Alkitab Mobile SABDA
[VER] : [MEYAH]     [PL]  [PB] 
 <<  1 Korintus 9 >> 

1Erek koma noba rot mar ongga oska ongga rusnok enjgineg ranggot rot didif fob bera duroun gu rua rot mar erek kef: Rusnok enjgineg ragot oida didif bera enerek rasul egens ongga tenten guru. Tina didif bera dik Yesus Kristus gu diteij fob, fogora dinjerek rasul egens ongga tenten ojgomu. Noba iwa ijginaga rot oida mar koma bera erek tenten ojgomu. Jeska oisouska mar ongga didif dumftuftu jah gu iwa ifekesa bera rusnok rik rot oida didif dimfarur gij mar nou Tuhan erek efen rasul egens fob si.

2(9:1)

3(9:1)

4Jefeda memef ongga rasul bera mosujohu rot oida adaij nou iwa yufij memef tein rot maat gij mona ongga memef memfarur nou Tuhan gu ifekesa.

5Noba adaij nou mefmen mohoner tein ongga ruroru Yesus fob jeskaseda ruroru memef jah suma. Jeska rasul enjgineg jera Tuhan efen mokosa jera Petrus tein bera ruroun rerin ruhoner morototuma ojgomu.

6Era, erek iwa osujohu rot oida didif jera Barnabas bera mafarur rot mar ongga macosu rot ojgomu, noba rua ongga rasul rineya bera gurei.

7Tentarer runohca fifi sismeni fog jeskaseda rifarur gij rerin mar erek tentarer guru. Tina rusnok enjgineg rita mar insa koma gu rua erek rerin rufons rot ojgomu. Noba osnok egens ongga emfarur gij mekeni bera ejginaga rot oida ofa tein emeita maat jeska mekeni koma ojgomu si. Noba osnok egens ongga emfa sapi bera emesma marska jeska sapi insa koma si. Jefeda teinefa rot memef ongga memfarur nou Tuhan jah gu ifekeso.

8Mar ongga rusnok mebif rusujohu rot bera erek koma ojgomu. Tina mar ongga didif danggot ainsa koma bera angh gij Mar Efeyi Ebsi tein fob.

9Jeska Musa anggot rot hukum egens erek kef oida, "Askesi sapi emfarur ros, beda rusnok runoku maat jeska sapi koma awesi guru." Noba Allah enagot rot mar insa koma gu Musa jeska odou okora rot sapi koma ojgomu guru.

10Ongga tenten bera Ofa anggot rot mar insa koma erek orocunc nou mimif nomnaga. Jeska gij mona ongga rusnok rif mar gij mekeni, beda rudou ot rot oida rua rimesma maat jeska mekeni koma si.

11Jefeda didif dusujohu rot oida erek memef momftuftu iwa rot Allah oga fob, jefeda adaij nou memef mesma mar erek maat tein jeska iwa rot ojgomu.

12Erek rusnok rineya rusujohu rot oida rua rimesma maat jeska iwa si, beda adaij nou memef, ongga moftuftu mar jah gu iwa ifekesa rot sismeni, misma tein ojgomu. Memef mefmen owesa efek jeskaseda mesma maat jeska iwa, tina memef meneradgodu iwa rot guru. Ongga tenten bera memef moin keingg modou efesi rot ahais gij mona ongga memef mocosu rot mar ojgomu. Memef meita mar erek koma jeskaseda meneragou joug iwa erek oskiyai rot moroju ongga omoroun iwa skoita Yesus Kristus efen oga ongga oufamofa tein guru.

13Edohuji, iwa ijginaga rot fob oida rusnok ongga rufij imam-imam Yahudi gij Mod Allah efesi bera risma maat jeska rusnok ongga rurka maat skoita Mod Allah ojgomu. Noba imam-imam ongga riris marska insa koma esij mebera erek mar ongga rurougif gu Allah rot bera rit marska insa koma eneya tein ojgomu si.

14Erek koma tein sis fob bera Tuhan anggot rot oida rusnok ongga rurka Allah oga ongga oufamofa skoita rusnok enjgineg bera rimesma rufons jeska rusnok insa koma tein ojgomu.

15Didif tein dedin owesa efek erek rasul egens jeskaseda risma mar insa koma tein, tina didif dineradgodu iwa rot jinaga guru. Jeska erek didif duis gu iwa rot fifi era mareibra beda enadaij nou didif difesij gu rusnok enjgineg rot oida didif dimfarur jah gu ifekesa jeskaseda dufij iwa ojgomu erek koma guru. Noba koma bera erek mar egens ongga didif dudou erirei rot ojgomu.

16Erek koma tina, gij mona ongga didif duftuftu rot Allah oga ongga oufamofa gu iwa, beda enadaij nou didif disitit disinsa difaga rot guru. Jeska Yesus Kristus bera ongga ombk didif jeskaseda dutunggom mar koma. Noba erek didif dunororu mar koma guru, beda mar okum emen skoita didif rot.

17Erek didif duftuftu rot Allah oga jeska disinsiyai dudou os rot ojgomu, beda didif dumois rot dedin dufons skoita rusnok ojgomu. Tina didif dineita mar erek koma guru, jeska Yesus Kristus bera ongga ombk didif jeskaseda difesij rot efen oga gu rusnok. Noba didif dutunggom mar erek koma rot iskusk ojgomuja.

18Erek koma jefeda didif duftuftu rot Allah oga ongga oufamofa ojgomuja. Noba didif dinera dedin owesa efek erek rasul egens fogora durois gu rusnok rot mareibra eneya guru. Didif dumfij iwa jeni Yesus Kristus ondou os rot ojgomu, noba dunois rot mar egema tein jeska iwa rot guru. Koma bera ongga ereita dudou efesi erirei rot morototuma erek rusnok rudou erirei gij mona ongga risma rerin rufons.

19Didif dut gu disinsa jefeda enadaij nou rusnok enjgineg tein rubk didif rot mar guru. Erek koma tina didif duncunc disinsa erek osnok egens ongga omfij rusnok nomnaga. Didif duntunggom mar erek koma jeskaseda duroku rusnok rufoukou rudou efesi skoita Kristus fogora rumororu Ofa ojgomu.

20Koma bera, gij mona ongga didif duftuftu rot Allah oga ongga oufamofa gu rusnok ongga Yahudi, beda didif tein dita mar erek rua ongga Yahudi jeskaseda duroku rerin rudou efesi skoita Yesus fogora rua ruroru Ofa. Noba erek rusnok runororu hukum Musa guru, beda didif dusujohu rot oida koma enerek oska guru. Jeska didif bera dut gu disinsa ojgomu rot fob. Erek koma tina, didif duroru hukum Musa morototuma erek rusnok ongga Yahudi ruroru ojgomu, jeskaseda duroku rudou efesi skoita Kristus fogora rua tein rumororu Ofa.

21Erek koma tein didif tein dita mar morototuma erek rusnok ongga Yahudi guru rit mar jeskaseda duroku rudou efesi skoita Kristus fogora rua tein rumororu Ofa. Erek koma tina didif dinaha hukum Allah koma jah guru, jeska didif duroru Yesus Kristus oga fogora dija erek efen rusnok fob.

22Gij mona ongga didif duftuftu rusnok ongga rudou enebriyi gij mar ongga tenten jera mar ongga oska rot iskusk enesi, beda didif dunofra disinsa dufoka erek osnok egens ongga odou ebriyi eteb gij mar erek eteb fob guru. Tina didif diker erek egens morototuma jera rua insa koma ojgomu jeskaseda duroku rua rudou skoita Kristus. Didif dija erek egens morototuma jera rusnok ebic egens egens jeskaseda gij mar koma nomnaga bera duroku rineya rudou efesi skoita Kristus fogora rua tein ruroru Ofa. Noba Ofa omosuwa rua jeska rerin mar ongga oska.

23Didif dutunggom mar erek koma gu rusnok ebic nomnaga jeskaseda rua rimeg rot Allah oga ongga oufamofa. Erek koma beda didif dimesma dufons ongga oufamofa eteb ongga Allah anggen gu efen rusnok nomnaga morototuma jera rusnok insa koma tein si.

24Iwa ongga Korintus ijginaga rot fob oida gij mona ongga rusnok rufof riremeteima rot rufons beda rua ongga rufof rot iskusk ojgomu bera ongga rimesma rufons rot si. Jefeda erek rusnok insa koma ongga rumfof rot iskusk, beda iwa tein ireneni rot iskusk gij mar ongga iwa itunggom nou Allah jeskaseda iwa tein imesma yeyin yufons jeska Ofa.

25Rusnok ongga rufof riremeteima rot rufons bera risejah risinsa rifaga rot iskusk sismeni fog. Rua rutunggom mar erek koma jeskaseda gij mona ongga rua rumfof riremeteima, beda rua rimesma rufons si. Tina rufons koma bera erek mar ongga enah aibin guru. Erek koma tina, mimif ongga Kristen bera misejah mudou efesi rot iskusk ojgomuja jeskaseda gij mona kahma, beda mimif mimesma mifmin mufons ongga erek mar ongga ah aibin ojgomuja.

26Erek koma tein, rua ongga rumfof riremeteima runofof erek ebireira guru. Noba rua ongga rahaisomu nou rumobuma bera rireni jeskaseda rubu rot iskusk ojgomu. Rua runobu erek ebireira guru. Erek koma jefeda didif tein direneni jeskaseda dutunggom mar nou Allah rot iskusk ojgomu, noba dunotunggom mar erek ebireira guru.

27Didif dagei dudou efesi rot ahaismes ojgomuja jeskaseda dutunggom mar ongga ofoufem rot Allah ojgomu. Noba didif dunotunggom mar ebireira ongga disinsiyai dudou os rot guru. Jefeda didif tein dita difera okora oskiyai rot mar insa koma. Noba didif dutunggom mar erek koma jeskaseda gij mona ongga didif duftuftu rot Allah oga fogora rusnok rufoukou ruroru Yesus Kristus fob, beda didif dedin dufons eneseiseifa jeska didif jinaga guru.



 <<  1 Korintus 9 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel