Hi Pétrus Agu Hi Yohanés Oné Ranga De Adak Agama
1Du hi Pétrus agu hi Yohanés rémé tombod agu ata do, sanggéd imam agu hiat tu’a lamin Mbaru de Mori Keraéng agu ata Saduki mai cumang isés.
2Ata situ rabo kétas ai isé toing ata do agu keréba te oné Mori Yésus manga mosé kolé oné mai ata mata.
3Isé deko latas agu na’a oné buis, dengkir ného diang gulad, ai wiég tana.
4Maik oné mai isét dengéd toing situ, dod ata imbi wiga nekid isé aram lima sebus ata ronad.
5Ného diangn, sanggéd tu’a disét Yahudi agu isét ata pecing Taurat, lonto léoks oné Yérusalém
6agu Imam Mésé hi Hanas agu hi Kayafas, hi Yohanés agu hi Aléksandér agu sanggéd ata bana, isét waé de Imam Mésé.
7Itug kali hi Pétrus agu hi Yohanés, dadé nggere-oné ranga de tu’a situt lonto léok agu wangkag réin lisé, nenggo’oy, réid: “Ali kuasa diong ko le ngasang diong pandén le méu tanda lenget hitu?”
8Hi Pétrus ata penong le Nai Nggeluk walé isé situ: “Oé sanggés méut ata tu’a de ro’éng agu adak laing,
9émé ami ho’o réi ali ca pandé di’a latang te cengata ata beti agu paka tombo ali kuasa diong pandé inan ata hitu,
10kudut pecing di’a-di’a le méu agu le sanggén ro’éng Israél, te oné ngasang de Mori Yésus Krisrtus ata Nasarét hiot poli panggoln le méu, maik poli pandé mosé kolén le Mori Keraéng oné mai ata mata – landing ali Mori Yésus hitu tara ata ho’o hesé agu weki di’an wa ranga de méu te ho’on.
11Mori Yésus hitu ného watu ata oké le tukang pandé mbaru – ngong weki rus méu – maik Hia poli ciri watu landukn.
12Toé manga selamak oné mai céi-céing kaut, hanang oné Hia, ai oné lino ho’o, toé manga ngasang cebana ata téi oné manusia, kudut le ngasang hitu ité haéng selamak.”
13Du lonto léok hitu ita lisé toé kéta manga sesenga’id hi Pétrus agu hi Yohanés agu pecing te isét-sua situ ro’éng toé sekolas, lengets isé, agu pecing lisé isét-sua situ ata lorong Mori Yésus.
14Ai ali ita lisé ata hitut poli inan hesé baling racap de rasul situt sua, isé toé ngancéng léwang kolés.
15Du poli jera koléd lisé sanggéd rasul situ, bantang kolés isé,
16agu mai taéd: “Co’os lité pandéd ata so’o gé? Ai poli pecing taung le weki Yérusalém te isé poli pandé tanda lengét ata dio-dolokn kéta, agu ité toé ngancéng pali koléy.
17Maik kudut apa hitu néka pecing taung le lawa-do, co’om ngereks lité agu ré’ing isé néka tombo kolé agu céing-céing kaut le ngasang hitu.”
18Du ngo oné kolés isét-sua, jeras lisé, kudut néka manga kolé tombo ko toing ata le ngasang de Mori Yésus.
19Maik walé di Pétrus agu hi Yohanés agu isé: “Wajo damang beté le rus kaut, nia ata molorn oné ranga de Mori Keraéng: lorong méu ko lorong Mori Keraéng.
20Ai toé ngancéng hema kaut kami latangt apa ata poli ita agu dengé dami.”
21Tambang kéta cirangn ngerek disé kamping rasul-rasul situ, maik cemoln ga, lego kolés isé, ai lonto léok hitu toé manga ita salangn te wahéng isé, ai lawa-do naring Mori Keraéng lut tanda lenget hitut pandé di Pétrus.
22Ai ata hitut poli inan le tanda lenget hitu, réci oné mai patmpulu ntaung mosén.
Ngaji De Weki Serani
23Woko poli legod, ngo hi Pétrus agu hi Yohanés oné weki serani tombo lisé sanggéd cao-ca situt curup le sanggéd imam kepala agu ata tu’a laingn oné isé.
24Du dengé le weki-serani tombo situ, og kali ngaji camas nggere-oné Mori Keraéng: “Yo Mori, Ité ata dédék awang éta agu tanan wa, tacik agu sanggéd icin.
25Le Nai Nggeluk loléng mendi-Rum hi Daud, ema dami, Ité manga rewengd: Co’o tara rabod sanggéd ata toé pecing Mori Keraéng, co’o tara sanggéd uku bantang ata toé manga betuan?
26Sanggéd raja de lino mengkeks agu sanggéd ata tu’a laing, nempung te léwang Mori Keraéng agu Ata Palas Diha.
27Ai cetu’ungn poli nempung oné béndar ho’o hi Hérodés agu hi Ponsius Pilatus agu sanggéd uku agu néténg panga Israél, dungkang Mori Yésus, Mendim hitut nggeluk agu Ata Palas le Rum
28kudut pandé sanggéd cao-ca situt poli letid du pu’ung le kuasa agu ngoéng Rum.
29Te ho’on yo Mori, lélo koé Lité ngerek disé, agu téi koé mberes oné sanggéd mendiM, kudut ba keréba reweng Dité.
30Los koé limé Dité te pandé ina sanggén ata, agu pandé koé sanggéd tanda agu tanda lenget le ngasang de Mori Yésus, Mendi-Rum hitut nggeluk.”
31Agu du rémé ngajid isé, gégoy osang baté lipur disé agu sanggéd taung isé penong le Nai Nggeluks, og kali keréba lisé sanggéd reweng de Mori Keraéng agu mberes kétas.
Mosé De Weki Serani
32Sanggéd isét poli imbi situ, ca nai-ca tukas, agu toé manga cengatan te curup paéng diha hanang bora run, maik sanggéd cao-ca ciri paéng cama laings.
33Agu ali kuasa mésé, sanggéd rasul téing saka-si latang te mosé kolé de Mori Yésus agu sanggéd taung isé mosé oné widang do de Mori Keraéngs.
34Toé kéta manga ata géongn oné mai isé, ai sanggéd ata situt manga tana agu mbarud, pikas borad situ, agu cird oné mai pika situ ba taungs
35agu na’a olo mai wa’i de sanggéd rasul, poli hitu pati-péars oné sanggén ata lorong agu sékékd.
36Nenggitu kolé hi Yosép hitut le rasul-rasul caron hi Barnabas, ngong anak lémbu, cengata ata Lewi, ata loas oné Siprus.
37Hia pika uma decuk run, og ba séngn situ agu na’a olo mai ranga de sanggéd rasul.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel