1Yesus efesij rot mar ongga orocunc egens oida, "Mona ongga Allah ofoka ereij keingg rusnok bera erek kef: Gij mona juens erek rahah tentena osnok egens bera eja jeskaseda ruhca rusnok nou rufij ofa gij efen mekeni.
2Ofa oitij nou oh rusnok koma rerin rufons erek fifi perak egens gij mona egens erek giskini. Beda ofa obk rua jeskaseda rifarur gij efen mekeni anggur.
3Erek aras orgomu deika beda ofa eja jah pasar. Beda ofa ek rusnok egema deika jah suma ongga rerin rifarur enah guru.
4Jefeda ofa agot gu rua oida, 'Iwa tein ija noba ifarur gij dedin mekeni, beda didif dumoh yeyin ifons ongga erek adaij nou si.'
5Beda rua tein rija noba rifarur gij osnok egens koma efen mekeni. Erek mowa ot deis, beda ofa obk rusnok egema deika jeskaseda rifarur gij efen mekeni. Noba erek moworu fob, beda ofa obk rusnok egema deika jeskaseda rifarur gij efen mekeni.
6Beda gij moworu insa koma erek aras cinja fob beda ofa ek rusnok egema deika gu pasar ongga rerin rifarur enah guru. Beda ofa agot gu rua oida, 'Iwa iker jah sif erek dektek fob rot meidu?'
7Beda rua ragot gu ofa oida, 'Rusnok runofra memef jeskaseda mefarur nou rua enesi.' Beda ofa agot oida, 'Jefeda iwa ija gu dedin mekeni beda ifarur jah suma nou didif ojgomu.'
8Ai juens deika beda erek motu fob. Jefeda osnok egens koma ois gu efen oforoka egens ongga ot joug rusnok ongga rifarur gij efen mekeni. Ofa agot gu efen oforoka egens koma oida, 'Buhoturu rusnok ongga rimfarur gij dedin mekeni fob, beda buh rerin rufons gu rua. Buh rufons skoita rua ongga rusokeij rifarur deisef erek moworu rot sismeni fog. Beda buh rufons skoita rua ongga rusokeij rifarur deisef erek mowa ot deis fob. Nou ongga koma oisa fob, beda buh rufons skoita rua ongga rusokeij rifarur deisef erek rahah tentena fob.'
9Beda rusnok ongga rusokeij rifarur erek aras cinja gij moworu fob bera risma fifi perak egens erek rerin rufons.
10Jefeda rua ongga rusokeij rifarur gij rahah tentena bera rusujohu rot oida rua rimesma fifi ekirsa jeska rua insa koma ongga rifarur erek mona estir si. Tina oforoka egens koma oh rua rerin rufons erek fifi perak egens tein ojgomu.
11Rua rita rerin rufons insa koma rot rusum oskusk. Beda ruga erahah moguma rot jera osnok egens koma ongga efen mekeni.
12Rua ragot oida, 'Rusnok koma bera rifarur gij bebin mekeni deisef erek aras egens ojgomu. Tina memef mefarur rot ahais gij bebin mekeni erek mona aksa eteb deisef fobo. Teinefa fogora rua risma rufons ongga erek edamokuma jera mefmen mofons tein erek komo!'
13Beda osnok egens koma oroun gu rua oida, 'Edohuji, didif dunorokrusa iwa rot yeyin ifons insa koma jinaga guru. Jeska rahah insa koma bera didif dagot gu iwa rot oida dumoh yeyin ifons erek fifi perak egens nou mona egens, noba iwa yuitij rot ojgomu fob.
14Jefeda iwa ita yeyin ifons insa koma noba ija jah yeyin mod rot idou ongga eskeira ojgomu. Erek didif dudou os dita rusnok ongga rifarur gij mona estir fifi perak egens tein, beda enadaij nou iwa ita idou ongga oska skoita didif rot guru. Jeska didif duga eris rot mar insa koma ojgomu. Jefeda iwa ineita idou ongga ejisei rot rua jeska didif ducunc dudou ongga oufamofa skoita rua erek koma guru.' "
15(20:14)
16Beda Yesus agot rot omoisa oida, "Jefeda rusnok ongga ruhca rufoka ongga aksa gij mona ebeibeyaif bera gij mona ongga emen runofoka aksa deika guru. Noba rusnok ongga runohca rufoka ongga aksa gij mona ebeibeyaif guru bera rimesma rufoka ongga aksa gij mona kahma ongga emen si."
17Askesi Yesus ecira jah kota Yerusalem, beda Ofa ohoturu efen ruforoker rufok setka kungkob erfeka ojgomu jeskaseda efesij mar gu rua.
18Ofa agot oida, "Iwa ig Didif duga rot iskusk fog. Ebeibeyaif mimif minja jah kota Yerusalem. Beda rusnok jah suma rimaha Didif, Rusnok Efesa, gu ebirfager imam-imam jera ebirfager Guru-Guru agama si. Beda rua rumoga ojga rot oida Didif dagos ojgomu.
19Beda rua rimaha Didif skoita rusnok ongga Yahudi guru. Rua koma bera rifena omoskoreta rot Didif ni, rimera marfeb rimangha Didif ni, beda rua rumotob Didif tumu mega salib ni, beda dimagos si. Tina gij mona orgomu deika fob, beda Didif dimedebecki sons jeska dagos si."
20Zebedeus efen mohona en skoita Yesus morototuma jera ofa efen efeserga Yakobus jera Yohanes. Beda ofa ougif gu Yesus noba agot oida ofa odou os erejgei Yesus rot mar egens.
21Beda Yesus agot gu ofa oida, "Bua budou os meidu?" Beda ofa agot oida, "Akeina, bagen gu didif rot oida dedin edeserga egens bera geker gu bugnosk noba gegema geker gu bigris gij mona ongga Bua bufoka ereij keingg rusnok erek raja fob."
22Beda Yesus agot gu goga oida, "Goga godou enebriyi gij mar insa koma ongga gegan gosu erejgei gu Didif rot enesi. Goga goitij rot geita gefera okora eteb erek Didif dimeita difera okora eteb tein ei?" Beda goga gagot oida, "Magef maitij rot maita mar erek koma tein."
23Beda Yesus agot gu goga oida, "Tenten, gij mona kahma beda goga gemeita gefera okora erek Didif si. Tina Didif dinagot rot idu ongga engker gu dugnosk jera digris guru. Jeska Allah esinsiyai bera ongga omocunc rot idu ongga emeker gu dugnosk jera ongga emeker gu digris."
24Nou ongga Yesus efen ruforoker rufok setka ongga enjgineg rig rot mar insa koma fob, beda rua rudou okum skoita goga koma.
25Jefeda Yesus ohoturu efen ruforoker nomnaga beda agot gu rua oida, "Iwa ijginaga rot oida rusnok ongga Yahudi guru rerin ebirfager ongga rut keingg rusnok koma rot rerin owesa efek eteb. Noba rua rufoka ereij keingg rusnok koma rot rufoka ongga aksa eteb tein.
26Tina iwa ineita mar jah gu ifekesa erek ribirfager insa koma rita mar guru. Ongga tenten bera, osnok egens jeska iwa ifekesa ongga odou os esma ofoka ongga aksa jeska Allah, beda ofa oin keingg odou efesi sismeni fog, fogora ofij rusnok enjgineg tein.
27Noba osnok egens ongga odou os jeskaseda Allah ofra efen ofoka erek aksa ekirsa jeska rineya, beda ofa ofij rusnok nomnaga ojgomu.
28Jeska Didif, Rusnok Efesa, dinen jeskaseda rusnok enjgineg rufij Didif ojgomu guru. Tina Didif din jeskaseda dufij rusnok enjgineg. Noba Didif tein din jeskaseda daha disinsa gu rusnok ongga rufogog fogora rimagob Didif. Beda oisouska mar koma bera rusnok rufoukou rimesma eiteij ah ongga ah aibin."
29Nou ongga Yesus jera efen ruforoker rinja jeska kota Yerikho, beda rusnok rufoukou ruroru Ofa tein.
30Gij mona insa koma bera gosnok gegeka ongga geiteij ofou gengker gu moroju efembra. Rua rig jeska rusnok enjgineg oida ai juens beda Yesus emerabj goga. Jefeda goga gois rot goga eteb oida, "Tuano! Bua ongga bunjuj jeska raja Daud, bucunc budou ongga okora rot magefo!"
31Rusnok enjgineg jah suma ritaha joug goga jeskaseda goga geker toumou ojgomu. Tina goga gois rot goga ongga eteb ekirsa deika oida, "Bua ongga bunjuj jeska raja Daud, bucunc budou ongga okora rot magefo!"
32Beda Yesus ot jah suma noba ois gu goga jeskaseda gen skoita Ofa. Beda Ofa agot gu goga oida, "Goga godou os jeskaseda Didif dita mar meidu nou goga?"
33Beda goga goroun oida, "Tuan, magef madou os jeskaseda Bua bita eskeira gu maiteij fogora mak mar ojgomu."
34Yesus odou okora rot rua, jefeda Ofa ahtec goga geiteij. Beda ainsa koma tein goga geiteij erek eskeira noba gek mar fob. Beda goga tein gororu Ofa.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel