Alkitab Mobile SABDA
[VER] : [MAKASAR]     [PL]  [PB] 
 <<  Yesaya 8 >> 

1Nakana Batara mae ri nakke, "Angngalleko se’re batu pannulisang, ia lompoa, nampa nutulisi’ siagang hurupu’ a’nassa anne: ‘Panrampasang Lacciri’, Pangngellakkang Tippaka’.

2Akkiokko rua tau akkullea nipatappa’ a’jari sa’bi, iamintu Imang Uria siagang Zakharia, ana’na Yeberekhya."

3Siapa are wattu ribokoanganna attianammi turiballakku. Ri wattunna lassu’ anjo ana’na ikambe, Nakanamo Batara ri nakke, "Arengi antu anaka ‘Panrampasang Lacciri’, Pangngellakkang Tippaka.’

4Saba’ ri tenanapa nalompo-lompo antu anaka nakkulle angkana ‘Bapa" siagang ‘Amma," sikontu kakalumanynyangnganna Damsyik siagang sikontu barang narampasaka tu Samaria lanilalingi ri karaeng Asyur."

5Nakanamo pole Batara ri nakke,

6"Anne bansaya natollaki je’ne’ ci’nong battua ri pangka Binangana Syiloah, na sannang ri Karaeng Rezin siagang Karaeng Pekah.

7Lanri kammana anjo, iNakke Batara, laKupabattui karaeng Asyur siagang tantarana untu’ ambunduki Yehuda. La’bakkai maju ke’nanga, rapang Binanga Efrat allumpa-lumpa sa’genna a’ba biring-birinna.

8Lanatujui ke’nanga Yehuda rapang a’ba narapika sa’genna kallong tinggina nammantang je’neka ri kere-keremae." Narurungangki’ Allata’ala! Takka’rangi ka’nyi’Na alla’langi pa’rasanganta.

9Annekkere’ mako nu’rappungang, he sikontu bansaya! Pilangngeri he sikamma cappa’-cappa’ buttaya! Sadiako untu’ a’bundu’, mingka siagang pa’mai’ annekkereka! Iyo, sadia-sadiako, mingka lalang malla’nu!

10Apparekko rancana, mingka tena nia’ anjari. Angngalle mako kaputusang, mingka tena matu-matunna, saba’ ikambe Narurungangki’ Allata’alana ikambe.

11Nikoasaia’ ri Batara siagang Napakaingaka’ sollanna tena kupinawangi anjo oloang naoloa anjo bansaya. Nakana,

12"Teako arengi passikongkolang apa nakanaya ke’nanga passikongkolang, siagang teako mallakki ri apa-apa nakamallakkanga ke’nanga.

13U’rangi angkanaya iNakke, Batara Kaminang Makoasaya, tangkasakKa’. INakkeji bawang musti nukamallakkang.

14Lanri sanna’na tangkasakKu, iNakke la’jari batu natatto’roi ra’ya’ Yehuda siagang Israel, siagang sikko’ angngalleai pandudu’na Yerusalem.

15Jai tau latatto’ro siagang laloko’. Lata’loposoki ke’nanga antama’ ri sikkoka."

16Ikau ngaseng, ana’-ana’ gurungku, musti nuboliki siagang nuparakai sikamma pasang Napassareanga Allata’ala mae ri nakke.

17Le’baki Batara Nacokko KalenNa battu ri turunganna Yakub, umma’Na, mingka inakke tappaka’ siagang manrannuanga’ mae ri Ia.

18Annemi inakke siagang ana’-ana’ Napassareanga Batara mae ri nakke. Batara Kaminang Makoasaya ammarenta ri Bulu’ Sion, ansuroi ikambe battu a’jari pammatei mae ri umma’ Israel.

19Mingka lanisuroko ri taua appala’ pangngunju’ battu ri sanro-sanroa, ia a’bici’-bicika siagang a’gio’-gioka muncenna. Lanakana anjo taua, "Sai siratangki’ appala’ pangngunju’ battu ri sikamma nyawana tau matea untu’ kaparalluanna tau attallasaka?"

20Appiali mako kamma anne, "Pilangngeri ajaranNa Batara! Tau tenaya na’bicara situru’ anjo pangngajaranga, tena panrannuanna."

21Sikamma tau cilakaya siagang tau cipuruka a’dete’mi ri anjo pa’rasanganga. Lanri cipuru’na, a’larro-larromi ke’nanga sa’genna natunrai karaenga siagang Allata’alana ke’nanga. Manna accini’ kemae ke’nanga, nai’

22yareka naung, tena apa-apa lanacini’ ke’nanga pantaranganna kasukkarrang siagang sassang kammayatompa bayang-bayang appakamallaka. Lanipelaki ke’nanga mae ri anjo tampa’ sassanga.



 <<  Yesaya 8 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel