1Mona eteb egens ongga Yahudi rit roti ongga enefifij guru ongga ofoka Paskah bera enesaga doida fob.
2Beda gij mona insa koma tein ebirfager imam-imam jera Guru-Guru agama ruhca moroju egens jeskaseda ragob Yesus, jeska rua rimeesa rot oida rusnok riskemba rumororu Ofa ojgomu.
3Erek koma beda gij mona insa koma Bilis oira gij Yudas, ongga rijeka Iskariot tein, odou efesi. Ofa bera osnok egens jeska rusnok rufok setka kungkob erfeka ongga ruroru Yesus erek efen ruforoker.
4Beda ofa eja skoita ebirfager imam-imam jera ebirfager rusnok ongga runt joug Mod Allah jeskaseda rifesij moguma jera rua rot teinefa ofa emaha Yesus gu rua.
5Beda rua rudou eskeira eteb rot, noba rua ruitij rot oida rumoh fifi gu ofa rot si.
6Beda ofa oitij rot, noba ohca mona ongga rusnok rufoukou rineker rejrej Yesus guru fogora ofa emaha Yesus gu rua.
7Mona ongga rusnok rit roti ongga enefifij guru jera riris domba efer egens erek mar ongga rurougif gu Allah rot bera ensaga fob.
8Beda Yesus obk Petrus gonu Yohanes oida, "Goga geja noba gesejah maat nou mona ongga Paskah jeskaseda mit maat morototuma."
9Beda goga gejeka gu Yesus oida, "Akeina, budou os magef masejah maat koma sinefo?"
10Yesus oroun oida, "Nou ongga goga gomoira gij kota koma, beda goga gomorodosu orna egens ongga omorka debeji rot mei. Beda goga gororu ofa jah mod ongga ofa eja gij.
11Beda goga gagot gu osnok egens ongga efen mod koma oida, 'Guru agot oida Morongsu kenefa bera Didif dimet maat ongga Paskah morototuma jera dedin ruforoker?'
12Beda ofa omoroun goga jah morongsu eteb egens ongga angh skida mod koma. Beda goga gesejah maat ongga Paskah efen jah suma."
13Jefeda Petrus jera Yohanes geja noba gek mar insa koma nomnaga jeni erek Yesus anggot gu goga fob. Beda goga gesejah maat ongga Paskah efen jah suma.
14Nou mona ongga rusnok rit maat ongga Paskah efen ensaga fob, beda Yesus eker morototuma jera efen ruforoker gu meja egens.
15Beda Ofa agot gu rua oida, "Didif dudou os dit maat Paskah kef jera iwa fog, beda dimeita difera okora.
16Jeska ongga tenten bera, Didif dinet maat jera iwa deika guru onjoros mona ongga Allah ofoka ereij keingg rusnok fog."
17Erek koma beda Yesus eita mok osku, noba ois oufamofa gu Allah rot beda agot oida, "Iwa nomnaga ij jeska mok osku kef ojgomu.
18Jeska Didif dinej anggur efei morototuma jera iwa deika guru onjoros mona ongga Allah ofoka ereij keingg rusnok fog."
19Beda Yesus eita roti, noba ois oufamofa gu Allah rot, beda Ofa ekeba roti koma dougdoug gu efen ruforoker. Beda Ofa agot oida, "Roti kef erek difaga ongga dimaha gu rusnok ongga rufogog jeskaseda iwa imeita eiteij ah ongga efeinah. Gij mona kahma deika beda iwa itunggom mar erek kef jeskaseda ireisisi joug isinsa osok gij Didif."
20Nou ongga rua rint maat oisa fob, beda Ofa eita mok osku rot anggur koma noba agot gu rua oida, "Anggur ongga angh gij mok osku kef bera erek eimofoj efeinah ongga Allah anggot rot oida Ofa emeita gu rusnok.
21Tina osnok egens koma ongga odou emekikif jeska didif bera eker morototuma jera mimif gu meja kef.
22Didif, Rusnok Efesa, bera dimagos jeni Allah odou ejginaga rot si. Tina mar okum eteb emah keingg osnok egens koma ongga odou engkikif jeska Didif."
23Jefeda ruforoker insa koma rimejekema oida, "Idu jeska mimif bera omotunggom mar erek komo?"
24Yesus efen ruforoker ruga omosokema rot oida idu jeska rua bera efen ofoka aksa ekirsa jeska rineya.
25Beda Yesus agot gu rua oida, "Rusnok ongga Yahudi guru rerin raja-raja ongga rut keingg rua ojgomuja. Noba raja-raja koma rijeka risinsa erek raja ongga rut joug rerin rusnok rot rudou ongga eskeiramera ojgomu.
26Tina iwa ineita mar erek koma guru! Ongga tenten bera, ofa ongga odou os esma ofoka ongga aksa, beda ofa eita mar rot odou ongga eriagamaga erek ruforoka rifes rerin rudou ongga eriagamaga. Noba ofa ongga odou os ofoka ereij keingg rusnok enjgineg, beda ofa ofij rusnok enjgineg ojgomuja.
27Jeska idu bera ongga efen ofoka ongga aksa ekirsa: Osnok egens ongga engker gu meja jeskaseda et maat ei, era osnok egens ongga ecka maat gu ofa ongga engker gu meja? Ongga tenten bera osnok egens ongga engker gu meja koma bera efen ofoka ongga aksa ekirsa. Tina Didif, ongga direk yeyin ebirfaga, bera diker gu iwa ifekesa erek osnok egens ongga omfij iwa.
28Onjoros mona deisef tein bera iwa iroru Didif gij mar okum nomnaga ongga angh keingg Didif fob.
29Noba Allah eita owesa efek gu Didif jeskaseda dufoka ereij keingg rusnok. Beda erek koma tein Didif dita owesa efek gu iwa rot.
30Didif duntunggom mar koma jeskaseda iwa imeker gu dedin meja egens gu mebaga. Beda iwa imet maat noba imej mar erek rusnok ongga rufoka aksa tein. Beda iwa imeker gij kursi eteb jeskaseda yuga ojga rot rusnok Israel ebic setka kungkob erfeka rerin rita mar tein."
31Beda Yesus agot deika oida, "Simon Petrus, bua big fog, jeska Bilis efen owesa efek jeskaseda ereni bua rot ahais.
32Tina Didif dum diteij nou bua fob jeskaseda budou ororu Didif rot ahais ojgomuja. Noba gij mona ongga bua bimeesa joug rot mar ongga bua bita fob, beda bua bufij dedin ruforoker rineya koma jeskaseda rua tein ruroru Didif rot rudou ahais ojgomuja."
33Beda Petrus oroun gu Yesus oida, "Tuhan, Didif dinsejah dudou efesi jeskaseda duira gij mod oskusk noba danggos morototuma jera Bua ojgomu!"
34Beda Yesus agot gu ofa oida, "Petrus, bua bisinsa bumorot keingging gu rusnok rot ofosma juomu oida bua binejginaga rot Didif guru."
35Erek koma beda Yesus agot gu efen ruforoker oida, "Sis fob Didif dumbk iwa jah monuh yes. Noba gij mona insa koma bera Didif danggot gu iwa oida inorka fifi ni, mesina ni, sepatu eneya tein guru. Noba gij mona ongga iwa inja fob bera iwa ita mar nomnaga ongga iwa incosu rot gij mona insa koma tein fob ei?" Beda rua ruroun oida, "Tuhan, memef meita mar ongga adaij fob."
36Beda Yesus agot gu rua oida, "Erek koma, tina ebeibeyaif bera iwa yurka yeyin fifi jera mesina ojgomu. Noba erek iwa yeyin meiteb aksa egema guru, beda yuhu yeyin meisoufa eneya fogora irengk meiteb aksa tein.
37Jeska runggu gij Mar Efeyi Ebsi sis fob oida, 'Rusnok rucunc Ofa erek osnok egens ongga ofogog tein.' Mar insa koma bera osok gij Didif. Noba mar koma bera emah gij efera tein fob si."
38Beda Yesus efen ruforoker ragot oida, "Tuhan, meiteb aksa egeka bera enahif fob!" Beda Yesus agot oida, "Koma adaij nou."
39Erek koma beda Yesus eja jeska kota koma noba eja jah memaga ofos Zaitun erek giskini. Noba Ofa efen ruforoker tein rija morototuma jera Ofa.
40Nou ongga rua rinsaga jah suma fob, beda Yesus agot gu rua oida, "Iwa yum iteij jeskaseda iwa inesiri gij mar ongga oska ongga emereni iwa guru."
41Erek koma beda Ofa eja ai yes jeska rua.
42Beda Ofa es okeibi gu mebi noba om eiteij oida, "Akeina, erek Bua budou os rot beda bita mar ongga emeita efera okora gu Didif jeska fog. Tina Bua bineita mar ongga Didif dudou os rot ojgomu guru. Tina Bua bita mar ongga Akeina budou ejginaga rot ojgomu."
43Beda malaikat egens jeska mebaga orogna skoita Yesus noba eita owesa efek gu Ofa.
44Yesus odou efesi okumkum eteb rot mar okum ongga emah keingg Ofa, jefeda Ofa om eiteij rot tentenmen ojgomuja. Beda ebirfeka erek ogufu ongga eya jah mebi.
45Nou ongga Yesus om eiteij oisa fob, beda Ofa oksons skoita efen ruforoker. Tina rua nomnaga rah ahaingkongka ros, jeska rudou okum noba rufonskos tein.
46Beda Ofa agot gu rua oida, "Teinefo fogora iwa inahca erek komo? Iwa isowu noba yum iteij jeskaseda mar egema enereni iwa tein guru!"
47Askesi Yesus enagot mar gu efen ruforoker ros, beda rusnok ebic egens rin skoita Ofa. Yudas, osnok egens jeska Yesus efen ruforoker, ofa bera oroun rua skoita Yesus. Beda Yudas eja skoita Yesus noba onsa Ofa omnu erek oisu Ofa.
48Tina Yesus agot oida, "Yudas, bua bunsa Didif fogora bikikif jeska Didif, Rusnok Efesei?"
49Nou ongga Yesus efen ruforoker rik oida ai juens beda rusnok insa koma rimagei Yesus, beda rua ragot oida, "Tuhan, memef mera meiteb aksa meragob rua ei!"
50Beda Yesus efen oforoka egens agei efen meiteb aksa eragob osnok egens jeska rusnok ebic insa koma beda eris efen osuw jah ognosk fogora esiri gu mebi. Osnok egens koma bera ongga omfij ebirfaga imam ongga ofoka aksa.
51Tina Yesus ois oida, "Iwa ineita erek koma guru!" Beda Ofa ahtec osnok egens koma efen osuw fogora osuw koma eskeira sons.
52Beda Yesus agot gu ebirfager imam-imam jera ebirfager tentarer ongga rut joug Mod Allah jera ebirfager Yahudi rineya oida, "Didif dunoh mosoruk ofoka erek rusnok ongga rufogog guri, jefeda teinefa fogora iwa yurka meiteb aksa jera moskur jeskaseda yagei Didif erek komo?
53Gij orofosut mona bera Didif diker jera iwa gij momas ongga angh rejrej Mod Allah, tina iwa inagei Didif jah suma guri! Tina mona eimofoj ongga Allah anggot rot sis fob bera ensaga fob. Ebeibeyaif iwa ita mar ongga ofogog gij motkobah kef ojgomuja."
54Erek koma beda rusnok insa koma ragei Yesus noba ruroun Ofa skoita mod ongga ebirfaga imam ongga ofoka aksa eteb efen. Noba Petrus otoij rua erek ai yes.
55Rusnok rukub mah gij momas ongga angh rejrej mod egens koma. Noba Petrus ejeker morototuma jera rusnok ongga riker rejrej mah insa koma.
56Beda ojaga egens ongga omfij imam-imam jah suma ek Petrus eneker gu mah efembra. Ofa ohobut Petrus beda agot oida, "Osnok egens kef tein ongga ororu Yesus koma."
57Tina Petrus orot keingging rot mar insa koma ojgomu. Ofa agot gu ojaga egens koma oida, "Asoka, didif dinejginaga rot Ofa koma guru!"
58Ai juens deika beda osnok egens egema ek Petrus noba agot oida, "Bua tein jeska rua ongga ruroru Yesus koma!" Tina Petrus oroun gu ofa oida, "Didif jeska rua insa koma guru!"
59Erek aras egens deika beda osnok egens ois oida, "Tenten, osnok egens kef tein bera erek Yesus efen oforoka ojgomu, jeska ofa tein efen oga jeska rua ongga monuh Galilea!"
60Beda Petrus oroun oida, "Didif dinejginaga rot mar ongga bua banggot koma guru!" Askesi Petrus enagot mar insa koma ros, beda mongkukar orna oga fob.
61Erek koma beda Tuhan Yesus ekikif noba ohobut Petrus. Beda Petrus odou ah keingg rot mar ongga Yesus anggot gu ofa sis fob oida, "Deisef erek mongkukar orna onoga enesi, beda bua bumorot keingging rot ofosma orgomu gu rusnok oida bua bera binejginaga rot Didif guru."
62Beda Petrus eja orogna jeska momas egens koma noba ebisa eteb rot mar insa koma.
63Rusnok ongga rut joug Yesus rahaisomu rot Ofa noba rubu Ofa tein.
64Rua rira meifeti rurond efen eiteij beda rijeka gu Ofa oida, "Bua birek nabi egens ei, jefeda bagot gu memef rot idu bera ongga obu Bua koma ojgomu!"
65Beda rua ruga oruh Ofa rot mar ofoukou tein.
66Gij rahah tentena beda ebirfager Yahudi jera ebirfager imam-imam jera Guru-Guru agama rumohoturuma. Beda rusnok ruroun Yesus skoita rua.
67Beda rua ragot gu Ofa oida, "Bua bera Kristus egens koma ongga emen ei era gurei. Bagot rot koisoisa ojgomu?" Beda Yesus oroun gu rua oida, "Erek Didif dagot gu iwa oida Didif bera Kristus koma ongga emen, beda iwa idou inororu Didif rot guru.
68Noba erek dijeka gu iwa rot mar insa koma tein, beda iwa inoroun gu Didif rot guru.
69Tina ebeibeyaif Didif, ongga Rusnok Efesa, bera dimeker jah Allah ognosk. Ofa bera efen ofoka ongga aksa eteb."
70Beda rua rijeka gu Ofa oida, "Bua bera Allah efesa ei?" Beda Yesus oroun oida, "Mar ongga iwa yagot koma bera tenten ojgomu."
71Beda rua ragot moguma oida, "Erek koma jefeda munohca rot efen mar ongga oska deika guru, jeska mar ongga Ofa anggot koma bera erek oska!"
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel