1Canggu agu lélo sanggéd Adak Agama mai taé di Paulus: “Asé-ka’én, haéng leso ho’o mosé kig aku, ali nai nggalas oné ranga de Mori Keraéng.”
2Maik Imam Mésé Ananias, jera ata situt hesé lupi hi Paulus ongga oné mu’un.
3Léko pandé hitu mai taé di Paulus ngong hia: “Mori Keraéng te ongga hau, oé témbok ata wulak le cét bakok! Ité lonto cé’é ho’o kudut beté-bicar latang te aku lorong wintuk Taurat, maik hau ata lagé wintuk Taurat ali peréntam hitut kudut ongga aku.”
4Sanggéd ata situt manga nitu taéd: “Hau loér Imam Mésé de Mori Keraéng.”
5Walé li Paulus: “Oé asé-ka’é, aku toé baé te hia Imam Mésé. Bo tu’ung manga tulis: hau néka curup da’at kamping Tu’a de wa’u rum!”
6Ali baé iwod oné mai isé ata Saduki agu iwod ata Parisi, mai taé diha oné ranga de Adak Agama situ: “Asé-ka’é, aku ho’o waé data Parisi; aku mai wa ranga de Adak ho’o ai aku bengkes te to’o koléd ata mata.”
7Du curup nenggitun hia, rodo léwang taud ata Parisi agu ata Saduki agu pati-péars ata do situ.
8Ai taé data Saduki toé manga to’o kolé agu toé manga malékat ko nai, maik ata Parisi imbi situt sua.
9Itu kali mangan ngaok mésé. Pisa taus ata pecing Taurat oné mai isét Parisi hesé bolos agu léwang kétas, mai taéd: “Ami toé manga dumpu can sala oné ata ho’o! Aik manga nai ko malékat ata poli tombo agu hia.”
10Mangan léwang tau mésé, wiga rantang kepala tentera émé isé pandé cecut hi Paulus. Landing hitu hia perénta tentera kudut wa’u nggere-wa agu dadé hi Paulus oné mai bahi-réha isén agu ngo oné mbaru de tentera.
11Ného diang wién, Mori Yésus mai hesé lupi hia agu mai taén: “Pandé mberés naim, ai ného ranim hitu poli téi saka-si latang te Aku, oné Yérusalém, nenggitu kolé hau paka saka-si oné Roma.”
Komplotan Data Yahudi
12Du gerak tana, ata Yahudi bantang pandé ca liwuts agu cenais ali sumpa te isé toé hang ko inungs émé toéd mbelé hi Paulus.
13Nekid isét pandé liwut hitu réci oné mai patmpulu atas.
14Isé ngo cumang Imam-imam kepala agu taung Tu’a de wa’u Yahudi agu mai taéd: “Ami poli cenai’gm ali sumpa te ami toé hang ko inung émé toéd mbelé lami hi Paulus.
15Landing hitu ho’o ga, poro méu cama-cama agu Adak Agama taé agu kepala tentera kudut hia pandé cumang kolé hi Paulus agu méu, néhot kudut mbajik kéta lélo bicar diha. Lari nggitun ami poli mengkek kudut mbelé hia du hia toéd cai oné méuy.”
16Maik to’a di Paulus, anak de weta diha, dengé bantang hitu latang te caka hia. Hia ngo oné mbaru de tentera kudut tombo apa hitu oné hi Paulus.
17Itu kali hi Paulus bénta cengata tentera agu mai taén ngong hia: “Dadé ata reba ho’o oné kepala tentera, ai manga ca sékék ata paka tombo agu hia.”
18Tentera hitu dadé hia oné kepala tentera agu mai taén: “Hi Paulus ata bui hitu, bénta akuy agu tegi kudut dadé ata reba ho’o oné ranga dité, ai manga sékék ata tombo oné ité.”
19Kepala tentera hitu cau limé data reba hitu, itu kali dadé hanang koéd oné lupi hia agu réi: “Apa kéta hitut kudut tombo agu aku?”
20Mai walén: “Sanggéd ata Yahudi poli ce-naid kudut tegi oné ité, kudut diang ité pandé cumang kolé hi Paulus oné ranga de Adak Agama néhot Adak situ ngoéng te séngét tombo ata mbajik kéta oné mai hia.
21Maik néka lorong ngoéng disé, ai réci oné mai patmpulu ata oné mai isé poli mengkekd te caka hias. Isé poli ce-naid ali sumpa te isé toé di hang ko inung émé toéd mbelé hia; ho’o ga isé poli taung mengkekd agu hanang géréng kaut éng ko toé lité.”
22Itu kali kepala tentera jera kolé ata reba hitu agu perénta oné hia: “Néka tombo agu céi-céing kaut, te hau poli tombon apa ho’o agu aku.”
Hi Paulus Hésing Nggeroné Kaisaréa
23Poli hitu kepala tentera bénta sua taus tentera agu mai taén: “Mengkek sua ratusn tentera kudut ngo oné Kaisaréa agu pitumpulun ata léti jarang agu sua ratusn ata ba korung, aram ongga ciok wié ho’o.
24Mengkek kolé pisan keledai latang te léti di Paulus, agu dadé hia di’a-di’a oné ranga de gubernur Féliks.”
25Hia tulis surak ata icin nenggo’oy:
26“Tabé oné mai hi Klaudius Lisias latang te tuang gubernur Feliks.
27Ata ho’o deko lata Yahudi agu du kudut mbelén lisé, aku mai agu tenterag kudut ré’ing agu lego hia, ai dengé laku hia ata Romay.
28Kudut pecing apa kéta betuan baro disé kamping hia, aku pandé cumang hia agu Adak Agama disé.
29Haéng laku te hia tara baron méséng lagé wintuk Taurat disé, maik toé manga mangkong ata patun te pandé matay ko buiy.
30Oné aku poli tombon, te manga ca liwuts ata poli bantang kudut mbelé hia. Landing hitu tara hidi-hadan laku jera dadé hia oné ité, maik latang te isét cecupu poli tombod laku, te isé paka baro bicar hitu oné ite.”
31Itu kali tentera situ dadé hi Paulus lorong ného hitut perénta oné isé agu dadé hia le wié oné ranga di Antipatris.
32Ného diangn isé sendo isét léti jarang lako rudas maik weki rud isé kolé nggere-oné mbaru de tentera.
33Du caid oné Kaisaréa isé situt léti jarang téi surak hitu oné gubernur agu hi Paulus.
34Du poli bacang surak hitu, gubernur réi agu hi Paulus, oné mai béo nian hia. Du dengén liha te hi Paulus oné mai Kilikia,
35mai taén: “Aku te urus bicarm, émé ata situt baro hau cai cé’é ho’os.” Itu kali hia jera bui hi Paulus oné mbaru di Hérodés.
<< Kisah Para Rasul 23 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel