1Rusnok jeska ebic Farisi jera rineya ongga Guru-Guru agama rin skoita Yesus jeskaseda rijeka gu Ofa rot mar. Tina rua rudou os rucunc Ofa erek oska rot mar ongga Ofa otunggom ojgomu. Jefeda rua ruis gu Ofa jeskaseda Ofa otunggom mar onswos egens ongga orocunc rot oida Ofa bera en jeska Allah rot tenten.
2Beda Yesus oroun gu rua oida, "Giskini, nou mona ongga mowa ensiri gij, beda iwa ijginaga rot oida monog bera mos enes guru, jeska mocgoj ofog eja fob.
3Noba gij rahah beda iwa ijginaga rot oida ai juens mos emes jeska mocgoj ofoukou fob. Iwa ik mebaga beda iwa ijginaga rot oida mos emes era enes guru. Tina teinefa fogora idou enebriyi gij mar ongga Didif dutunggom guri. Jeska mar koma bera orocunc rot oida mona ongga Allah ofoka ereij keingg efen rusnok ensaga doida fob.
4Rusnok ongga riker gij mona ebeibeyaif bera rerin rudou ongga ofogog, noba rua runororu Allah rot tenten jinaga guru. Iwa yuis gu Didif jeskaseda ducunc mar onswos egens nou iwa. Didif dunocunc mar onswos egema tein nou iwa guru. Tina mar onswos egens ongga iwa imek rot bera morototuma erek mar onswos ongga Allah oncunc rot Yunus gij mona ongga ofa engker gij mos eteb efesi nou mona orgomu sis fob ojgomu." Beda Yesus eja jeska rua.
5Gij mona ongga Yesus jera efen ruforoker rija jah meren enama, beda rua runorka roti ofog egema deika guru jeska rudou ofoj joug rot.
6Beda gij mona insa koma Yesus agot gu rua oida, "Iwa yut joug idou efesi ahais jeska rua ongga ebic Farisi jera ebic Saduki rot rerin roti efed ongga orok mokcin roti ofog nomnaga."
7Beda rua ragot moguma oida, "Ofa agot mar erek insa koma jeska memef monorka roti ofog egema guru ei."
8Yesus ejginaga rot mar ongga rua ranggot moguma insa koma fob, jefeda Ofa agot gu rua oida, "Teinefa fogora iwa inagot mar moguma osok gij roti erek komo. Erek idou onororu Didif rot tenten enesei.
9Iwa idou enebriyi gij rot dedin owesa efek enesei. Gij mona ongga Didif dikeba roti ofog cinja nou rusnok runer rufok ribu cinja sis fob, beda iwa ihoturu maat insa koma efen ofod erek ofoukou doska.
10Noba gij mona ongga Didif dikeba roti ofog cinja erfeka nou rusnok runer rufok ribu tohkuru fob, beda gij mona insa koma iwa ihoturu maat koma efen ofod ofoukou doska tein.
11Iwa ik mar onswos ofoukou ongga Didif duntunggom fob. Jefeda teinefa fogora iwa idou enebriyi gij rot oida mar ongga Didif danggot insa koma rot bera osok gij rusnok ongga ebic Farisi jera Saduki tein guri. Mar koma bera onosok gij roti guru. Jeska Didif danggot rot oida, iwa yut joug idou efesi ahais rot rua ongga ebic Farisi jera ebic Saduki rot rerin roti efed ongga orok mokcin roti ofog nomnaga."
12Erek koma beda Ofa efen ruforoker rijginaga rot oida Ofa eneisisi joug rua rot rusnok ebic Farisi jera ebic Saduki rerin roti efed guru. Tina koma erek orocunc rot oida Ofa eisisi joug rua rot mar ongga ofogog ongga rusnok ebic Farisi jera ebic Saduki ruftuftu rot ongga orok mokcin rusnok rufoukou.
13Yesus eja jah monuh egens ongga angh doida kota Kaisarea Filipi. Beda Ofa ejeka gu efen ruforoker oida, "Rusnok ragot oida Didif, ongga Rusnok Efesa, bera idu?"
14Beda rua ruroun oida, "Rineya ragot oida Bua bera Yohanes Pembaptis. Noba rineya ragot oida Bua bera erek nabi Elia ongga efena ebah sons deika fob. Noba rineya ragot oida Bua bera erek nabi Yeremia jeska mona ongga sis eteb fob."
15Beda Ofa ejeka gu rua oida, "Iwa isujohu rot oida Didif bera erek idu?"
16Beda Simon Petrus oroun oida, "Bua bera Kristus egens koma ongga emen. Jeska Bua bera Allah efen ebesa. Noba Ofa bera ongga efena ebah rot ah aibin."
17Beda Yesus agot oida, "Simon, oufamofa eteb rot bua ongga Yona efen efesa! Jeska mar ongga bua banggot insa koma rot tenten bera rusnok enjgineg runoftuftu rot gu bua guru. Tina Akeina Allah ongga engker gu mebaga bera oncunc rot mar insa koma gu bua fob ojgomu.
18Jefeda Didif dagot gu bua Petrus rot oida bua bimerek mamu egens ongga ahais. Noba Didif dimei dedin Mod Ari egens esij mamu ongga ahais koma si. Noba erek dedin rusnok rineya rimagos tina dedin rusnok Mod Ari rineya ongga rimeker rot ahais ojgomuja.
19Didif dimeita owesa efek eteb gu bua erek osnok egens ongga agei gusin nou montoj ongga ohoda jeska mebaga. Noba mar ongga bua biyahehir joug gu mebif bera emah erek koma gu mebaga tein. Noba mar ongga bua buitij rot gu mebif bera emah erek koma gu mebaga tein."
20Erek koma beda Yesus eyahehir joug efen ruforoker jeskaseda rinagot gu rusnok enjgineg rot oida Ofa bera Kristus egens koma ongga emen guru.
21Osokeij mona insa koma bera Yesus agot rot tomnomna gu efen ruforoker oida, "Didif dimeja jah kota Yerusalem. Beda ebirfager Yahudi jera ebirfager imam-imam jera Guru-Guru agama rimeita mar okum gu Didif fogora difera okora eteb rot. Beda rusnok rimagob Didif, tina gij mona orgomu deika, beda Didif dimedebecki sons jeska dagos si."
22Erek koma beda Petrus agot gu Yesus oida, "Tuhan, didif duis gu Allah jeskaseda rua rineita mar ongga oska insa koma gu Bua jinaga guru!"
23Beda Yesus agot teisis gu Petrus oida, "Setan, bua bija jeska Didif ojgomu! Bua budou os biragou joug moroju ongga Didif dimecira gij ojgomu. Mar ongga bua busujohu bera enen jeska Allah guru. Mar koma bera en jeska rusnok rudou efesi ojgomu."
24Beda Yesus agot gu efen ruforoker oida, "Osnok egens ongga odou os ororu Didif erek dedin oforoka egens, beda ofa onosujohu rot mar ongga ofa esinsa ondou os rot ojgomu guru. Tina ofa esejah odou efesi rot mar ongga eita efera okora gu ofa erek osnok egens ongga ok mega salib fogora eita efera okora noba anggos tumu tein. Ofa eita mar erek koma beda ororu Didif ojgomu.
25Jeska osnok egens ongga osujohu rot esinsa efen eiteij ah ojgomu noba onororu Didif guru, beda efen eiteij ah koma emeseiseifa si. Tina erek osnok egens efen eiteij ah eseiseifa, jeska ofa ororu Didif, beda ofa koma emesma eiteij ah ongga ah aibin si.
26Noba erek osnok egens ohoturu mar ofoukou nou efen eiteij ah kef, tina ofa enesma eiteij ah ongga efeinah guru, jeska ofa onororu Didif guru, beda mar ongga ofa onghoturu insa koma onofij ofa tein jinaga guru. Ofa eneita mar egema tein jeskaseda eita eiteij ah ongga efeinah insa koma guru.
27Jeska Didif, Rusnok Efesa, bera emen rot owesa efek jera Akeina efen malaikat-malaikat tein. Beda Didif dimeita ofons gu rusnok ororu jeni rerin rita mar fob.
28Ongga tenten bera, rusnok rineya rufoukou jah sif rinagos guru onjoros rua rik Didif, Rusnok Efesa, din rot owesa efek erek raja egens."
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel