allo, mingka tuli a’merekiKi’. Appala’ doanga’ ri wattu bangngi, mingka tena todong na sannang atingku.

3(22-4) Mingka iKattemi Karaeng Kaminang Matangkasaka, nipuji-pujia ri tu Israel.

4(22-5) Boe-boena ikambe manrannuangi ri Katte, manrannuangi ke’nanga, nakipasalama’ ke’nanga.

5(22-6) Akkioki ke’nanga ri Katte na Kilappassang ke’nanga; manrannuangi ke’nanga na tena Kipassalasai.

6(22-7) Mingka inakke anne sanrapanja’ gallang-gallang, teai rupatau, nicau-cau na nihina ri tau jaia.

7(22-8) Yangaseng accinika ri nakke, nacau-caua’, nabibeia’ munceng na napammenggong ulunna.

8(22-9) Nakana ke’nanga, "Lappassammi napattoang Bataraya, sollanna nipasalama’ ri Batara, punna sannang Batara mae ri ia!"

9(22-10) IKattemi ampasulukka’ battu ri pammanakkanga, siagang ampakaamanga’ ri riwaanna ammakku.

10(22-11) Battu ri lassukku, lalang limanTai sarengku, battu ri lalangku ri battang, iKattemi Allata’alaku.

11(22-12) TeaKi’ bellai, saba’ a’reppese’mi bahayaya, na tena antulunga’.

12(22-13) Sanrapangi tedong romang jaia, musua angkatulunga’, sanrapang tedong romang liara’ battu ri Basan angkatulunga’.

13(22-14) Tassungkei bawana ke’nanga andallekanga’, sanrapang singa ammarrunga sa’ranna ero’ angngokko’.

14(22-15) Tenamo kagassingangku sanrapang je’ne’ tattumpaya, sikontu bukungku sangkamma ta’lappasa’ ngasemmi ri lesoanna, assolommi atingku sanrapang liling.

15(22-16) Kalotoro’mi karro’-karrokku sanrapang kaca ancuruka, a’dakki’mi lilaku ri nga’ngalakku. O, Batara, angngapa naKibokoia’ irate ri limbu’buka sanrapang tau mateamo.

16(22-17) Nikatulunga’ ri garombolang tau ja’dalaka; sanrapang kongkong jaia ke’nanga angkatulunga, anto’do’-to’doki limangku siagang bangkengku.

17(22-18) Sikontu buku-bukungku akkullei kirekeng, nacinikia’ musungku sanrapang cini’-cinikang.

18(22-19) Nabage-bagei ke’nanga pakeangku, na’goccang nomoro’ untu’ anggappai jubaku.

19(22-20) Mingka iKatte, teaKi’ bellai, o, Batara, battu maKi’ linta’ antulunga’, saba’ iKattemi kagassingangku.

20(22-21) Kipakabellai pa’danga battu ri nyawaku, Kipasalamaka’ battu ri pangngokko’na kongkonga.

21(22-22) Tena pakkulleku, Kilappassanga’ battu ri tanru’na tedong romanga siagang muncenna singaya.

22(22-23) Lakucaritai sikamma gautTa mae ri sikamma sari’battangku; lalang ri passirapakkanna ummatTa mammuji-mujia’ ri Katte.

23(22-24) Iami puji, he, sikamma tau mappilangngeria! Iami pakalompo, ikau sikontu turunganna Yakub! Su’jukko ri Ia, ikau sikontu turunganna Israel!

24(22-25) Saba’ tena Nacini’ tunai tau nijallakkanga, natena Nabawang-bawangngangi kasessanna. Tena Nala’boko battu ri anjo taua, mingka napilangngeri punna appala’ tulungi mae ri Ia.

25(22-26) Ri tangnga-tangngana passe’reanna ummaka mammujia’ mae ri Katte, lanri sikontu apa le’baka Kigaukang. Ri dallekang umma’ mappilangngeria kupassareang koro’bang le’baka kupa’janjiang.

26(22-27) Tu kasi-asia langnganrei sa’genna bassoro’; tau battua mae ri Batara lamammuji ri Ia. Poro salewangang ngasengko sa’genna satunggu-tungguna!

27(22-28) Sikontu bansaya langngu’rangi ri Batara nampa ammotere’ mae ri Ia, sikontu suku bansaya lasu’juki anynyomba mae ri Ia.

28(22-29) Nasaba’ Batarayami makoasa, Ia ammarenta mae ri bansa-bansaya.

29(22-30) Sikontu tau malompoa lasu’juki ri dallekanNa, sikontu rupatau tattallasa’ satunggua lanynyombai mae ri Ia.

30(22-31) Sikamma turungang ri bokoa lanynyombai ri Batara, lanibirittakangi sa’genna sikamma turungang ri bokoa.

31(22-32) Ri bansa lassuka ri boko lanikabarrangi angkanaya Batara ampasalamaki umma’Na.



 <<  Mazmur 22 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel