Alkitab Mobile SABDA
[VER] : [MENTAWAI]     [PL]  [PB] 
 <<  Matius 13 >> 

1Gogoi nia nenda leú et, tui nia Jesus, ikaddiuaké lalep, ei nia mukuddu ka bet-bet koat.

2Kalulut igidda sirimanua sipurut nia, ei nia ka bagat abak mungantoman. Tápoi ka sia geti sirimanua simigi, ai lé sia muririó ka bet-bet koat.

3Iageti tiboinangan sangamberinia ka matadda Jesus, ka pasikat. pelé nga-ngania, "Ai sara sirimanua sieei masikarap'aké karamen.

4Ai nia mangangarap, belé bagei ka talagat enungan. Iageti oinangan leú ka sia umá, pakominangan leú karamen néné, pat sappru.

5Oto ai leú bagei karamen sibebelé ka polak simabukkú, goisó lé polaknia. Bulat tá tedda kua ruei nia iputútú karamen, kalulut taimaigit polaknia.

6Tápoi kelé imakaddat sulu, malajúnangan leú et letinia, iageti magaraknangan leú et, lepá attei, tá poí makeru ungatnia.

7Oto ai leú bagei karamen sibebelé ka talagat rui. Kelé itaddaaké ka sia iputútú rui, teinangan karamen néné, pat attei.

8Tápoi ai leú bagei sibebelé ka polak simagabru. Tá mauju pubuanangan; ai sangotu igit nganbénia, ai siaili enem ngapulu, ai leú et siaili telu ngapulu, igit ngambénia."

9Oto lepána lé aitiboi pasikat néné, Jesus, kuanangan ka matadda sirimanua simigi, "Kasei simaarep piú, kau iarep'aké nia!"

10Lepá oirangan leú et sipasiului ka tubut Jesus masikua ka matania, pelé nga-nganda, "Pasikat lé kodda nukakau masipatiboaké sirimanua simigi?"

11Iageti aleginangan nia Jesus, kuanangan ka matadda, "Ka kam poí atuakéan panguruat, bulé nuagai kam keleat Taikamanua, iaté pagalaiat Purimataat Taikamanua. Tápoi ka sia geti ka sabagei, tá atukau.

12Aipoí kasei ai, tukakau peilé mitsá simakopé igi ka tubunia, bulé ipulegei. Tápoi ka sitá anai apa pá geti, tupaaalaki peilé sipulelegei goisó nenda ka tubunia, bulé isappru.

13Iaté lulunia kupupapasikat ké manibo aku ka tubudda sirimanua simigi. Aipoí kenanen makoinong matadda, tápoi kelé tá raiitsó; kenanen maarep piúra, tápoi kelé tá raaarep samba tá isasaksak ka bagadda.

14Amuailingan kelé ka sikuat Nabi Jesayas, sipasikukua kisé, áikua Taikamanua; Mariu-riu lé rapasiarep tápoi tá ikokolou ka bagadda; airariritúaké tápoi tá raagai apa sipuaaili.

15Makelá lé poí paatuatda sirimanua néné, amatakkep'an piúra samba arauneng'akéan matadda. Aibara kelé néné geti, iaté, bulé buí imakoinong matadda, samba bulé buí imaarep piúra, bulé buí imakolou ka bagadda buían rasok-sok nia mitsá ka tubukku oto bailiu aleakékungan sia.'"

16Iageti kuanangan ka matadda sipasiuluinia Jesus, "Tápoi bulat mauktuk kam ka kam, aipoí bulat anuitsóan kam, samba bulat anuarep'an kam.

17Aipoí bulé nuagai kam nia, bulat tá te magulai sia tai nabi samba sia simaroipo baga siburú amasibesíaké masiitsó kelé siitsómui ka kam kineneiget, tápoi bulat beri itsóra nia. Arabesíaké masiarep kelé siarepmui ka kam kineneiget, tápoi bulat beri arepda nia."

18"Arep'aké kam kukua katukolobat pasikat sipasikakarap'aké karamen.

19Karamen sibebelé ka enungan, iaté tupasikat'aké ka tubudda sipasiaarep Katuareman Simaerú, siorak pagalaiat Purimataat Taikamanua. Tápoi tá makokolou ka bagadda. Amoi poí Sanitu masirau-rau karamen sikarap'akenen ka bagat paatuatda.

20Karamen sibebelé ka polak simabukkú, iaté tupasikat'aké ka tubudda sipasiaarep Katuareman Simaerú. Bulat arepda lé nia, silórangan nia ka angkat baga.

21Tápoi kalulut Katuareman Simaerú sisilóra néné, tápei amuungat ka bagat paatuatda, bailiu tá matom. Kelé ibara pugejaat baga, elé paoreat ka tubudda kalulut katuareman simaerú nenda, bulat tá mauju rasik-sik tei-teira muarat.

22Iageti karamen sibebelé ka talagat rui, iaté tupasikat'aké ka tubudda sipasiaarep Katuareman Simaerú, tápoi ai lé sia mukakarat baga ka purimanuaiatda, kalulut obára mukayo. Bailiu teinangan Katuareman Simaerú siarepra néné, pat taipubuanangan leú et.

23Tápoi karamen sibebelé ka polak simagabru geti, iaté tupasikat'aké ka tubudda sipasiaarep Katuareman Simaerú. Arepda lé nia, makolounangan ka bagadda. Pureddetnangan buadda, ai siaili sangotu, ai leú siaili enem ngapulu, tápoi ai leú siaili telu ngapulu igit ngambénia."

24Lepá tiboinangan mitsá sara pasikat, Jesus ka matadda sirimanua simigi, kuanangan, "Purimataat Taikamanua geti, makeré lé nia kelé ka pasikat néné: Ai sara sirimanua sieei maksikarap'aké karamen simaerú ka monenia.

25Oto soibó, ai sia memerep sangamberidda, einangan leú et ka sia saggak sigalai mone néné, ikarap'aké karamen soa-soat ka talagat gandum; lepá tuinangan leú et.

26Kelé aipuurau siureman néné, taddaakénangan leú ibela bobotsoketnia. Oto ka sia soa-soat leú, toilá.

27Iageti oirangan leú sipugagalai siupaji ka tubut sibakkat mone, masikua ka matania, 'Kipa, tá uremen simaerú anukarap'aké ka monem, Tuan? Kipa aigalai aibara sedda soa-soat?'

28Pelé nga-ngan sibakkat mone néné ikua ka matadda, 'Sikarap'akenenda lé saggakta.' Iageti kuaddangan nia mitsá ka matat sibakkat mone, pelé nga-nganda, 'Kipa, Tuan, nuobá leú kuei kai masiburau soa-soat nenda?'

29Kuanangan ka matadda sibakkat mone néné, 'Báan leú eei kam, aipoí ké mei kam masiburau soa-soat, babara taiaagaietmui paburagimuian gandum.

30Eddangan nia iputútú ka sia soa-soat, raputútú ruadda gandum, teret iaili gogoi pasimoneiat. Ai leú kukua nia ka sipasimomonei: Rurúaké kam boikí soa-soat. Oto ké alepáan nuappraaké kam nia, labóakémuian nia ka api. Alepáan geti nupalaboki kam soa-soat, iapeité nururúaké kam buat gandum, koiríakémuian nia ka bagat sapou.'"

31Lepá mitsá tiboinangan sara pasikat ka matadda sirimanua simigi, Jesus. Kuanangan ka matadda, "Ka sia Purimataat Taikamanua, makeré lé nia kelé ka pasikat néné: Ai sara sirimanua sialá sangambé luikut ubé, ikarap'aké nia ka monenia.

32Luikut ubé néné, iaté sara karamen bulat simakopé goisot ngambé. Tápoi kelé aiputútú, puuraunangan, pat niangan lé abeu ka pagule-gulei bagei. Bebbeunan loinánia, pat einangan leú umá murumun ka rannia."

33Ai leú mitsá sara pasikat aitiboi Jesus, ka matadda, "Ka sia Purimataat Taikamanua, makeré lé nia kelé ragi, sialat sara sinanalep, ipagalú nia ka siepat ngapulu ngaliter tapung, teret ipugoó sangamberinia!"

34Sangamberinia ngantoman Jesus sarat ka pasikat lé itiboi nia ka tubudda sirimanua simigi.

35Bulé ipuaili kelé ka siniboira tai nabi, sipasikukua kisé, "Mupasikat lé kugagalai, masipatiboaké sia kupoiliat sangamberinia simalipput barana ka panandaat polak peilé."

36Lepá kaddiuakénangan sia sirimanua simigi, Jesus, gurú nia ka bagat lalep. Iageti oi sipasiuluinia kuaddangan ka matania, "Kolouaké peité ka kai bagat pasikat soa-soat ka talagat gandum."

37Iageti kolouakénangan nia, Jesus, kuanangan ka matadda, "Sipasikakarap'aké karamen simaerú iaté, Togat Manusia.

38Mone, iaté, polak néné. Karamen simaerú, iaté sia situgugurú ka paamian Taikamanua. Soa-soat, iaté sia simaré-ré ka Sanitu.

39Saggak sipasiuurep soa-soat, iaté Sanitu. Pasimoneiat, iaté Kalepakat Polak. Sipasimomonei, iaté samalaika.

40Kelé kipa itururúaké soa-soat bulé itulabóake ka api, kisedda leú te muaaili ka Gogoi Sialu.

41Ikokoiniaké te sia samalaikania Togat Manusia, masirurúaké ka talagadda sapaamiannia, sipasitutubbui bagadda sirimanua mugalai jo, samba sia leú sabagei sangamberidda sigalai jo.

42Sangamberidda néné, turiribbaiaké ka purusuat sibara api sipujujuluu; oto sedda te rapusosou samba rapangongorik.

43Tápoi sia geti, sigalaiaké siobat bagat Taikamanua, mutotoro tubudda kelé matat sulu, ka Laggai Sibau; Laggai Taikamanua Ukkuira. Oto kasei simaarep piú, arep'akénangan leú et nia!"

44"Ka sia geti Purimataat Taikamanua, makeré lé nia ka pasikat néné: ai bibilet silabbú ka polak, sikukuddu ka mone, lepá sesenangan niaté sara sirimanua. Kelé aisese nia, labbúnangan nia mitsá ka polak. Lulut kopet angkat bagania, einangan leú et masisakiaké sangamberi bibiletnia. Lepá sok-soknangan nia mitsá, isaki polak nenda."

45"Ka sia geti Purimataat Taikamanua makeré lé nia ka pasikat néné: Ai sara sipajajaga, sieei masigaba inu mutiara simakopé kepput saki.

46Kelé aisese sara inu mutiara bulat simakopé lainge, ei nia masisakiaké sangamberi bibiletnia, iageti sakinangan nia mutiara nenda."

47"Ka sia geti Purimataat Taikamanua, momoi tupasikat'aké nia kelé ka sara jalo, sijaloakenen ka koat; sialá sene ngamata iba.

48Kelé aisut jalo nenda, tiktikrangan nia jalo nenda sipasiiba ka leleu. Lepá uddet sia masipiliy paiba-iba nenda: Iba simaerú rakau ka bagat garágá, tápoi iba sikataí geti, raribbaiaké lé.

49Kisedda leú te, ké iaili Gogoi Sialu. Oi samalaika masipasaraaké sirimanua sikataí paraboat, ka sirimanua sigalaiaké siobat bagai Taikamanua.

50Iageti sirimanua sikataí paraboat, turibbaiaké ka bagat purusuat sibara api sipujujuluu. Oto sedda te rapusosou samba rapangongorik."

51Iageti kuanangan ka matadda, Jesus, "Amakolouan ka bagamui sangamberinia sikuakku néné?" Alegiddangan nia, pelé nga-nganda, "Amakolouan ka bagamai, Ukkui!"

52Oto kuanangan mitsá ka matadda sipasiuluinia, Jesus, "Iaté lulunia, sangamberidda tai guru paamianda tai Jahudi, situgugurú ka paamian Taikamanua, tupakeréaké lé sia kelé ka sara tuan sipasibebelaaké bibiletnia simabau sambat bibiletnia simaburú, sibara ka bagat sapounia."

53Kelé ailepáaké aitiboi sene ngamata pasikat, Jesus, tui-tui nia sedda,

54toili nia ka laggai puuragatnia. Oto einangan leú et mungantoman ka uma parurukatda tai Jahudi. Bulat kisei lé ka bagadda raarep ngantomannia. Pelé nga-nganda ka tubunia, "Kaipa te aisese pusoppinannia kelé néné? Samba kaipa te aibara gege ka tubunia ipasigalai kerek?

55Tá poi nia néné togat Josep situkang loiná? Tá poi si Maria inania; samba tá poi sasarainania sipuoni si Jakobus, si Josep, si Simon samba si Judas?

56Tá poi ai sia sené ka sia samaniunia? Kaipa aisese nia sangamberinia néné?"

57Oto taiobárangan masisiló kaooi Jesus. Iageti kuanangan ka matadda Jesus, "Ka palagga-laggai bagei rahohormati sia tai nabi, tápoi taikalaggaiatnia samba sia sikukuddu ka bagat lalepnia geti, tá."

58Kalulut néné, taigalainangan maigi kerek sedda, tá poí matonem bagadda ka tubunia.



 <<  Matius 13 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran