1Gij mona ongga Sabat egema deika beda Yesus oira sons gij mod ongga rusnok Yahudi rum riteij gu Allah gij. Osnok egens efen etma jah enama ongga ofumbohah bera eker jah suma.
2Noba rineya jeska ebic Farisi ongga ringker jah suma ruhobut joug Yesus jeskaseda rik oida Ofa eita eskeira gu osnok egens insa koma ei era gurei. Jeska koma bera erek Ofa ekirsa rot rerin agama erebent. Beda rua rumocunc Ofa erek oska rot tein.
3Erek koma, beda Yesus agot gu osnok egens ongga efen etma jah enama ofumbohah insa koma oida, "Bua bin noba but jah sif, jah rusnok nomnaga rudou."
4Beda Yesus ejeka gu rusnok ongga ringker jah suma oida, "Ororu mifmin hukum agama bera mimif mutunggom mar erek meidu gij mona ongga Sabat insa kefo? Mimif mita mar ongga oska ei, era mutunggom mar ongga oufa ei? Koma bera, mimif muskotu rusnok jeska rerin mar ongga okum erek insa koma ei, era mimif murouns rua riker gij rerin mar ongga okum ojgomuja onjoros ragos rot ei?" Tina rua ongga Farisi insa koma nomnaga riker toumou ojgomu.
5Beda Yesus odou okum eteb rot rua jeska ribirfaga ombrera noba rudou onokora rot osnok egens koma ongga efen etma jah enama ofumbohah guru. Jefeda Ofa agot gu osnok egens koma oida, "Bua busk bebin bitma koma." Osnok egens insa koma osk efen etma noba ainsa koma tein efen etma eskeira fob.
6Nou ongga rusnok ebic Farisi rurogna jeska mod insa koma fob, beda rua rumohoturuma rot ebeirens jera rusnok rineya ongga erek raja Herodes efen ruforoker jeskaseda rifesij moguma rot teinefa rua rimagob Yesus.
7Yesus jera efen ruforoker rija jeska monuh insa koma, beda rua rija jah meren Galilea efembra. Noba gij mona insa koma bera rusnok rufoukou doska jeska monuh Galilea ruroru Yesus jah suma tein.
8Rusnok rufoukou jeska kota Yerusalem jera kota-kota enjgineg jeska monuh Yudea ni, monuh Idumea ni, jera rineya ongga jeska monuh ongga angh jah mei Yordan enama ni, rineya ongga jeska kota Tirus jera kota Sidon ni bera rin skoita Yesus jeskaseda rik rot mar onswos ongga Ofa ontunggom fob.
9Beda Yesus obk efen ruforoker jeskaseda risejah meg egens nou Ofa, jeska rusnok riskembemba rin odudu deika skoita Ofa noba riker rejrej Ofa. Jefeda Ofa odou os eker gij meg efesi gu esinsa noba oftuftu rua jeska meg insa koma ojgomu.
10Erek koma, jeska Ofa eita eskeira gu rusnok rufoukou fob, jefeda rusnok enjgineg ongga marenir rin noba rut rejrej Ofa tein. Noba erek rua rahtec Ofa efen meisoufa tumu efen efaga, beda rua tein rita eskeira fob.
11Noba nou ongga rusnok enjgineg ongga efena ofogog engker gij rudou efesi ringk Yesus, beda efena ofogog insa koma okoja rua jeskaseda risiri jah Yesus odou noba ragerir oida, "Bua bera Allah efen efesa!"
12Tina Yesus agot joug efena ofogog insa koma rot ahais jeskaseda rinagot mar guru.
13Yesus eja jah memaga ofos. Beda Ofa ois gu runer rineya ongga Ofa odou os rijerek efen ruforoker ongga rumofij Ofa.
14Nou ongga rua rin skoita Ofa fob, beda Ofa ocunc runer rufok setka kungkob erfeka jeskaseda rijerek efen rasul-rasul. Ofa ocunc rua insa koma jeskaseda ruroru Ofa fogora rua tein rujoftuftu rusnok noba rikemeji efena ofogog ongga engker gij rusnok rudou efesi rot owesa efek jeska Allah tein.
15(3:14)
16Runer setka kungkob erfeka insa koma ongga Yesus oncunc erek efen rasul-rasul fob bera rufoka erek kef: Simon (ongga Ofa ejeka ofoka Petrus tein) ni,
17Yakobus jera efen mokosa Yohanes, ongga Zebedeus efen efeserga ni, (Ofa ejeka goga koma erek Boanerges, ongga efen ofou oida, "Moc ogugur efen oforoka"),
18Andreas ni, Filipus ni, Bartolomeus ni, Matius ni, Tomas ni, Yakobus ongga Alfeus efen efesa ni, Tadeus ni, Simon ongga jeska Yahudi ebic egens ongga ofoka Zelot ni,
19jera Yudas ongga ojga jeska kota Iskariot ni. Gij mona kahma ofa bera ongga odou emekikif jeska Yesus tein.
20Yesus oksons jah mod egens ongga Ofa engker gij. Beda rusnok rufoukou rin skoita Ofa jah suma tein, jefeda Ofa jera efen ruforoker rineker keingg rufons era rinet maat oskiyai tein jinaga guru.
21Erek koma jefeda, rusnok enjgineg ongga riker jah suma bera ragot osok gij Yesus oida, "Merei ok osnok egens kef ojgomu!" Nou ongga Yesus efen ebskir ringg rot mar insa koma, beda rua rin skoita Yesus jeskaseda ruroun Ofa sons jah efen kota Nazaret.
22Erek koma beda Guru-Guru agama ongga rin jeska Yerusalem ragot oida, "Beelzebul, ongga erek ebirfaga nou efena ofogog nomnaga bera oira gij Ofa odou efesi fob. Jefeda Ofa esma owesa efek jeska Beelzebul fogora ekemeji efena ofogog jeska rusnok rudou efesi ojgomu."
23Jefeda Yesus ohoturu Guru-Guru agama insa koma nomnaga. Beda Ofa efesij mar ongga orocunc gu rua erek kef oida, "Teinefa fogora iwa inagot mar erek komo? Bilis (ongga ofoka Beelzebul tein) bera enekemeji efena ofogog enjgineg jeska rusnok rudou efesi jinaga guru, jeska Bilis jera efena ofogog insa koma bera erek egens ojgomu.
24Erek rusnok ongga ringker gij monuh egens risinsa rimagobuma, beda gij mona kahma rusnok insa koma rimekebema rot si.
25Erek koma tein, erek rusnok ongga ringker gij mod etma egens rimagobuma, beda mod etma egens insa koma emesiri ojgomu noba rusnok insa koma rineker erek egens deika guru.
26Beda erek koma tein rot efena ofogog. Erek efena ofogog nomnaga ongga ruroru Bilis koma rimagobuma, beda rua rineker erek egens deika guru, noba runofora efek tein deika guru.
27Erek koma tein, erek osnok egens odou os eita mareibra jeska mod ongga osnok egens ongga ofora efek efen, beda sismeni bera ofa emagei osnok egens ongga ofora efek insa koma, noba erakid efen etma tein rot ahais fog, fogora ofa emeita efen mareibra nomnaga jeska efen mod insa koma."
28Beda Yesus agot gu Guru-Guru agama insa koma deika oida, "Erek rusnok rita mar ongga oska noba ruga oruh Allah tein, beda Allah omosuna rot mar ongga oska insa koma jeska rudou efesi tein.
29Tina erek rusnok ruga oruh Efena Ebsi Allah, beda Allah onosuna rot mar ongga oska koma jeska rudou efesi jinaga guru."
30(Yesus agot mar erek insa koma, jeska Guru-Guru agama koma ragot oida Ofa esma owesa efek jeska Bilis ojgomu, noba enesma owesa efek jeska Efena Ebsi Allah guru.)
31Erek koma beda Yesus efen mosu jera mokoser rin skoita Ofa. Nou ongga rua rinsaga fob, beda rua riker jah mebah. Beda rua rubk osnok egens jeskaseda agot gu Yesus oida rua rinsaga jah suma fob.
32Gij mona insa koma bera rusnok rufoukou ringker rejrej Yesus jeskaseda rig rot mar ongga Ofa oftuftu. Erek koma beda rineya ragot gu Ofa oida, "Akeina, mosib jera obkoser rineker jah mebah kef. Rua ruhca Bua."
33Beda Yesus agot oida, "Didif dimagot gu iwa rot rusnok idu bera ongga erek dedin ameiner jera edkoser."
34Beda Ofa eyajga joug efen ruforoker ongga ringker rejrej Ofa noba agot oida, "Rusnok kef ongga ringker rejrej Didif bera erek dedin ameiner jera dedin edkoser.
35Jeska rusnok ongga rutunggom mar ongga Allah ondou os rot bera erek dedin edkoser jera dedin edieser jera dedin ameiner tein."
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel