Alkitab Mobile SABDA
[VER] : [MEYAH]     [PL]  [PB] 
 <<  1 Korintus 10 >> 

1Erek koma jefeda edohuji, iwa idou ah keingg rot mar koma ongga mifmin mimower runtunggom gij mona ongga rua ruroru Musa jeska monuh Mesir ojgomu. Rua rik erek mocgoj ofog egens ongga Allah engker gij eja okag rot rua. Noba askesi rua ruira gij mei mojumu efei ekeni oforga, beda Allah ekeba mei mojumu efei koma fogora emah jeska. Jefeda rua ruira gij mei mojumu efei koma ojgomuja onjoros rinjesaga jah enama rot rifena ebah nomnaga.

2Noba erek rusnok rita baptis erek orocunc rot oida rua ruroru Yesus fob, beda mar insa koma nomnaga bera ongga erek orocunc rot oida mifmin mimower ruroru Musa fob.

3Beda rua nomnaga rit maat ongga onjuj jeska mebaga morototuma ojgomu.

4Noba rua rij mei ongga orogna jeska mamu egens koma ojgomuja. Mei ongga orogna jeska mamu koma bera erek mar onswos egens ongga Allah ontunggom nou rua. Mamu koma erek orocunc rot Kristus esinsa ongga eja okag rot rua ojgomuja. Koma erek, gij mona kahma beda Tuhan Yesus emeita eiteij ah gu efen rusnok ojgomuja erek mamu koma eita mei gu rusnok insa koma ojgomuja.

5Allah ontunggom mar insa koma nomnaga rot rua fob, tina Ofa odou eneskeira rot rusnok koma rineya guru, jeska rua runougif gu Ofa efen oga guru. Jefeda rusnok koma ragos suma suma gij mebi ongga oska koma ojgomuja.

6Mar insa koma nomnaga bera erek orocunc nou mimif tein rot oida mimif mut joug mudou efesi rot ahais ojgomuja jeskaseda mudou eneftirir keingg mar ongga oska erek rua insa koma rutunggom sis fob guru.

7Mimif munougif gu mar ongga oska erek mifmin mimower rutunggom sis fob guru. Koma bera erek runggu gij Mar Efeyi Ebsi sis fob oida, "Rusnok koma ruina maat eteb keingg fogora rugif gu mar egens ongga oska ojgomu. Rua rit maat ni, rij anggur efei ofoukou ni, noba ruka gij mebi rejrej mar ongga oska koma ojgomuja."

8Mimif tein minesiri morototuma erek rua insa koma rinsiri gij mar ongga oska sis fob guru. Jeska rua rutunggom mar erek koma, jefeda gij mona egens bera rusnok ribu setka egeka noba orgomu jeska rua ragos rot ojgomuja fob.

9Erek koma noba mimif tein minereneni Tuhan ojgomuja onjoros Ofa otkonu oska rot mimif guru. Koma erek mar ongga rineya jeska mifmin mimower insa koma runtunggom sis fob. Jefeda Ofa ensa magosu womfieda ofoukou skoita rua jeskaseda eska rua fogora ragos rot rerin mar ongga oska ongga rua runtunggom insa koma.

10Noba mimif tein muga enerahah skoita Allah rot mar ongga Ofa eita gu mimif erek rua insa koma runtunggom sis fob guru. Jeska rua rutunggom mar erek koma jefeda Allah ombk efen malaikat egens ongga efen owesa efek eteb skoita rua fogora ofa agob rua.

11Mar kef nomnaga ongga encirej rua bera erek orocunc nou mimif gij mona ongga ebeibeyaif ojgomu. Noba mar ongga nabi-nabi runggu rot gij Mar Efeyi Ebsi bera erek ereisisi joug mimif ongga mimfena ebah gij mona insa kef ongga doida mona ongga enja ejgwaga.

12Jefeda erek osnok egens esitit esinsa efaga rot oida ofa bera ororu Allah oga rot ahais fob, beda ofa osujohu rot mar erek iskusk ojgomu jeskaseda ofa enesiri gij mar ongga oska guru. Jeska erek ofa onosujohu rot iskusk guru, beda ofa emesiri gij mar ongga oska erek mifmin mimower ongga runroru Musa sis fob.

13Didif dagot mar erek koma jeska orofosutut mar ongga ereneni iwa bera ereneni rusnok nomnaga gu mebif ojgomu. Noba gij mona ongga mar ereneni iwa, beda Allah omofij iwa jeni erek Ofa anggen rot sis fob si. Koma bera, Ofa onorons mar okum ongga ereneni iwa ojgomuja onjoros mar okum eteb ah nou iwa guru. Tina Ofa emeita owesa efek gu iwa jeskaseda iwa ita idou ahais rot ojgomuja onjoros mar ongga ereneni iwa koma omoisa fog si.

14Edohuji ongga dudou okora rot, iwa ibes ifaga yes jeska mar ongga tenten guru ongga rusnok enjgineg rugif gu.

15Didif dagot mar erek koma gu iwa ongga idou ebriyi gij mar ongga tenten fob ojgomu. Jefeda iwa isujohu rot oida mar ongga didif dinagot insa kef bera erek tenten ei era gurei.

16Iwa isujohu rot mar ongga didif danggot ainsa kef rot rua ongga rugif gu mar ongga oska ojgomu. Jeska gij mona ongga mimif mij anggur efei morototuma jeskaseda murois oufamofa gu Yesus Kristus rot efen ogufu ongga eya tumu mega salib nou mimif, beda koma tein erek orocunc rot oida mimif muira gij rusnok ebic egens ojgomu fob. Erek koma tein, gij mona ongga mimif mintka roti erek misisi keingg misinsa rot Yesus efaga ongga anggos tumu mega salib nou mimif, beda koma tein erek orocunc rot oida mimif muira gij rusnok ebic egens fob.

17Noba mimif ongga mufoukou mintka roti ofog egens ojgomu. Beda erek koma tein, Yesus efen efaga egens, noba mimif ongga mufoukou bera ebiedi erek egens oisouska Yesus efaga egens koma ojgomu. Koma jeska mimif mintka roti ofog ongga egens ojgomu.

18Noba gij mona ongga rusnok Yahudi rit maat morototuma ongga rua rira fogora rurougif gu Allah rot, beda koma erek orocunc rot oida rua rija erek egens gij Allah fob.

19Erek koma tina, didif dinagot oida mar koma ongga rusnok enjgineg rugif gu bera erek tenten guru. Noba didif dinagot rot oida marska ongga rua insa rira fogora rirejiteyi gu mar koma bera erek ofoufem guru.

20Mar ongga didif danggot bera erek kef oida, rusnok enjgineg koma rira marska fogora rirejiteyi gu mar ongga rua rusujohu rot bera erek Allah. Tina ongga tenten bera gij mona insa koma rua rurougif gu efena ofogog jera rudou ongga osumsumu rot ojgomu. Noba didif dunodou os oida iwa it marska ongga rusnok rira fogora rirejiteyi gu efena ofogog morototuma jera rua guru. Jeska koma bera erek iwa ija erek egens jera efena ofogog insa koma ojgomu fob.

21Giskini gij mona juens bera iwa ij anggur efei morototuma jeskaseda ireisisi keingg isinsa rot meidu ongga Tuhan ontunggom nou iwa, beda iwa tein ija erek egens morototuma jera Ofa. Noba gij mona ongga egema deika bera erek iwa ij anggur efei morototuma jera rusnok enjgineg ongga rira anggur efei koma fogora rirejiteyi gu efena ofogog. Jefeda iwa ija erek egens jera efena ofogog koma tein. Tina enadaij nou iwa ija erek egens jera Tuhan noba ija erek egens jera efena ofogog tein jinaga guru. Erek koma tein rot mona ongga iwa intka roti jeskaseda ireisisi keingg isinsa rot Tuhan, beda iwa ija erek egens jera Ofa. Jeska erek iwa tein it maat morototuma jera rusnok enjgineg ongga rira maat koma fogora rirejiteyi gu efena ofogog insa koma, beda iwa tein ija erek egens jera efena ofogog koma ongga rua rugif gu. Tina enadaij nou iwa ija erek egens jera Tuhan noba ija erek egens jera efena ofogog tein jinaga guru.

22Erek mimif mutunggom mar erek koma, beda Allah odou ejisei rot mimif fogora emeita okum gu mimif. Noba mifmin owesa efek enadaij nou munsuwa misinsa jeska mar ongga okum koma jinaga guru. Jefeda iwa inoromohohuma jera mar ongga oska erek insa koma guru.

23Rusnok ragot oida, "Adaij nou mimif mutunggom mar meidu ongga mimif mudou os rot ojgomu ongga erek Allah eneyahehir joug rot guru." Koma bera tenten, tina mar koma eneya bera onoufa nou mimif guru. Noba erek mimif mita mar koma ojgomu, beda koma onofij rusnok enjgineg ongga rik rot mar insa koma jeskaseda ruroru Yesus rot ahais tein guru.

24Enadaij nou osnok egens osujohu rot teinefa ofa eita eiteij ah ongga ongkoska rot esinsiyai ojgomuja guru. Tina ongga oufa bera ofa osujohu rot teinefa ofa ofij efen mohujir jeskaseda rua tein rita riteij ah ongga ongkoska ojgomuja.

25Mar ongga didif dimfesij rot insa kef bera erek kef oida, maat meidu ongga angh gu pasar bera iwa ingk noba it ojgomu. Tina iwa inejeka gu rusnok ongga runghu maat koma rot oida maat koma bera rira fogora rirejiteyi gu mar ongga oska sis fob ei era gurei. Ineita erek koma jeskaseda idou eneineina gij maat koma guru.

26Jeska mar egens ongga angh gij Mar Efeyi Ebsi agot rot oida, "Allah efen mebif jera mar ongga angh gij nomnaga." Jefeda mar koma nomnaga jera maat insa koma tein bera oufa nou iwa, jeska iwa irek Allah efen rusnok.

27Noba erek osnok egens erejgei iwa jeskaseda ija noba et maat morototuma jera ofa, noba idou os rot, beda iwa it maat meidu ongga ofa encka gu iwa ojgomu. Noba iwa inejeka gu ofa rot maat koma oida sis fob bera rua rimera maat koma fogora rirejiteyi gu mar ongga oska fob ei, era gurei, iwa ineita erek koma guru.

28Tina erek osnok egens ongga Kristen ek iwa it maat koma morototuma jera rusnok insa koma, beda ofa agot gu iwa oida, "Maat koma bera rusnok rira fogora rirejiteyi gu mar ongga oska sis fob. Jefeda maat koma erek mar ongga oska ojgomu." Beda iwa inet maat koma guru, tina yugif gu yeyin yuhuj egens koma ojgomu. Jeska maat koma enjerek mar ongga ofa osujohu bera erek oska fob.

29Erek iwa ijginaga fob oida maat koma bera rusnok rira fogora rirejiteyi gu mar ongga oska sis fob, tina iwa it maat koma ojgomu, beda enadaij nou rusnok ragot oida iwa intunggom mar ongga oska jinaga guru. Tina jeska yeyin yuhuj insa koma osujohu rot oida maat koma erek mar ongga oska, beda iwa inet guru. Ongga oufa bera yugif gu yeyin yuhuj egens insa koma rot ojgomu.

30Gij mona ongga didif duis oufamofa gu Allah rot maat ongga didif dusujohu bera onoska guru fogora dimet, beda enadaij nou rusnok enjgineg ragot oida didif dutunggom mar ongga oska fob jinaga guru.

31Jefeda, adaij nou mimif mutunggom mar meidu ongga mimif mudou os rot ojgomu noba ongga Allah eneyahehir joug rot guru. Erek koma, tina ongga ofoufem ekirsa bera gij mar ongga mimif mutunggom erek mit maat ni, era mij anggur efei ni, era mar meidu meidu ongga mimif mutunggom ni, beda mimif mita mar koma rot tenten ojgomu. Mimif mita erek koma jeskaseda rusnok enjgineg rimek tumu mimif fogora rumofra Allah ofoka erek aksa rot mar koma nomnaga.

32Iwa ineita mar egema tein ongga orotunggom rusnok fogora risiri gij mar ongga oska guru. Koma bera rot rusnok ongga Yahudi, jera rusnok ongga Yahudi guru, jera rusnok ongga ruroru Yesus Kristus tein.

33Iwa ita mar erek didif, jeska didif bera direneni jeskaseda mar nomnaga ongga didif duntunggom bera ereita rusnok nomnaga rudou eskeiramera rot ojgomuja. Noba didif dineita mar erek koma nou disinsiyai ojgomu guru, tina didif dita mar erek koma rot rusnok rufoukou jeskaseda Allah omosuwa rua jeska rerin mar ongga oska.



 <<  1 Korintus 10 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel