1Rusnok ongga Kristen nomnaga rugif gu rerin ebirfager ongga rufoka ereij keingg rusnok nomnaga gij rerin monuh ojgomu. Jeska owesa efek ongga rua rinsma jeskaseda rufoka ereij keingg rusnok bera en jeska Allah ojgomu. Rua rinesma owesa efek insa koma jeska rusnok enjgineg ojgomu guru. Jeska Allah bera ongga ocunc rot idu ongga ofoka ereij keingg rusnok.
2Jefeda erek osnok egens eretei rot ebirfager monuh insa koma, beda koma erek ofa eretei rot mar ongga Allah anggot rot tein. Beda ofa emesma mar okum rot ojgomu.
3Noba rusnok ongga rita mar ongga oufamofa ojgomu bera rinemeesa rot rerin ebirfager monuh guru. Tina rusnok ongga rita mar ongga erek oska bera rimeesa rot rerin ebirfager monuh ojgomu. Erek iwa ita mar ongga oufamofa ojgomu, beda iwa idou enemeesa rot yeyin ebirfager monuh guru. Beda rua rimesitit iwa rot yeyin ita mar ongga oufamofa insa koma si.
4Ebirfager monuh insa koma bera erek rusnok ongga Allah oncunc fob. Noba Ofa ocunc rua jeskaseda rita mar ongga oufamofa skoita iwa ojgomu. Tina erek iwa ita mar ongga oska, beda iwa imeesa rot rua ojgomu. Jeska rua rerin owesa efek jeskaseda rufra mar okum keingg iwa rot. Rua bera ongga Allah oncunc jeskaseda rufra mar okum keingg rusnok ongga rutunggom mar ongga oska.
5Jefeda iwa yugif gu yeyin ebirfager monuh ojgomu. Noba iwa inougif gu rua jeska iwa imeesa rot rua ojgomu guru. Tina iwa yugif gu rua jeska koma bera erek mar ongga tenten ojgomu.
6Mimif muh pajak gu ebirfager monuh tein. Noba askesi rua rutunggom rerin mar erek insa koma beda koma erek rua rifarur nou Allah tein.
7Jefeda erek mar okowu eneya ongga ah gu iwa, beda iwa yuh mar insa koma sons ojgomu. Noba erek iwa inoh pajak gu yeyin ebirfager monuh enesi, beda iwa yuh mar insa koma gu rua ojgomu. Yugif gu yeyin ebirfager monuh fogora yufra rufoka erek eteb ojgomu.
8Erek mar okowu ongga ah gu iwa, beda iwa yuh mar okowu insa koma sons gu rusnok ongga rerin mar koma. Noba erek koma tein, mimif mudou omokorema ojgomuja. Jeska koma tein bera erek mar okowu ongga angh gu mimif nomnaga. Erek iwa idou okora rot rusnok enjgineg beda koma erek iwa iroru Allah efen hukum nomnaga fob.
9Hukum Allah agot rot oida, "Iwa inesiri jera egema efen mohona guru ni. Iwa inagob rusnok enjgineg guru ni. Iwa inokoreka mar guru ni. Idou eneftirir keingg rusnok enjgineg rerin mareibra guru ni." Noba oisouska hukum-hukum insa koma bera mimif mik hukum ongga efen ofoka egens ojgomu. Hukum egens koma bera oida, "Idou okora rot yeyin ihujir morototuma erek idou okora rot isinsa."
10Erek iwa idou okora rot rusnok enjgineg, beda iwa ineita mar ongga oska skoita rua guru. Jefeda rua ongga rudou okora rot rusnok enjgineg bera ruroru Allah efen hukum nomnaga fob.
11Iwa ita mar erek insa koma nomnaga, jeska mona ongga enja ejgwaga bera esaga doida fob. Iwa ita idou efesi ongga ensejah nou mar erek osnok egens ongga anghca bera osowu noba esba eiteij fob. Jeska mona ongga Yesus Kristus omoskotu mimif bera ensaga doida fob. Mona egens koma bera en doida ekirsa jeska meidu ongga mimif munsujohu rot sis fob.
12Miteij ah insa kef bera erek motkobah. Noba motkobah insa koma bera doida omoisa fob. Jeska gij mona ongga estir deika, beda Yesus omoksons en si. Beda gij mona insa koma mimif mumoira gij Yesus efen eisa tein. Jefeda mimif mineita mar ongga oska erek rusnok ongga ringker gij motkobah rutunggom ojgomuja guru. Tina erek tentarer ongga rira monska ofos ongga ontumba jeskaseda rut joug risinsa, beda erek koma tein mimif mita mar ongga oufamofa erek rusnok ongga rudou os ringker gij eisa ojgomu. Jeska koma bera ongga ot joug mifmin miteij ah tein.
13Mimif mita mar ongga ongkoska erek rusnok ongga ringker gij eisa ojgomu. Enadaij nou mimif muina maat keingg ojgomuja fogora mibirfaga erabibei rot mofut efei guru. Enadaij nou mimif misiri morototuma guru. Noba muga enemaksama guru. Mineita mudou efesi ongga ejisei moguma tein guru.
14Mimif mita mar morototuma erek Tuhan Yesus Kristus eita mar ojgomu. Noba munosujohu rot teinefa mimif mita mar ongga oska jeni mudou efesi osos rot guru.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel