1Yesus agot gu efen ruforoker oida, "Mar ongga ereita rusnok rudou efesi fogora risiri gij mar ongga oska bera enahuma ojgomuja. Tina okum eteb emah keingg rusnok ongga rucunc mar koma gu rusnok enjgineg fogora rua tein rita mar ongga oska koma insa koma.
2Jeska erek osnok egens otunggom mar skoita rusnok ongga ruroru Didif erek ruforokai ruroru Didif, fogora rua runororu Didif deika guru, beda Allah omofra okum eteb doska keingg osnok egens koma rot si. Mar egema tein ongga rusnok rita gu ofa rot bera enerek mar okum ongga Allah emeita gu ofa rot guru.
3Jefeda iwa yut joug isinsa idou efesi rot mar insa koma ojgomu. Erek yeyin yuhuj egens ongga otunggom mar ongga oska fob, beda iwa yuftuftu ofa rot ahais ojgomu. Noba erek ofa emeesa joug efen mar ongga oska insa koma, beda ita idou ongga eskeira rot ofa deika.
4Erek ofa otunggom mar ongga oska eneya rot ofosma cinja erfeka gij mona juens skoita iwa, beda ofa oksons skoita iwa rot ofosma cinja erfeka jeskaseda ois gu iwa oida, 'Didif dimeesa joug dedin mar ongga oska insa koma fob,' beda iwa ita idou ongga eskeira rot ofa deika ojgomu."
5Erek koma beda Yesus efen ruforoker ragot gu Ofa oida, "Tuhan, bufij memef jeskaseda modou ororu Bua rot ahais ojgomu." Beda Yesus oroun gu rua oida,
6"Erek iwa idou ororu Didif erek ai oskiyai ojgomu, beda koma adaij jeskaseda itunggom mar okum erek yagot gu mega egens kef oida, 'Bukub bisinsa jeska mebi kef noba bujot gij mei mojuma efei!' Beda mega egens koma omororu jeni yuga ojgomu."
7Beda Yesus agot gu efen ruforoker oida, "Erek osnok egens ofij iwa gij yeyin mekeni era ot joug yeyin domba-domba, beda giskini iwa inagot gu ofa oida, 'Bua bin noba bit maat sismeni fog,' guru.
8Tina giskini iwa imagot gu ofa oida, 'Bua buina maat nou didif fog. Beda birgi meisoufa ongga ebsi noba burka maat efej koma gu didif ojgomu. Noba bua biker joug didif askesi dit maat oisa fog, beda bua bit maat tein.'
9Giskini bera iwa inesitit osnok egens koma ongga ofij iwa guru, jeska ofa otunggom mar ongga iwa yubk ofa rot ojgomu.
10Erek koma tein, gij mona ongga iwa itunggom mar ongga rusnok enjgineg rubk iwa rot, beda iwa yuin keingg isinsa ifoka fogora yagot gu rua oida, 'Memef bera merek rusnok ongga mofij ojgomu. Jefeda memef mororu mar ongga rusnok ranggot rot gu memef ojgomu.' "
11Askesi Yesus ecira jah kota Yerusalem, beda Ofa oira anjob monuh Samaria jera Galilea.
12Nou ongga Ofa omoira gij kota egens beda rusnok rufok setka ongga rufos maren jefeda rifera okora eteb rot rin skoita Ofa. Rua rut ai yes jeska Ofa,
13beda ruis gu Ofa oida, "Tuhan Yesus, bucunc budou ongga okora rot memefo!"
14Nou ongga Yesus engk rua, beda Ofa agot oida, "Iwa ija noba icunc isinsa ifaga skoita imam-imam." Nou ongga rusnok insa koma rincira gu moroju ros, beda rufos ejerek eskeira fob.
15Nou ongga osnok egens jeska rua ek rot oida efen ofos nomnaga eskeira fob, beda ofa oksons rot odou ongga efaga ouka noba esitit Allah.
16Beda ofa es okeibi gu mebi jah Yesus odou noba ois oufamofa eteb gu Yesus rot. Osnok egens koma bera ojga jeska monuh Samaria.
17Beda Yesus agot oida, "Didif dik oida rusnok rufok setka bera rita eskeira fob. Jefeda rufok cinja tohkuru riker sinefo?
18Teinefo fogora rineya ongga Yahudi koma runoksons jeskaseda ruis oufamofa eteb gu Allah guro. Erek osnok egens kef jeska monuh Samaria bera oksons rot ojgomo."
19Beda Yesus agot gu ofa oida, "Bua bidebecki noba bija ojgomu. Bua budou ororu Didif rot tenten fob, jefeda bua bisma eskeira fob."
20Gij mona juens rusnok rineya ongga jeska ebic Farisi rijeka gu Yesus oida, "Gij mona juaho fogora Allah emen noba ofoka ereij keingg rusnok?" Beda Yesus oroun oida, "Enadaij nou iwa ifokor gij mar ongga orocunc rot fogora idou ejginaga rot mona ongga Ofa emen jinaga guru.
21Noba iwa ineg rusnok ragot oida, 'Allah ofoka ereij keingg rusnok gij monuh egens jah suma,' guru! Jeska ebeibeyaif Allah ofoka ereij keingg rusnok jah gu ifekesa fob."
22Erek koma beda Yesus agot gu efen ruforoker oida, "Gij mona ongga emen beda iwa idou omosos rot jeskaseda ik Didif, Rusnok Efesa, deika. Tina iwa inek Didif deika guru.
23Beda rusnok enjgineg rimagot oida. 'Ofa eker jah suma!' Era rua rimagot oida, 'Ofa eker jah sif!' Tina iwa inororu rerin ruga koma jinaga guru.
24Jeska gij mona ongga Didif, Rusnok Efesa, duksons en fob, beda rusnok gij monuh nomnaga rimek mar erek moc efna eteb gu mebaga.
25Tina rot sismeni bera Didif dimeita difera okora eteb fogora rusnok ongga riker gij mona ebeibeyaif rumokoja Didif fog, beda dumoksons en si.
26Gij mona ongga Didif, Rusnok Efesa, duksons en fob, beda rusnok rimek mar morototuma erek rua rik gij mona ongga Nuh eker gu mebif sis eteb fob.
27Gij mona insa koma bera rusnok rita mar erek giskini ojgomu. Rua ruina maat ni, rij mei ni, rumoskotuma ni, ojgomuja onjoros mona ongga Nuh oira gij kabar mei ongga ofa ontunggom fob. Beda ainsa koma tein mos es ojgomuja onjoros mei ofot noba endi rusnok nomnaga fogora ragos gij mei insa koma.
28Rusnok ringk rot mar erek insa koma tein gij mona Lot eker gu mebif sis eteb fob. Gij mona insa koma bera rusnok rit maat ni, rij mei ni, ruhu mar ni, rirefa marsi gij mekeni ni, rii mod ni ojgomuja.
29Tina gij mona ongga Lot orogna jeska kota Sodom, beda mah efesi kreni ongga eisa eteb ojuj jeska mebaga noba et rusnok insa koma nomnaga fogora ragos ojgomu.
30Rusnok rimek mar erek insa koma tein gij mona ongga Didif duksons en jeska mebaga bera erek koma tein.
31Jefeda gij mona insa koma bera rusnok ongga ringker jah mod majmeg bera runoira gij mer efesi jeskaseda rita mareibra fog guru. Tina rua rufof ebeirens ojgomu. Noba erek koma tein rot rusnok ongga rif mar gij rerin mekeni. Rua runoksons jah rerin mod sismeni fog guru. Tina rua rufof rot ebeirens ojgomu.
32Iwa idou ah keingg rot mar ongga encirej Lot efen mohona sis fob.
33Noba erek rusnok rusujohu ekirsa rot mar ongga riteij ah kef efen, beda rua rineita eiteij ah ongga efeinah guru. Noba erek rusnok runororu mar ongga risinsa rudou os gij riteij ah kef guru, tina rua ruroru mar ongga Allah odou os rot ojgomu, beda rua rimeita eiteij ah ongga efeinah tein si.
34Gij mona insa koma bera gosnok gegeka gahca nou motu. Beda gegema gomosok jah mebaga noba gegema geker ojgomu ros.
35Gij mona insa koma bera gojaga gegeka gos gandum efej gij mokaga. Beda gegema omosok jah mebaga noba gegema geker.
36((Beda gosnok gorna gegeka gefarur gu mektah. Noba gegema gomosok jah mebaga, noba gegema geker ojgomu.))"
37Erek koma beda Yesus efen ruforoka rijeka gu Ofa oida, "Tuhan, memef memek mar koma gij monuh sinefo?" Beda Yesus oroun oida, "Gij mona ongga iwa iajga mem meg ofu jah skida, beda iwa ijginaga rot oida mar ongga anggos enahuma. Beda iwa erek koma tein, iwa imek mar ongga orocunc rot mona ongga Didif duksons en tein si."
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel