1Erek koma jefeda didif dusujohu rot oida dineja skoita iwa enesi jeskaseda idou onokum rot mar ofoukou ongga didif duftuftu gu iwa gij mona insa koma guru.
2Jeska erek didif dutunggom mar ongga ereita idou okumkum rot ojgomu, beda enadaij nou iwa ita mar nou didif ongga erek ereita didif dudou erirei eteb rot deika guru. Jeska yeyin idou bera okumkum rot mar ofoukou ongga didif dumftuftu rot gu iwa ojgomu. Jefeda didif dudou os erek koma guru.
3Noba gij dedin surat ongga sismeni bera didif dunggu mar jera dudou ongga okumkum rot iwa noba ongga dibisa eteb rot iwa tein. Noba didif dunogu surat egens insa koma jeskaseda direita idou ongga okumkum rot ojgomu guru. Tina didif dugu surat egens koma jeskaseda iwa ik fogora imejginaga rot oida didif dudou okora eteb rot iwa ojgomu. Didif dumftuftu iwa rot ahais gij surat insa koma fob jeskaseda gij mona ongga didif din skoita iwa fob, beda iwa imereita dudou erirei rot mar ongga oufamofa ongga iwa intunggom fob. Noba didif dijginaga rot tenten fob oida erek didif dudou erirei rot iwa, beda iwa idou eskeira rot tein si.
4(2:3)
5Sis fob bera didif dunggu gij surat egens insa koma ongga sismeni osok gij osnok egens koma ongga otunggom mar ongga oska jah gu iwa ifekesa fob. Noba mar ongga ofa ontunggom koma bera erek ereita dudou okum eteb rot ojgomu. Tina mar koma bera ereita iwa tein idou okum eteb ekirsa rot. Noba koma erek tenten, tina ainsa kef bera didif dudou onokum rot ofa deika guru.
6Jeska mar okum ongga iwa yumfra keingg ofa fob bera erek adaij nou ojgomu.
7Tina ebeibeyaif ofa engkikif jeska efen mar ongga oska fob. Jefeda iwa tein isuna rot ofa efen mar ongga oska insa koma ojgomu. Beda iwa yufij ofa rot efen odou ongga okumkum insa koma jeskaseda ofa odou enesiri rot mar okum koma ongga iwa yumfra keingg ofa ojgomuja guru.
8Jefeda didif duis gu iwa jeskaseda iwa icunc idou ongga okora rot ofa deika ojgomu.
9Didif dinsa surat ongga sismeni insa koma skoita iwa jeskaseda direneni idou efesi rot fogora dik rot oida iwa imororu mar nomnaga ongga didif danggot rot ei era gurei. Tina iwa iroru mar koma rot tenten fob.
10Noba iwa insuna rot ofa efen mar ongga oska fob, jefeda didif tein dunsuna rot mar koma fob. Jeska mar ongga ofa otunggom sis fob koma bera erek oska skoita didif tein. Noba gij mona ongga didif dunsuna rot mar ongga oska ongga rusnok enjgineg runtunggom fob, beda didif dita mar erek koma oisouska owesa efek jeska Yesus Kristus ojgomu. Noba koma bera omofij iwa tein si.
11Jefeda iwa yufij osnok egens insa koma erek didif danggot rot jeskaseda enadaij nou Bilis orokrusa ofa deika rot guru. Jeska mimif mijginaga rot teinefa Bilis efen eita mar tein.
12Sis fob bera didif dija jah kota Troas jeskaseda duftuftu rot Yesus Kristus efen oga jah suma. Noba gij mona ongga didif dinsaga jah suma fob, beda didif dik rot oida Tuhan eita efekesa nou didif jeskaseda dutunggom mar erek koma ojgomu.
13Tina didif dudou efeneinei rot tein, jeska dunorodosu dedin edohuj Titus jah suma guru. Jefeda didif duisu bahasmero gu rusnok jah suma fogora dija jah monuh Makedonia ojgomu.
14Erek koma, tina didif duis oufamofa eteb gu Allah rot mar ongga Yesus Kristus ontunggom fob. Jeska Bilis, ongga ofoka ereij keingg mimif sis fob, bera ensiri gu Ofa fob. Jefeda ebeibeyaif Yesus eja okag rot memef beda memef mecira rot Ofa efen oga ongga oufamofa rejrej monuh nomnaga. Noba Allah efen oga insa koma bera erek mar efen ensesa ongga erebirma rejrej skoita rusnok nomnaga.
15Noba memef tein bera erek mar ongga efen ensesa ongga Yesus era nou orougif gu Allah rot. Noba mar efen ensesa insa koma erebirma skoita rusnok ongga Allah omoskotu jeska rerin mar ongga oska gij mona kahma deika tein. Noba mar insa koma erebirma skoita rusnok ongga rineseiseifa rot rerin mar ongga oska tein.
16Tina gij mona ongga rua ongga rinseiseifa insa koma rig rot oga ongga oufamofa koma, beda rua rukoja rot ojgomu. Jeska skoita rua bera oga ongga oufamofa insa koma erek mar agos efen esemba ojgomu. Koma jeska rua rinesma eiteij ah ongga efeinah guru. Tina skoita rusnok ongga Allah onskotu fob bera oga ongga oufamofa insa koma erek mar ongga efen ensesa ojgomu. Jeska rua rimesma eiteij ah ongga efeinah si. Noba enadaij nou rusnok egema tein ruftuftu rot mar insa koma oisouska risinsa rerin owesa efek jinaga guru.
17Noba memef bera menerek rusnok enjgineg ongga ruftuftu rot Allah efen oga jeska rudou ot rot mareibra ofoukou ongga rimesma jeska rusnok guru. Tina memef bera moftuftu osok gij Allah efen oga rot modou ongga eskeiramera ojgomu. Memef motunggom mar koma oisouska modou ongga egens jera Yesus Kristus, jeska memef bera merek rusnok ongga Allah ombk fob. Noba memef meita mar erek rusnok ongga rijginaga rot oida Allah eyajga joug mar nomnaga ongga rua rutunggom nou Ofa.
<< 2 Korintus 2 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel