1Erek koma noba, gij tahun setka kungkob tohkuru deika, beda didif dija jah kota Yerusalem morototuma jera Barnabas. Noba Titus tein ororu magef jah suma.
2Noba didif dineja jah suma jeska rusnok ruga ebin didif rot guru. Tina didif dija jah suma jeska Allah oncunc rot erek koma gij dudou efesi sismeni fob. Beda didif durodosu rusnok Kristen rerin ebirfager jah suma jeskaseda difesij gu rua rot teinefa didif duftuftu mar osok gij Allah oga ongga oufamofa gu rusnok ongga erek Yahudi guru gij monuh ongga enjgineg fob. Tina askesi didif diker gij kota Yerusalem bera didif dimfesij rot mar insa koma gu Kristen koma rerin ebirfager risinsiyai ojgomu. Didif dagot rot mar insa koma gu rua jeskaseda rua era rusnok egema tein rineseda rot mar ongga didif dimfarur rot sis fob jera mar ongga dimeita gij mona kahma tein guru. Jeska didif duftuftu rot oida enadaij nou rusnok risma rudou ongga ebsi komowa oisouska hukum Musa ongga rua ruroru erek jinaga guru.
3Erek koma jefeda ebirfager insa koma ruitij rot mar ongga didif dumftuftu rot gu rusnok ongga Yahudi guru ojgomu. Noba rua rineradgodu Titus, ongga erek rua ongga Yunani, jeskaseda ofa tein eris ofom mareij ofos jeska guru.
4Erek koma tina, askesi memef memfesij rot mar insa koma ros, beda rusnok Yahudi rineya ongga Kristen ruira wuswus noba ragosuit rot mar ongga memef memfesij. Tina rua bera enerek mifmin muhujir Kristen ongga tenten guru, jeska rua rudou os riradgodu Titus jera rusnok enjgineg ongga erek Yahudi guru tein jeskaseda rua riris rufom mareij ofos jeska jeni hukum Musa sismeni fog. Rua rusujohu rot oida koma bera ongga orotunggom rua erek Allah efen rusnok ongga ruroru Yesus rot tenten fob. Erek koma tina, ebeibeyaif Yesus bera onsuwa mimif jeska hukum Musa insa koma fob. Tina rusnok insa koma rudou os riradgodu mimif jeskaseda muroru hukum Musa koma tein ojgomuja.
5Jefeda memef tein monoitij rot mar insa koma ongga rua rudou os rot jinaga guru. Memef mosujohu rot erek koma jeskaseda oga ongga oufamofa ongga memef momftuftu rot gu iwa sis fob bera onoromohohuma jera mar ongga oska ongga rua insa koma ruftuftu rot jinaga guru.
6Noba osok gij rasul Yakobus, Petrus jera Yohanes ongga iwa yumfra erek yeyin ebirfager, koma bera onofoufem skoita didif guru. Jeska Allah onofra rusnok ororu rerin rufoka guru. Tina mar egens ongga ofoufem bera rua runogun mar egema tein dokun jera mar ongga didif duftuftu rot guru.
7Tina rua ruitij rot oida Allah bera oncunc didif jeskaseda durka Ofa efen oga ongga oufamofa skoita rusnok ongga erek Yahudi guru. Koma morototuma erek Ofa oncunc Petrus jeskaseda ofa orka efen oga ongga oufamofa skoita rusnok ongga Yahudi.
8Koma bera, Allah eita owesa efek gu Petrus jeskaseda eja erek efen rasul egens nou rusnok ongga Yahudi. Noba Ofa eita owesa efek gu didif tein jeskaseda dija erek efen rasul egens nou rusnok ongga erek Yahudi guru.
9Erek koma, beda ebirfager Kristen insa koma tein rudou ebriyi gij rot teinefa Allah oncunc efen odou ongga oufamofa skoita didif tein. Jefeda Yakobus ni, Petrus ni, Yohanes ni, ongga iwa yugif gu erek yeyin ebirfager fob, bera ragei memef metma morototuma jeska rua ruitij rot oida Didif jera Barnabas bera ongga Allah ombk rot odou ongga eskeira jeskaseda maftuftu rot efen oga skoita rusnok ongga Yahudi guru. Noba Yakobus jera Petrus bera ongga Allah ombk goga skoita rusnok ongga Yahudi.
10Noba mar egens ongga rua rirejgei memef rot bera erek kef oida, modou ah keingg rot mefmen mohujir Kristen ongga rufojingki fogora mofij rua ojgomuja. Noba didif dudou os dutunggom mar erek koma ojgomu.
11Gij mona juens ongga dingker gij kota Antiokhia ros, beda Petrus en jah suma. Noba didif ditaha joug ofa jah suma rot mar egens ongga ofa ontunggom ongga erek tenten guru. Erek koma jeska, sis fob bera ofa ofra mifmin mohujir Kristen ongga Yahudi erek ekirsa jera mifmin mohujir Kristen ongga Yahudi guru. Beda ofa tein et maat morototuma jera rua insa koma nomnaga ojgomu. Koma bera oufa.
12Tina gij mona juens bera rasul Yakobus obk efen mohujir ongga Yahudi jeska kota Yerusalem jah kota Antiokhia. Nou ongga rua rinsaga jah suma fob, beda Petrus ebes efaga jeska efen mohujir Kristen insa koma ongga Yahudi guru, jeska ofa emeesa rot rua insa koma ongga rin jeska kota Yerusalem. Erek koma jeska rua ruftuftu rot oida enadaij nou rusnok ongga Yahudi rit maat morototuma jera rusnok ongga Yahudi guru. Noba koma bera onoufa guru.
13Beda rusnok Kristen ongga Yahudi rineya tein rik mar ongga Petrus ontunggom insa koma. Jefeda rua tein ribes rifaga jeska mifmin mohujir Kristen ongga Yahudi guru. Rua rita mar erek koma fogora Barnabas tein eita mar erek rua rita insa koma ojgomu.
14Erek koma, tina nou ongga didif dik rua rutunggom mar erek insa koma ongga onororu jeni Allah oga ongga oufamofa guru, beda didif ditaha joug Petrus rot tomnomna oida, "Bua bera birek osnok egens jeska Yahudi ongga onororu erebent Yahudi deika guru, tina giskini bua bit maat morototuma jera rusnok ongga erek Yahudi guru tein ojgomu. Erek koma jefeda teinefa fogora bua biradgodu rua ongga Yahudi guru jeskaseda rua ruroru Yahudi rerin erebent ojgomu, tina bua bera gurei."
15Didif ditaha joug Petrus rot tomnomna erek insa koma jeskaseda rua nomnaga rig rot mar ongga didif danggot erek kef oida, Petrus jera didif bera marek rusnok ongga Yahudi jeska magef mafman maimowa bera runjuj jeska rusnok ongga Yahudi. Noba magef maneita mar ongga oska erek rusnok ongga runougif gu Allah enesi rita, erek koma guru.
16Noba magef majginaga rot oida Allah odou eneskeira rot mimif nomnaga oisouska mar ongga mimif mutunggom jeni hukum Musa guru. Tina oisouska mudou ongga ororu Yesus Kristus rot tenten fob, bera Allah odou eskeira rot mimif ojgomu. Noba magef bera madou efesi maroru Yesus Kristus rot tenten fob, jefeda magef maja erek rusnok ongga rudou ebsi komowa ahah Allah eiteij. Noba magef maita mar erek koma oisouska madou ongga maroru Yesus Kristus ojgomu. Noba koma bera enen jeska mar ongga magef maita jeni hukum Musa jinaga guru.
17Jefeda, mimif ongga Yahudi muisum gij Allah rot oida Ofa odou eskeira rot mimif jeska mimif muroru Yesus Kristus fob. Erek koma tina rusnok Yahudi enjgineg rusujohu rot oida magef bera erek rusnok ongga rita mar ongga oska ojgomu, jeska magef manororu hukum Musa deika guru. Jefeda rua rusujohu rot oida Yesus bera ongga otunggom magef fogora maita mar ongga oska insa koma. Tina mar ongga rua rusujohu rot insa koma bera erek tenten guru.
18Noba erek didif dikikif fogora duroru hukum Musa deika, beda koma erek didif dusujohu rot oida rusnok ongga ruisum gij hukum Musa bera risma rudou ongga ebsi komowa oisouska mar insa koma ojgomu. Beda koma tein erek orocunc rot oida didif bera dutunggom mar ongga oska, jeska dikikif jeska hukum Musa sis fob. Tina koma erek tenten guru. Jeska koma omorocunc rot oida didif duisum gij hukum Musa ojgomu, tina guru.
19Ebeibeyaif didif dunororu hukum Musa jeskaseda disma dudou ongga ebsi komowa oisouska hukum Musa insa koma deika guru. Jefeda koma erek didif danggos jeska hukum insa koma ojgomu fob.
20Tina didif duntunggom mar erek koma jeskaseda disma dudou ongga ebsi komowa oisouska mar enjgineg. Koma bera, gij mona ongga Yesus anggos tumu mega salib, beda ahah Allah eiteij bera koma erek didif tein danggos morototuma jera Yesus fob. Erek koma jeska dedin dudou ongga egens jera Yesus fob. Noba, jeska didif duisum gij Yesus Kristus ojgomu fob, jefeda koma bera erek didif difena ebah deika morototuma jera Ofa tein.
21Erek koma, noba Allah odou os otunggom mifmin mudou efesi erek ebsi komowa oisouska efen odou ongga oufamofa eteb skoita mimif. Tina erek mimif mukoja Ofa efen odou ongga oufamofa skoita mimif insa koma, beda enadaij nou Ofa ofij mimif deika guru. Jeska erek rusnok rita rudou ongga ebsi komowa oisouska hukum Musa ongga rua ruroru jeni ojgomu, beda koma erek Yesus efen eita mar tumu mega salib nou mimif bera erek onofij mimif guri.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel