1Mifmin mudou oubsaha jeska Allah odou okora eteb rot mimif fogora Ofa oncunc mimif erek efen efeser fob. Noba koma erek tenten ojgomu. Tina rusnok mebif bera rudou enebriyi gij mar koma guru, jeska rua rinejginaga rot Allah enesi.
2Edohuji ongga dudou okora rot, ainsa kef mimif bera erek Allah efen efeser. Tina gij mona ongga emen bera minejginaga rot oida mijerek teinefa enesi. Erek koma tina mimif mijginaga rot oida gij mona ongga Yesus ongksons en fob, beda mimif mimesma mifaga ongga morototuma erek Ofa tein efen efaga si. Jeska gij mona insa koma bera mimek Ofa rot koisoisa.
3Jefeda rusnok nomnaga ongga ruisum gij Ofa rot mar insa koma bera rimeita rudou ongga ebsi komowa morototuma erek Ofa efen odou ongga ebsi komowa.
4Tina erek osnok egens eita mar ongga oska, beda koma erek ofa engkirsa rot Allah efen hukum tein fob. Jeska mar ongga rusnok rutunggom ongga ekirsa rot hukum Allah, koma bera erek mar ongga oska ojgomu.
5Noba iwa ijginaga rot oida sis fob bera Yesus en jeskaseda osuna mar ongga oska jeska rusnok rudou efesi. Noba iwa tein ijginaga rot oida Ofa esinsa eneita mar ongga oska egema tein jinaga guru.
6Jefeda rusnok ongga rita rudou egens jera Yesus fob bera runororu mar ongga oska deika guru. Tina rusnok ongga ruroru mar ongga oska ojgomuja bera rudou enejginaga rot Yesus enesi. Noba rudou enebriyi gij mar ongga Ofa ontunggom tein jinaga guru.
7Erek koma jefeda, edohuji ongga dudou okora rot erek dedin edeser, yut joug idou efesi rot ahais jeskaseda rusnok runorokrusa iwa fogora itunggom mar ongga oska guru. Jeska rusnok ongga rita mar ongga erek oufamofa bera risma rudou ongga ebsi komowa morototuma erek Yesus efen odou ongga ebsi komowa.
8Tina rusnok ongga rita mar ongga oska ojgomuja bera rirek Bilis ojgomu. Jeska Bilis eita mar ongga oska ojgomuja gij mona ongga Allah otunggom mebif onjoros deisef tein. Noba Allah efen efesa bera en gu mebif jeskaseda ohoda rot Bilis efen mar ongga ofogog nomnaga ojgomu.
9Erek koma tein, idu ongga Allah enjeka erek efen efesa fob bera eneita mar ongga oska ojgomuja deika guru. Tina ofa odou os eita mar ongga oufamofa ojgomu. Jeska ebeibeyaif ofa bera erek Allah efen efesa fob.
10Noba idu ongga eita mar ongga oska ojgomuja, erek odou onokora rot efen mohujir ongga Kristen guru, beda ofa koma bera enerek Allah efen efesa jinaga guru. Mar insa koma bera ongga orocunc rot oida idu ongga erek Allah efen efeser jera idu ongga erek Bilis efen efeser.
11Gij mona ongga iwa inroru Yesus Kristus bera iwa ingg rot oida mimif mita mudou ongga omokorema ojgomu.
12Noba ongga ofoufem eteb bera mineita mar erek osnok egens ongga ofoka Kain eita sis eteb fob guru. Ofa bera Adam efen efesa ongga ororu Bilis ojgomu. Ofa odou ejisei rot efen mokosa jeska mokosa eita mar ongga oufamofa ojgomu, noba ofa eita mar ongga ofogog ojgomu. Noba Allah odou eskeira ekirsa rot ofa efen mokosa. Jefeda ofa agob efen mokosa insa koma rot.
13Erek koma tein, edohuji, erek rusnok mebif rudou oska rot iwa, tina idou onoubsaha rot koma guru.
14Jeska gij mona ongga mimif munororu Yesus enesi, beda mimif tein mirek rusnok ongga rimagos noba rimeja jah mahmei meren ojgomu. Tina jeska mimif muroru Yesus fob, jefeda ebeibeyaif bera mimif mimesma eiteij ah ongga efeinah noba ah aibin si. Mimif mijginaga rot erek koma jeska mudou okora rot mifmin muhujir ongga Kristen ojgomuja. Tina idu ongga odou onokora rot efen mohujir ongga Kristen guru bera enesma eiteij ah ongga efeinah guru.
15Jeska rusnok ongga rudou oska rot rerin ruhujir ongga Kristen bera rirek rusnok ongga ragob rusnok enjgineg ojgomu. Noba iwa tein ijginaga rot oida Allah eneita eiteij ah ongga ah aibin gu rusnok ongga rutunggom mar ongga oska erek insa koma guru.
16Erek koma tina, Yesus oncunc gu mimif fob rot teinefa mimif mita mudou ongga omokorema rot tenten ojgomu. Jeska Ofa agos tumu mega salib jeskaseda oskotu mimif jeska mifmin mar ongga oska. Noba oisouska koma bera mimif mijginaga rot teinefa mimif mita mudou ongga okora rot mifmin muhujir. Jefeda mimif tein misejah mudou efesi rot mifmin muhujir ongga Kristen fogora mufij rua rot meidu meidu ojgomuja onjoros erek magos nou rua tein ojgomu.
17Erek osnok egens efen mareibra ofoukou, beda ofa ocunc odou ongga okora rot efen mohuj egens ongga ofojingki koma fogora ofij ofa ojgomu. Tina erek ofa onofij efen mohuj egens koma ongga ofojingki guru, beda koma orocunc rot oida ofa odou onokora rot Allah erek tenten enesi.
18Edohuji ongga dudou okora rot erek dedin edeser, mimif minagot rot oida mudou okora rot mifmin muhujir ongga Kristen ojgomu guru. Tina ongga oufamofa bera mimif murocunc rot mar insa koma rot tenten fogora mufij rua rot mar ongga rucosu rot tein.
19Erek koma jefeda erek mimif mufij mifmin muhujir ongga Kristen, beda mimif mijginaga rot tenten oida mimif muroru Allah oga rot tenten fob. Jefeda mifmin mudou enemeesa rot Allah guru. Jeska Ofa odou eskeira rot mimif fob.
20Koma tenten, jeska erek mudou ah keingg rot mar ongga oska ongga mimif mutunggom sis fob, beda mudou efeneinei rot ojgomu. Tina Allah ejginaga rot mar insa koma nomnaga tein. Noba oisouska efen owesa efek bera Ofa onsuna rot mar insa koma fogora odou eskeira rot mimif ojgomu.
21Edohuji ongga dudou okora rot, enadaij nou mudou efeneinei rot mar ongga oska insa koma deika guru, jeska Allah onsuna rot mar ongga oska insa koma jeska mudou efesi fob. Jefeda ebeibeyaif mimif mijginaga rot tenten oida Allah odou eskeira rot mimif ojgomu fob.
22Jeska ebeibeyaif mimif muroru mar ongga Ofa anggot rot noba mutunggom mar ongga ereita Ofa efen odou ongga eskeira rot ojgomu. Jefeda erek mimif mirejgei mar jeska Ofa, beda Ofa emeita mar koma gu mimif si.
23Noba mar ongga Ofa anggot rot insa koma bera erek kef oida, "Mudou ororu Yesus Kristus ongga Ofa efen efesa ojgomu, noba mudou omokorema erek Yesus anggot rot sis fob."
24Beda idu ongga otunggom mar ongga Allah anggot rot bera efen odou erek egens jera Ofa. Noba Allah tein odou erek egens jera ofa. Noba mimif mijginaga rot oida Ofa efen odou erek egens jera mimif oisouska Efena Ebsi ongga Ofa obk jeskaseda engker gij mudou efesi.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel