1Gij mona juens Yesus ek rusnok ongga runa mei ahtah rikeba rerin fifi gij meifeti erek mar ongga rurougif gu Allah rot.
2Beda Ofa ek ojaga eja mesina egens ongga ofojingki eij fifi egeka ongga erek ai oskiyai ojgomu gij meifeti koma.
3Beda Yesus agot oida, "Ongga tenten bera, ojaga eja mesina egens koma ekeba fifi ongga ekirsa jeska rua ongga runa mei ahtah ojgomu.
4Jeska rua insa koma rikeba fifi jeska rerin mareibra ongga ofod ojgomu. Tina ojaga eja mesina egens kef ongga ofojingki bera eita fifi nomnaga ongga ofa efen ojgomu."
5Rusnok rineya ongga ruroru Yesus rinagot rot teinefa Mod Allah efen mamu ongga ongkoskamoka noba efen mar ongga rusnok rita gu Allah erek rurougif gu Ofa ongga ongkoska eteb tein.
6Beda Yesus agot gu rua oida, "Gij mona egens ongga emen bera rusnok rumohoda Mod egens kef nomnaga fogora mamu egens tein enah mesijma deika guru."
7Beda rua rijeka gu Yesus oida, "Akeina Guru, gij mona juaho fogora mar insa koma emecira? Noba mar meidu bera ongga omorocunc rot mona egens koma ongga emen?"
8Beda Yesus agot oida, "Iwa yut joug idou efesi rot ahais jeskaseda rusnok enjgineg runorokrusa iwa rot guru. Jeska rusnok rufoukou rimagot oida Didif bera ongga dubk rua fob. Noba rua rimagot rourou oida, 'Didif bera Ofa ongga emen!' Noba rua rimagot tein oida, 'Mona ongga Allah anggot eimofoj rot bera en fob!' Tina iwa inororu rerin ruga koma jinaga guru.
9Gij mona ongga iwa ingg rot oida rusnok rimagobuma, era rusnok ruh mosoruk ofoka beda iwa inemeesa rot guru. Jeska mar insa koma nomnaga emen rot sismeni fob. Tina mar koma onorocunc rot oida mona ongga monuhif emeseiseifa bera en doida guru."
10Beda Yesus agot deika oida, "Rusnok gij monuh egens rimagobuma jera rusnok gij monuh egema.
11Beda mebif icusur erek doska gij monuh ofoukou tein. Noba mosona eteb omok rusnok rufoukou. Noba mar ongga eita rusnok rifera okora ofoukou bera emen tein. Noba rusnok rimek mar ongga okum ofoukou jera mar onswos gu mebaga fogora rimeesa eteb rot.
12Tina gij mona ongga mar insa koma enesaga enesi, beda rusnok rimagei iwa fogora rufra mar okum keingg iwa. Rua rumorka iwa skoita ebirfager mod ongga rusnok rum riteij gu Allah gij fogora rimaha iwa gij mod oskusk. Noba rua rimekris iwa skoita raja-raja jera Gubernur tein jeska iwa iroru Didif.
13Jefeda gij mona insa koma bera iwa imagot rot Allah oga gu rusnok insa koma.
14Tina iwa isisi joug isinsa idou efesi jeskaseda iwa inejekjeka idou rot mar ongga iwa imagot rot gu rua guru.
15Jeska Didif dumocunc gu iwa rot mar ongga iwa imagot rot si. Jefeda enadaij nou rusnok insa koma ruga eseda rot yeyin yuga guru fogora rua rimesiri gu iwa ojgomu.
16Noba yeyin ika jera isu ni, ikoser gonu ikorer ni, ibskir ni, ihujir ni, rua rudou emekikif jeska iwa noba rumocunc iwa gu yeyin mesa ongga rudou oska rot iwa. Beda rua rimagob rineya jeska iwa.
17Rusnok rufoukou rimeita rudou ongga ofogog rot iwa jeska iwa iroru Didif fob.
18Tina Didif dumot joug iwa jefeda mar egema tein eneita iwa fogora yagos jinaga guru.
19Noba erek iwa yut rot ahais gij mar insa koma nomnaga, beda iwa imesma eiteij ah ongga efeinah si."
20Beda Yesus agot deika oida, "Gij mona ongga tentarer rufoukou runt joug rejrej kota Yerusalem, beda iwa imejginaga rot oida dektek deika guru, beda kota koma emesiri fogora omohoda nomnaga.
21Beda gij mona insa koma bera rusnok ongga ringker gij monuh Yudea ruku jah memaga ojgomu. Noba rusnok ongga ringker gij kota koma ruku jeska ojgomu. Noba rusnok ongga ringker jah mebah kota koma bera runoira jinaga guru!
22Jeska gij mona insa koma bera mar nomnaga ongga nabi-nabi runggu rot osok gij kota Yerusalem sis fob bera emah gij efera fob, beda rusnok gij kota koma rimesma okum eteb si.
23Okum eteb rot rujager ongga rifaga okum rot efesa jera rujager ongga rungh mengk gu riser tein. Jeska enadaij nou rua ruku ebeirens jeska kota koma jinaga guru. Gij mona insa koma bera rusnok gij monuh ofoukou rimeita rifera okora eteb.
24Rusnok rimera meiteb aksa fogora ragob rineya. Noba rua rumorka rineya jeska kota koma jah risinsa rerin monuh ojgomu. Beda rusnok ongga Yahudi guru rumot keingg kota Yerusalem rot ahais ojgomuja onjoros mona ongga Allah anggot oida adaij fob."
25Beda Yesus agot deika oida, "Rusnok rimeyajga mar onswos rot mowa ni, mesta ni, motur ni, mei mojumu efei ahrahra rot ofog eteb ni, jefeda rusnok rimeesa eteb rot mar insa koma tein.
26Mebaga nomnaga omosousouyu rot ahais, jefeda rusnok rufoukou rimeesa eteb rot mar okum ongga emen skoita rusnok mebif.
27Beda gij mona insa koma rusnok rimek Didif, Rusnok Efesa, dimen gij mocgoj ofog rot dufoka ongga aksa noba rot dedin owesa efek eteb.
28Gij mona ongga iwa ig mar insa koma, beda iwa yut noba iajga jah mebaga, jeska ai juens beda iwa imesma eiteij ah ongga efeinah si."
29Beda Yesus efesij mar orocunc gu rua erek kef oida, "Iwa isujohu rot mega ara jera mega enjgineg tein.
30Gij mona ongga iwa ik mega ofojuwu askesi omorogna, beda iwa ijginaga rot oida mona ongga mega enefek bera enesaga doida fob.
31Beda erek koma tein, gij mona ongga iwa ingk mar okum insa koma nomnaga orogna fob, Beda iwa imejginaga rot oida mona ongga Allah omofoka ereij keingg rusnok bera ensaga doida fob.
32Ongga tenten bera, erek rusnok ongga rifena ebah gij mona ebeibeyaif rinagos enesi, beda mar insa koma nomnaga emecira gij si.
33Mebaga jera mebi emeseiseifa si, tina dedin duga bera eneseiseifa jinaga guru."
34Beda Yesus agot deika oida, "Iwa yut joug idou efesi rot ahais jeskaseda iwa inesiri gij mar ongga oska erek ibirfaga erebibei rot mofut efei ni, irahaisomu gij mar ofoukou ongga erek oska ni, ijekjeka idou efesi rot yeyin iteij ah insa kef ni guru. Jeska erek iwa iroru mar ongga oska insa koma ojgomu, beda mona ongga enja ejgwaga bera omorogna keingg iwa ebeirens erek moubohu ongga oskotu mekhuis rot ebeirens tein.
35Jeska mar koma nomnaga emen skoita rusnok nomnaga ongga ringker gu mebif.
36Jefeda iwa yut joug idou efesi rot ahais noba yum iteij rot ahais tein jeskaseda iwa imosuwa jeska mar okum insa koma ongga emen, noba jeskaseda iwa imot jah Didif, Rusnok Efesa, dudou rot idou ongga mojen iwa rot guru."
37Gij orofosut mona bera Yesus oftuftu mar gu rusnok gij momas ongga angh rejrej Mod Allah. Nou motu insa koma beda Ofa eja jah memaga ofos Zaitun noba ahca jah suma.
38Beda gij raha tentena rusnok rufoukou rin jah momas ongga angh rejrej Allah jeskaseda rig mar ongga Yesus oftuftu rot.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel