1Timotius, bua birek dedin edesa egens. But rot ahais oisouska budou ongga enjerek egens jera Yesus Kristus fob. Jeska Ofa ocunc odou ongga oufamofa eteb skoita memef fob.
2Bua bingg rot mar nomnaga ongga didif dumftuftu jah rusnok rufoukou rudou fob. Jefeda bua tein buftuftu rot mar insa koma gu rusnok enjgineg tein rot koisoisa ojgomu. Beda rua tein rumoftuftu rot mar insa koma gu rusnok enjgineg rot koisoisa deika si.
3Noba erek tentarer rita rudou ahais gij mar ongga eita rifera okora gu rua, beda bua tein bita budou ahais gij mar ongga eita bifera okora gu bua tein. Jeska bua bera erek osnok egens ongga ofij Yesus Kristus ojgomuja.
4Tentarer ongga rufij rerin ebirfaga egens bera runoromohohuma rot mar ongga ebirfaga insa koma odou os rot jera mar ongga rusnok enjgineg rudou os rot guru. Tina rua rutunggom mar ongga rerin ebirfaga egens ondou os rot ojgomu. Erek koma tein rot bua ongga bufij Yesus Kristus.
5Noba rusnok ongga rufof riremeteima jeskaseda risma rufons ongga ongkoska bera ruroru ebirfager ruga jeni jeskaseda risma mar insa koma ojgomu.
6Noba rusnok ongga rif mar gij mekeni rot iskusk bera risma maat efema ongga sismeni jeska mekeni egens insa koma.
7Bua busujohu rot osok gij mar orocunc insa koma nomnaga rot iskusk jeskaseda budou emebriyi gij efen ofou ojgomu. Jeska Tuhan omofij bua jeskaseda budou ebriyi gij mar insa koma nomnaga efen ofou si.
8Beda bua budou ah keingg rot Yesus Kristus ojgomuja. Ofa onjuj jeska efen ofou ebiedi meimowa raja Daud. Noba Allah omfra Ofa jeska agos fob. Didif dumftuftu rot oga ongga oufamofa insa koma gu rusnok rufoukou fob.
9Noba didif dimfesij rot oga ongga oufamofa insa koma, jefeda rusnok rita efera okora gu didif fogora rira rantai rirakid ditma erek osnok egens ongga ofogog. Tina enadaij nou rusnok rakid Allah oga ongga oufamofa jinaga guru.
10Jefeda didif dug dijmeg gij mar okum nomnaga ongga angh gu didif jeskaseda rusnok ongga Allah oncunc fob rimeg rot oga insa koma si. Beda Allah omoskotu rua tein oisouska Yesus Kristus fogora rua rimesma eiteij ah ongga ongkoska noba ongga ah aibin ojgomuja. Kef bera ongga tenten oida,
11"Erek mimif manggos rot mifmin mar ongga oska gij mona ongga Ofa anggos tumu mega salib, beda mimif tein bera mimesma eiteij ah morototuma jera Ofa gij mona ongga Ofa endebecki jeska agos fob.
12Noba erek mimif mita mudou ahais gij mar ongga eita efera okora gu mimif, beda mimif tein mumofoka ereij keingg mar nomnaga morototuma jera Ofa si. Noba erek mimif mudou okoja Ofa, beda Ofa tein odou omokoja mimif.
13Noba erek mimif munororu efen oga rot tenten guru, tina Ofa omotunggom mar nomnaga ongga Ofa anggen rot ojgomu. Jeska Ofa enekikif jeska mar ongga Ofa anggen rot gu mimif sis fob jinaga guru."
14Timotius, enadaij nou bebin rusnok ruga omosokuma rot mar ongga erek onofoufem insa koma guru. Jeska mar koma bera orotunggom rusnok rudou oska moguma ojgomu. Bua bisisi joug bebin rusnok jah suma ahah Allah odou rot ahais jeskaseda rua rineita mar erek koma guru.
15Budou mojenenib rot mar ongga bua bimfarur gij guru. Tina buftuftu rusnok osok gij Allah oga rot tenten ojgomu. Beda ahah Allah bera bua bimerek osnok egens ongga Ofa odou eskeira eteb rot si.
16Bua bibes bifaga jeska rusnok ongga ruga omosokuma noba ruga rahisent mar rot rudou ongga osumsumu eteb ojgomu. Jeska mar koma onoroun mimif skoita Allah jinaga guru.
17Noba erek aki efera ejerek eteb fogora omorok mokcin aki nomnaga, beda erek koma tein, mar ongga rua rumftuftu rot insa koma orok mokcin rusnok rufoukou fogora nomnaga rimejerek oska. Himeneus gonu Filetus bera gerek gosnok gegeka ongga gotoiru gij mar insa koma.
18Goga gonororu Allah oga ongga tenten deika guru. Noba ebeibeyaif goga goftuftu rot oida Allah omfra rusnok nomnaga jeska ranggos fob, jefeda Ofa onofra rusnok egema deika guru. Erek koma jefeda rineya rija jeska Allah noba ruroru Ofa deika guru.
19Erek koma tina, Allah oga ongga oufamofa bera ah rot ahais erek mamu ofoj eteb egens ongga eneineina gij jinaga guru. Noba Allah oga insa koma bera agot mar erek kef oida, "Allah ejginaga rot idu ongga ejerek efen rusnok fob." Noba mar egens enjgineg agot oida, "Idu ongga agot rot oida ofa oira jera Allah efen rusnok fob, beda ofa ekikif jeska efen mar ongga oska ojgomu."
20Gij mod efesi ongga runa mei ahtah rerin bera bokor efeyi jera morogum ongga runtunggom jeska emas jera perak ongga efen efera osok eteb enah jah suma. Noba rua rira mar insa koma gij mona ongga rusnok ongga rufoka aksa runjogog rua ojgomu. Tina gij mod insa koma bera bokor efeyi ongga rutunggom jeska mombus owoha jera mok osku ongga runtunggom jeska meic owoha ongga erek onok efera erek eteb gij guru bera ah jah suma tein. Noba rua rira mar insa koma gij mona ongga rusnok giskini runjogog rua ojgomu.
21Erek koma tein, erek rusnok rikikif jeska rerin mar ongga oska noba rita riteij ah ongga ongkoska, beda Allah omocunc rua jeskaseda ricira gij efen mar ongga ofoufem si. Jeska ahah Ofa eiteij bera rua erek efen rusnok ongga ofoufem eteb. Noba rua rinsejah nou rufij Ofa gij mar ongga erek oufamofa eteb ojgomuja.
22Timotius, but joug budou efesi rot ahais jeska mar ongga oska ongga oroku ruforoker rudou efesi ojgomuja. Noba bireni rot ahais ojgomu jeskaseda butunggom mar ongga orocunc rot budou ongga efen mar ongga oska oskiyai tein guru. Noba buroru Allah oga rot tentenmen ojgomu ni, bita budou ongga okora rot rusnok enjgineg ni, biker rot biteij ah ongga eskeira jera rusnok nomnaga ni. Bita mar erek insa koma jera rusnok enjgineg tein ongga ruis gu Tuhan jeskaseda Ofa omofij rua ojgomuja.
23Noba bibes bifaga jeska rusnok ongga ruga omosokuma osok gij mar rourou rot rudou ongga osumsumu ojgomu. Jeska bua bijginaga rot oida mar insa koma bera otunggom rusnok rudou otkonu oska moguma ojgomuja.
24Bua bera osnok egens ongga bufij Tuhan, jefeda bua bunoga omosokuma jera rusnok enjgineg guru. Bucunc budou ongga eriagamaga skoita rusnok nomnaga. Noba buin keingg budou efesij rot rusnok nomnaga noba buftuftu rua rot budou ongga oufamofa rot rua.
25Noba buftuftu rusnok enjgineg ongga riretei rot bua jera budou ongga eriagamaga ojgomu. Beda Allah emeita mona efekesa gu rua jeskaseda rimekikif jeska rerin mar ongga oska fogora rumororu efen oga ongga tenten tein.
26Beda rua rudou emebriyi gij rerin rita mar erek teinefa fogora rua rumosuwa risinsa jeska Bilis si. Beda rua runororu mar ongga Bilis odou os rot deika guru.
<< 2 Timotius 2 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel