1"Nampa Nakana Batara mae ri nakke, ‘Musa, angngalleko ruang la’ba’ batu nampa nupakamma riolo, siagang appare’ tongko se’re patti untu’ pammantangnganna, nampa battuko mae ri Nakke irate ri coppo’na monconga.
2LaKutulisiki mae ri anjo batu-batua iamintu kana-kana sangkammaya le’baka Kutulisi’ ri anjo batu le’baka nureppe’; nampa musti nupantama anjo batu-batua ri anjo pattia.’
3Jari appare’ma’ patti battu ri kayu akasia siagang angngallema’ ruang la’ba’ batu nampa kupa’ sangkamma riolo, nampa kuerang nai’ ri monconga.
4Natulisi’mi Batara ri anjo batua Sampuloa ParentaNa sangkamma anjo rioloa, iamintu parenta-parenta Napassareanga mae ri kau, ri wattunna a’bicara battu lalang ri tangnga-tangngana pepeka ri wattunnu asse’re ri bangkenna monconga. Le’baki anjo Napassareammi Batara anjo batu le’baka Natulisi’ KalenNa, mae ri nakke.
5Nampa naumma’ ammotere’ battu ri monconga. Nampa situru’ parentaNa Batara, kupantama’mi anjo ruaya batu ri patti le’baka kupare’. Nappakkaramula anjo wattua sa’genna kamma-kamma anne anjo ruaya batu niaka tulisanna tuli nia’na anjoreng."
6(Le’baki anjo a’lampami tu Israel battu ribungung-bungunna tu Yaakan, siagang mangemi ri Mosera. Anjoremmi mate siagang nitarawang Harun. Ana’na, iamintu Eleazar, ansambeangi a’jari imang.
7Battu anjoreng a’lampami ke’nanga mange ri Gudgod, nampa tulusu’ mange ri Yotbata, iamintu daera jaia je’ne’na.
8Anjoreng ri monconga Naallemi Batara tu Lewi nampa Nasa’la’ untu’ angngurusuki Patti Parjanjianga siagang nalayani Batara, kammayatompa ampabattui kana barakkaka lalang arenNa Batara. Iaminjo tugasa’na ke’nanga sa’genna kamma-kamma anne.
9Lanri kammana minjo natena nanggappa butta suku Lewi sangkamma suku-suku maraenga. Nasaba’ Batarami a’jari bageang warisi’na ke’nanga, sangkamma Napaua Karaeng Allata’alanu mae ri ke’nanga.)
10"Patampulo allo patampulo bangngia’ ammantang irate ri monconga sangkamma kugaukanga riolo. Sikalipi pole Napilangngeri Batara pappalakku, siagang situjumi angkanaya tena naNaancurukko.
11Nampa Nasuroa’ a’lampa untu’ ampimpingko sollanna akkulle nupatang butta Napa’janjianga mae ri boe-boenu."
12"Kamma-kamma anne sari’battangku ngaseng, parhatikang lalomi apa Natuntuka Karaeng Allata’alanu battu ri kau, angkanaya: Pakala’biriki Karaeng Allata’alanu siagang gaukang laloi sikontu Naparentakanga. Mangngamaseangko mae ri Ia, siagang gaukang laloi ibadanu mae ri Ia ilalang sikontu batangkalennu siagang nyawanu.
13Turuki sikontu parentaNa Batara kupabattua mae ri kau anne alloa, lanri untu’ kabajikang kalennu tonji.
14Karaeng Allata’alanu ampatangi langi’ kaminang tinggia; kammayatompa buttaya siagang sikontu apa-apa niaka ri tompo’na Ia ngaseng pata.
15Mingka teai sipato’ lompona pangngamaseanNa Batara mae ri boe-boenu, sa’genna ikaumi Napile battu ri alla’na sikontua bansa, siagang sa’genna kamma-kamma anne ikauji umma’Na Napilea.
16Jari appakkaramula kamma-kamma anne musti mannurukiko mae ri Batara siagang tea’ mako kapala batui pole.
17Karaeng Allata’alanu ri tompo’na sikontu rewataya siagang irateanganna sikontu kakoasanga. Iami Allata’ala mala’biri’ siagang makoasaya, mustia nituruki ero’Na. TaNangaiyai angngalle sialia siagang tena todong Naero’ annarima passare nipacoco’.
18Naalleangangi ha’na ana’-ana’ kukanga siagang jandaya, sollanna akkulle nakasia’ ke’nanga kaadelanga; Nakamaseangi tubattu-battua niaka sipattallassang siagang bansata na Nasare ke’nanga kanre siagang pakeang.
19Jari ikau musti nupappicinikang tongi pangngamaseannu mae ri anjo bansa maraeng battu-battua, nasaba’ ikau riolo a’jari tubattu-battu tonjako ri Mesir.
20Pakala’biriki Karaeng Allata’alanu, siagang Iaji bawang musti nusomba. Paralluko tuli majarre’ pa’mai’nu mae ri Ia siagang lalang arenNa bawang nussumpa.
21Mammujiko mae ri Ia, nasaba’ Iami Allata’alanu. Mata kalennumi le’ba’ anciniki sikamma gau’ malompo siagang gau’ heba’ Nagaukanga untu’ ikau ngaseng.
22Ri wattunna a’lampa boe-boenu mange ri Mesir, anjo jaina ke’nanga tuju puloji tau. Mingka Napa’jari jaimi Karaeng Allata’alanu anjo ke’nanga a’jari sanrapang bintoenga ri langika jaina."
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel