1Nampa naeranga’ anjo tu bura’nea mange ri pakke’bu’ lompo a’dalle’ anraika,
2siagang anjoremmi nia’ kucini’ caya accilla’ battu raya, iamintu tanra kahaderanNa Allata’alana Israel. Kalangngerammi sa’ranNa Allata’ala sangkamma gamarrunna bombanga ri tamparang, siagang accilla’-cillaki buttaya lanri singara’ kahaderanNa Allata’ala.
3Anjo paccinikku sangkammai kucini’ ri wattunna battu Allata’ala untu’ angngancuruki Yerusalem, siagang sangkammai kucinika ri Binanga Kebar. Nampa kupara’ba kalengku assu’ju’.
4Anjo caya accillaka a’gioki allalo battu ri pakke’bu’ lompo bageang irayaya nampa antama ri Balla’Na Batara.
5Naangkakka’ RohNa Batara nampa naeranga’ mange ri paranglakkeng bageang lalang; anjoreng kucini’ nitongkoki Balla’Na Batara ri caya kahaderanNa Batara.
6Ri wattunna ammentengija anjo tu bura’nea ri sa’ringku, kulangngereki a’bicara Batara battu lalang ri Balla’Na Batara mae ri nakke, nakana,
7"He tau, iaminne empoang kakaraengang kala’birangKu. AnrinniA’ lammantang ri tangnga-tangngana umma’ Israel siagang ammarenta mae ri ke’nanga sa’genna satunggu-tungguna. Baji’ nake’nanga, kammayatompa sikamma karaenna ke’nanga, tenamo nalanara’massi areng matangkasakKu lanri anynyombana barhala yareka natarawanna maya’na sikamma karaenna ke’nanga anrinni ri tampaka.
8Riolo sikamma karaenna ke’nanga appareki balo’-balo’ pakke’bu’ siagang benteng-benteng pakke’bu’ balla’ karaenna ke’nanga ri sa’rinna balo’-balo’ pakke’bu’na siagang benteng-benteng pakke’bu’ BallakKu, sa’genna se’reji bawang rinring ri alla’na. Nara’massimi areng matangkasakKu ke’nanga, lanri nagaukanna panggaukang appakaringi’-ringika. Lanri kammana anjo naKupanrakimo ke’nanga lalang pangngalarroingKu.
9Mingka appakkaramula kamma-kamma anne musti napammari ke’nanga anynyomba ri barhala siagang napaletteki sikamma maya’na karaenna ke’nanga. Le’baki anjo, lammantamMa’ ri tangnga-tangngana ke’nanga sa’genna satunggu-tungguna."
10Nampa Nakanamo pole Batara, "He tau, pauangi umma’ Israel ri passala’na anne BallakKu, siagang suroi ke’nanga amparessai rancanana. Pakasiriki ke’nanga lanri sikontu dosana ke’nanga.
11Nampa punna siri’-siri’mo ke’nanga lanri sikamma panggaukanna ke’nanga, pakasingariammi ke’nanga rancanana anne BallakKu, iamintu: modele’na, sikamma pakke’bu’ antama’na siagang assulu’na, susunang bangunanna, sikontu paratoranna siagang hukkung-hukkunna. Tulisi’ kabusuki anjo untu’ ke’nanga sollanna akkulle nacini’ ke’nanga siagang naparhatikang carana angngatoroki sikamma yangasenna, kammayatompa naturuki sikontu paratoranna.
12Iaminne sipa’ kalenna Balla’Na Batara: Sikontu tampaka ri tammulilina ri coppo’na buluka sanna’ matangkasa’na."
13Iaminne ukkuranna tampa’ pakkoro’bangnganga situru’ ukkurang nipakea angngukkuruki Balla’Na Batara. Ri tammulilina bangkeng tampa’ pakkoro’bangnganga nia’ se’re kaloro’ sitangnga metere’ lantanna siagang sangkara’na sitangnga metere’ todong; siagang birinna bageang pantara’na siparapa’ metere’ tinggina.
14Battu ri kaloroka sa’genna garisi’na tampa’ pakkoro’bangngang kaminang irawaya, tinggina se’re metere’. Bageang tangngana tinggina rua metere’, siagang seppakkangngangi sitangnga metere’ natammulilina bangkeng tampa’ pakkoro’bangnganga. Bageang makatallua, iamintu coppo’na tampa’ pakkoro’bangnganga, sitangnga metere’ todong la’bi seppa’na natammulilina bageang tangngana.
15Anne bageang makatallua iamintu tampa’ attunu koro’bang tinggina rua metere’. Ri appaka panyingkulu’na nia’ ammumba assulu’ sangkamma tanru’.
16Coppo’na anjo tampa’ pakkoro’bangnganga modele’na appaki pasagi; tunggala’ sa’rinna 6 metere’ ukkuranna.
17Bageang tangngana appa’ tongi pasagi modele’na, tunggala’ sa’rinna 7 metere’ ukkuranna, siagang se’re biring bageang pantara’na tinggina siparapa’ metere’. (Sangkara’na kaloro’na sitangnga metere’.) Ri sa’ri bageang irayana nia’ tuka’ a’lampa mangea ri coppo’na tampa’ pakkoro’bangnganga.
18Nakana Batara Kaminang Tinggia ri nakke, "He tau, pilangngeri apa Kupaua mae ri kau. Punna le’baki anjo tampa’ pakkoro’bangnganga nibangung, musti numinyaki iamintu attunuko koro’bang irateanna siagang nupiracciki cera’ koro’bang.
19Imang jari-jarinaji bawang Imang Zadok battu ri suku Lewi akkulle battu mae ri dallekangKu untu’ anggaukangi ibadaya. INakke, Batara Kaminang Tinggia amparentakangi anjo passalaka. Sarei ke’nanga sikayu sapi laki rungkaya untu’ koro’bang pannangkasi dosa.
20Allei sike’de’ cera’na nampa nupasapu mae ri sikamma tanruka ri appaka panyingkulu’ coppo’na anjo tampa’ pakkoro’bangnganga, kammayatompa sikamma panyingkulu’ bageang tangngana siagang ri tammulilina birinna anjo tampa’ pakkoro’bangnganga. Kammami anjo caranu antangkasi anjo tampa’ pakkoro’bangnganga siagang nusa’laki untu’ iNakke.
21Nampa, angngalleko sapi laki untu’ pannangkasina anjo dosaya, siagang tunui ri tampa’ le’baka nipattantu, iamintu ri pantaranganna tampa’ matangkasa’na Balla’Na Batara.
22Ammukona musti assareko sikayu bembe laki tenaya caca’na untu’ koro’bang pammopporang dosa. Pakatangkasaki anjo tampa’ pakkoro’bangnganga siagang anjo cera’ bembea, sangkamma nugaukanga ri anjo sapi laki rungkaya.
23Punna le’ba’ nugaukang anjo sikammaya, angngalleko sikayu sapi laki rungka siagang sikayu bembe laki rungka, rua-rua tena caca’na.
24Nampa nuerang mae ri Nakke. Sikamma imanga musti appakioroki ce’la irateanna anjo ruaya olo’-olo’ siagang natunui a’jari koro’bang untu’ iNakke.
25Tunggala’ allo lalang tuju allo, musti assareko koro’bang sikayu bembe, sapi laki rungka, siagang bembe laki untu’ koro’bang pammopporang dosa. Sikamma anjo olo’-oloka takkulleai nia’ caca’na.
26Tuju allo sallona sikamma imanga musti appareki pa’gaukang amminyaki anjo tampa’ pakkoro’bangnganga siagang napasadiai untu’ akkulle nipake.
27Punna le’ba’ anjo tuju alloa, sikamma imanga musti appakkaramulai assare irate ri anjo tampa’ pakkoro’bangnganga iamintu koro’bang nitunu siagang koro’bang pappasiamakkang untu’ ummaka. Jari lasannangi nyawaku mae ri kau ngaseng. INakke, Batara Kaminang Tinggia, anne akkana."
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel