Alkitab Mobile SABDA
[VER] : [MEYAH]     [PL]  [PB] 
 <<  1 Tesalonika 3 >> 

1Memef mereneni jeskaseda menja skoita iwa, tina guru. Jefeda memef mosujohu rot oida memef meker gu mesinsa gij kota Atena ojgomu.

2Tina memef mobk mefmen mohuj Timotius skoita iwa. Ofa bera mefmen mohuj egens ongga ejefesij rot Allah efen oga gu rusnok enjgineg tein. Ofa en skoita iwa jeskaseda eisisi joug iwa fogora imororu Yesus rot tenten deika ojgomuja.

3Ofa omoftuftu iwa erek koma jeskaseda gij mona ongga mar okum ereneni iwa deika, beda iwa imot rot ahais gij ojgomuja. Noba iwa isinsa ijginaga rot oida mar okum insa koma bera en oisouska Allah odou ejginaga rot fob.

4Gij mona ongga memef men skoita iwa deika fob, beda memef memagot gu iwa rot oida mar okum ereneni mimif nomnaga si. Noba ebeibeyaif iwa ik rot oida mar okum insa koma bera ereneni mimif fob.

5Erek koma jefeda didif dumbk Timotius skoita iwa jeska didif dudou efeneinei eteb rot iwa ojgomuja. Noba didif dudou os dijginaga rot oida iwa iroru Yesus rot ahais ojgomuja ros ei era gurei. Jeska didif dimeesa rot oida iwa insiri gu Bilis fogora inororu Yesus rot ahais deika guru. Beda mar ongga memef moftuftu gu iwa enja eseiseifa, tina guru.

6Erek koma, tina ebeibeyaif Timotius ongksons en skoita memef jah sif fob. Noba ofa emfesij gu didif rot oida iwa iroru Yesus rot tenten ros noba idou omokorema ojgomuja. Ofa emfesij gu didif rot oida iwa idou oubsaha rot memef tein, noba iwa idou os ik memef deika tein morototuma erek memef modou os mek iwa deika tein.

7Mar ongga Timotius emfesij gu memef osok gij iwa bera ereita modou efesi erek ahais gij mar ongga memfarur ojgomuja fob. Jefeda erek mar ongga okum ereneni memef tein, tina memef mog mejmeg gij ojgomu.

8Ebeibeyaif memef meita modou ahais jeska iwa iroru Yesus rot tenten ojgomuja fob.

9Jefeda memef mois oufamofa eteb gu Allah jeska iwa iroru Ofa rot ahais ojgomuja. Noba koma bera ongga ereita modou ongga efaga ouka eteb rot ojgomuja.

10Gij orofosutut mona jera motu tein bera memef mom meiteij rot ahais gu Allah nou iwa. Memef mom meiteij erek koma jeskaseda memek iwa deika fogora moftuftu iwa gij mar ofoukou egema dokun deika ongga emeita idou ahais rot tein si.

11Memef mois gu mifmin mika Allah jera mifmin Tuhan Yesus Kristus jeskaseda Ofa omofij memef fogora meja skoita iwa deika.

12Noba memef mois gu Allah jeskaseda Ofa omofij iwa fogora idou omokorema odudu dokun deika ojgomuja tein. Koma morototuma erek memef ongga modou okora eteb rot iwa.

13Noba memef mom meiteij gu Ofa jeskaseda gij mona ongga mifmin Tuhan Yesus Kristus ongksons en jera efen rusnok ongga ebsi komowa fob, beda iwa imot jah Allah odou rot idou ongga ebsi komowa eteb tein si. Ofa onocunc iwa erek rusnok ongga rerin mar ongga oska jinaga guru.



 <<  1 Tesalonika 3 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel