Alkitab Mobile SABDA
[VER] : [MEYAH]     [PL]  [PB] 
 <<  Markus 8 >> 

1Gij mona insa koma bera rusnok riskemba rumohoturuma rejrej Yesus deika. Beda rusnok koma rerin maat nomnaga oisa jeska rua fob. Jefeda Ofa ois gu efen ruforoker noba agot gu rua oida,

2"Dudou okora rot rusnok kef, jeska rua ringker jera Didif jah sif gij mona orgomu fob, noba rerin maat tein nomnaga oisa jeska rua fob.

3Noba erek Didif dubk rua sons gu rerin monuh, beda rineya rujosra rot mosona gu moroju osubu deis, jeska rerin maat egema nou rua guru. Noba rua rin jeska rerin monuh ongga ah yes."

4Beda Yesus efen oforoka egens agot oida, "Monuh ongga mineker gij kef bera owowa. Erek mimif muhca nou maat beda enadaij nou rusnok riskemba kef tein jinaga guru."

5Beda Yesus ejeka gu efen ruforoker oida, "Yeyin roti ofog egaho?" Beda rua ragot oida, "Mefmen roti ofog cinja erfeka."

6Beda Yesus ois gu rusnok riskemba insa koma oida, "Iwa nomnaga iker jah." Nou ongga rua ringker gu mebi fob, beda Ofa eita roti ofog cinja erfeka insa koma noba ois oufamofa gu Allah rot roti koma. Beda Ofa ekeba roti koma noba eita gu efen ruforoker jeskaseda rikeba dogdog gu rusnok jah suma. Beda efen ruforoker rikeba roti koma nomnaga gu rusnok riskemba insa koma.

7Yesus efen ruforoker rerin mos oskiyai tein. Jefeda nou ongga Yesus ois oufamofa gu Allah rot mos koma fob, beda Ofa agot gu efen ruforoker jeskaseda rikeba mos oskiyai insa koma tein gu rusnok jah suma. Jefeda rua rikeba mos oskiyai koma gu rusnok insa koma.

8Beda rusnok riskemba koma rint maat insa koma onjoros ereya rua fob. Beda Yesus efen ruforoker ruhoturu maat ofod ongga ok morungga eteb erek cinja erfeka. Gij mona insa koma bera rusnok rufok ribu tohkuru rint maat jah suma.

9Nou ongga koma oisa fob, beda Yesus obk rusnok riskemba insa koma jeskaseda ruksons jah rerin monuh.

10Ainsa koma tein, Yesus jera efen ruforoker rifef meg beda rija jah monuh Dalmanuta ongga angh gu meren Galilea enama.

11Jah suma bera rusnok Yahudi ongga ebic Farisi rineya rin skoita Yesus beda ruga omosokuma jera Ofa. Rua riradgodu Ofa jeskaseda Ofa otunggom mar onswos egens deika ongga orocunc rot oida Ofa efen owesa efek ongga en jeska Allah. Tina gij rudou efesi bera rua rusujohu rot oida erek Ofa otunggom mar ongga ekirsa rot Hukum Musa, beda rua rumocunc Ofa erek oska rot.

12Tina Yesus odou okum rot mar ongga rua rinjeka gu Ofa rot, jefeda Ofa agot oida, "Iwa ongga ebic Farisi bera ingk mar ofoukou ongga Didif duntunggom nou rusnok fob. Jefeda teinefa fogora iwa ineradgodu Didif jeskaseda dutunggom mar onswos deika erek komo. Ongga tenten bera, Didif dunotunggom mar ongga onswos egema tein nou iwa deika guru."

13Beda Yesus eja jeska Farisi insa koma, noba Ofa jera efen ruforoker rifef meg. Beda rua ruksons jah meren Galilea enama deika.

14Yesus jera efen ruforoker rifef meg insa koma tina ruforoker rudou ofoj joug nou rumorka maat egema deika. Rerin roti ofog egens ojgomu ah gij meg efesi insa koma.

15Jefeda Yesus agot rot mar ongga orocunc gu efen ruforoker erek kef oida, "Iwa yut joug idou rot efesi ahais ojgomu jeska rua ongga Farisi jera raja Herodes rerin roti efed ongga orok mokcin roti ofog nomnaga."

16Tina rudou eineina gij rot mar ongga Ofa anggot insa koma ros, jefeda rua ragot moguma oida, "Ofa agot erek koma jeska mifmin roti enadaij guru ei?"

17Yesus ejginaga rot mar ongga rua rimfesij moguma rot, jefeda Ofa agot gu rua oida, "Dudou okum rot iwa jeska iwa isujohu rot oida mar ongga Didif danggot insa koma bera osok gij roti ojgomu. Iwa ingk mar onswos ongga Didif duntunggom sis fob, noba erek iwa inosujohu rot osok gij mar koma deika gurei. Jeska iwa inosujohu rot oida dedin owesa efek ongga adaij jeskaseda dita maat egema gu iwa tein gurei.

18Didif dudou okum rot iwa jeska iwa ik mar ongga Didif duntunggom sis fob, tina idou enebriyi gij mar insa koma rot koisoisa enesei. Noba iwa ingg mar ongga Didif dumftuftu fob tina idou enebriyi gij mar ongga Didif danggot rot koisoisa tein enesei.

19Noba idou ofoj joug rot roti ofog cinja ongga dikeba gu rusnok rufok ribu cinja sis fob tein ei? Nou ongga rusnok insa koma rint maat ereyer fob, beda iwa ihoturu maat ofod egaho?" Beda rua ragot oida, "Maat ofod insa koma ongga Memef mohoturu bera ok morungga eteb setka kungkob erfeka."

20Beda Yesus agot oida, "Noba teinefa rot roti ofog cinja erfeka ongga iwa ikeba gu rusnok rufok ribu tohkuru neeka. Nou ongga rusnok insa koma rint maat ereyer fob, beda iwa ihoturu roti ofod egaho?" Beda rua ragot oida, "Maat ofod insa koma ongga memef mohoturu bera ok morungga eteb cinja erfeka."

21Beda Yesus agot oida, "Dudou okum rot iwa jeska idou enebriyi gij rot mar ongga Didif duntunggom insa koma rot koisoisa enesi."

22Yesus jera efen ruforoker rifef meg egens insa koma onjoros rinsaga gu kota Betsaida. Jah suma bera rusnok ruroun osnok egens ongga efen eiteij ofou skoita Yesus. Beda rua ruis gu Yesus jeskaseda Ofa aha etma esij osnok egens insa koma fogora eita eskeira gu ofa.

23Jefeda Yesus agei osnok egens insa koma etma beda oroun ofa jeska kota koma. Beda Ofa oskurfi gij etma noba aha mar koma gij osnok egens insa koma efen eiteij. Beda Ofa aha efen etma esij osnok egens koma. Beda Yesus ejeka gu ofa oida, "Bua bik mar fob ei".

24Beda osnok egens insa koma oroun oida, "Didif dik rusnok ricira, tina rot koisoisa enesi. Rerin rifaga erek mega ofoj ojgomu ros."

25Beda Yesus ahtec osnok egens insa koma efen eiteij juens deika. Beda osnok egens insa koma ek juens deika, tina efen eiteij bera eskeira ojgomu fob. Noba ebeibeyaif ofa ek mar deika rot koisoisa fob.

26Nou ongga Yesus obk osnok egens insa koma gu efen mod beda Ofa agot oida, "Bua binagot gu rusnok gij kota rot mar ongga Didif duntunggom nou bua fob kef guru."

27Erek koma beda Yesus jera efen ruforoker rija jeska kota Betsaida. Beda rua rija monuh egens ongga angh doida kota Kaisarea Filipi. Askesi rua ricira raki jah monuh egens koma ros, beda Yesus ejeka gu efen ruforoker oida, "Rusnok rimfesij moguma rot oida Didif bera idu?"

28Rua ruroun oida, "Rineya ragot oida Bua bera Yohanes Pembaptis ongga emfena ebah sons. Noba rineya ragot oida Bua bera nabi Elia jeska sis eteb fob ongga Allah anggen oida omobk sons skoita rusnok."

29Beda Ofa ejeka gu rua oida, "Tina iwa isujohu rot oida Didif bera idu?" Beda Petrus oroun oida, "Bua bera Kristus ongga Allah omobk jeskaseda osuwa rusnok jeska rerin mar okum."

30Beda Yesus eyahehir joug efen ruforoker insa koma jeskaseda rinefesij rot mar ongga Petrus anggot insa koma gu rusnok enjgineg guru.

31Beda Yesus oftuftu mar gu efen ruforoker deika. Ofa agot oida, "Didif, Rusnok Efesa, bera dimeita difera okora eteb. Beda ebirfager Yahudi, jera ebirfager imam-imam jera ebirfager Guru-Guru agama rumokoja Didif tein. Beda rusnok rimagob Didif. Noba gij mona orgomu deika, beda Didif dimedebecki jeska danggos sons."

32Yesus anggot mar insa koma gu rua, beda Petrus oroun Yesus gu gesinsa noba ofa etaha joug Yesus rot mar ongga Ofa anggot insa koma.

33Tina Yesus ekikif noba eyajga efen ruforoker, beda Ofa agot rot ahais gu Petrus oida, "Petrus, bua bija jeska Didif ojgomu! Jeska mar ongga bua busujohu rot insa koma bera erek Bilis ondou os rot tein. Mar ongga bua busujohu rot koma bera ongga rusnok rudou os rot tein, tina koma bera enerek mar ongga Allah odou os rot guru."

34Beda Yesus ohoturu rusnok rufoukou jera efen ruforoker noba agot gu rua oida, "Erek osnok egens odou os ororu Didif erek dedin oforoka egens, beda ofa onosujohu rot mar ongga ofa esinsa ondou os rot ojgomu guru. Tina ofa esejah odou efesi rot mar ongga emeita efera okora gu ofa erek osnok egens ongga ok mega salib fogora eita efera okora noba anggos tumu tein. Ofa eita mar erek koma beda ororu Didif.

35Jeska osnok egens ongga osujohu rot ofa esinsa efen eiteij ah ojgomu noba onororu Didif rot tenten guru, beda ofa efen eiteij ah koma emeseiseifa si. Tina erek osnok egens efen eiteij ah bera eseiseifa jeska ofa ororu Didif noba ejagot rot Allah oga ongga oufamofa tein, beda ofa koma emesma eiteij ah ongga ah aibin si.

36Noba erek osnok egens ohoturu mar ofoukou nou esinsa efen eiteij ah kef, tina eiteij ah kef bera eseiseifa ojgomu jeska ofa onororu Didif guru, beda mar ongga ofa onghoturu insa koma onofij ofa tein jinaga guru.

37Jeska erek efen eiteij ah insa koma eseiseifa fob, beda enadaij nou ofa otunggom mar egema tein jeskaseda eita eiteij ah insa koma sons deika jinaga guru.

38Gij mona insa kef bera rusnok rufoukou rineita mar ongga oska noba runororu Didif guru. Jefeda erek mojen rua rot Didif jera mar ongga Didif dimfesij tein, beda mojen Didif, Rusnok Efesi, tein rot rua fogora dumokoja rua jeska Didif ojgomuja. Didif dumotunggom mar erek koma gij mona ongga Didif dungksons rot dufoka ongga aksa eteb erek dedin Akeina efen ofoka ongga aksa eteb tein jera malaikat-malaikat ongga ebsi komowa tein."



 <<  Markus 8 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel