1Mimif ongga minejekjeka mudou efesi rot mar insa koma guru bera muin keingg mudou efesi rot rusnok ongga rijekjeka rudou gij mar koma ojgomu. Enadaij nou mimif mutunggom mar ongga orotunggom misinsa mudou eskeira rot ojgomu, noba rua insa koma bera guru, erek koma guru.
2Tina ongga oufa bera mimif mutunggom mar ongga ereita mifmin muhujir rudou efesi eskeira rot ojgomu jeskaseda rudou ororu Yesus Kristus erek ahais ekirsa tein.
3Jeska Yesus Kristus onotunggom mar ongga ereita esinsa odou eskeira rot ojgomu guru. Tina Ofa esejah odou efesi jeskaseda eita efera okora nou rusnok enjgineg tein. Jeska runggu gij Mar Efeyi Ebsi rot oida, "Gij mona ongga rusnok ruga oruh iwa, beda koma erek ruga oruh Didif tein fob."
4Erek koma noba mar nomnaga ongga rua runggu gij Mar Efeyi Ebsi sis fob bera jeskaseda oroftuftu mimif rot. Mar ongga rua runggu insa koma bera orofij mimif jeskaseda muin keingg mudou efesi rot mar okum ongga ereneni mimif tein. Noba mar insa koma ereisisi joug mimif jeskaseda muisum gij Allah rot efen oga ojgomuja.
5Allah bera ongga eisisi joug mimif noba ofij mimif jeskaseda muroru Ofa rot ahais ojgomuja. Noba didif dum diteij gu Ofa jeskaseda Ofa omofij iwa fogora iker rot idou ongga eskeiramera morototuma ojgomu. Jeska koma jeni erek Yesus Kristus odou os rot tein.
6Beda yeyin idou emeja erek egens ojgomuja. Noba iwa imofra Allah efen ofoka ongga erek aksa. Ofa bera erek mifmin Tuhan Yesus Kristus efen meka.
7Erek koma jefeda, didif duis gu iwa jeskaseda iwa icunc idou ongga oufamofa moguma ojgomu. Jeska Yesus Kristus oncunc efen odou ongga oufamofa skoita iwa fob. Iwa ita mar erek koma jeskaseda rusnok enjgineg rimek fogora rumofra Allah efen ofoka erek aksa eteb tein.
8Yesus Kristus en gu mebif noba ofij rusnok Yahudi jeskaseda orocunc rot oida mar ongga Allah anggen rot skoita rerin rimower sis fob bera erek tenten ojgomu.
9Noba Ofa ontunggom mar insa koma jeskaseda rusnok ongga Yahudi guru rumofra Allah efen ofoka erek aksa. Jeska gij mona insa koma Ofa ocunc odou ongga oufamofa eteb skoita rua tein. Erek koma jeska runggu gij Mar Efeyi Ebsi oida, "Jefeda Didif dimesitit mar gu Bua morototuma jera rusnok ongga Yahudi guru. Didif dumof medemer rot oufamofa eteb gu Bua si."
10Noba mar enjgineg gij Mar Efeyi Ebsi bera agot oida, "Iwa ongga Yahudi guru ita idou ongga efaga ouka morototuma jera Allah efen rusnok ongga Yahudi."
11Noba mar enjgineg tein agot erek kef oida, "Iwa nomnaga ongga Yahudi guru yuis oufamofa eteb skoita Tuhan. Iwa nomnaga yuf medemer rot idou ongga efaga ouka skoita Ofa."
12Noba nabi Yesaya tein onggu gij Mar Efeyi Ebsi oida, "Raja efeinah ongga onjuj jeska rusnok Yahudi ebic Isai bera emen si. Ofa omofoka ereij keingg rusnok nomnaga ongga Yahudi. Noba rusnok ongga Yahudi guru bera rumoisum gij Ofa tein si."
13Didif dum diteij gu Allah jeskaseda Ofa omofij iwa. Beda iwa idou emerirei eteb noba imesma iteij ah ongga eskeiramera askesi iwa yuisum gij Allah ojgomuja. Beda oisouska owesa efek jeska Efena Ebsi bera iwa imoisum gij Ofa odudu deika rot mar ongga Ofa anggen rot si.
14Edohuji, didif dijginaga rot oida yeyin ita mar bera erek oufa ojgomu, jeska iwa ijginaga rot mar ongga Allah ondou os rot fob. Noba iwa ijginaga rot teinefa iwa imoftuftuma tein fob.
15Tina didif duncunc dudou efesi gij surat kef skoita iwa fob. Didif dita mar erek koma jeskaseda ereisisi keingg idou efesi rot mar insa koma nomnaga. Jeska Allah eita owesa efek gu didif rot odou ongga oufamofa jeskaseda duftuftu mar osok gij Yesus Kristus oga skoita rusnok ongga erek Yahudi guru tein.
16Didif dufij Allah fogora duftuftu rot efen oga ongga oufamofa skoita rua insa koma jeskaseda Allah omoroun rua rot efen odou ongga eskeiramera. Rua insa koma bera erek mar ongga imam egens orka skoita Allah jeskaseda orougif gu Ofa rot. Noba Ofa odou eskeira rot mar insa koma jeska koma bera en oisouska Efena Ebsi ojgomu.
17Jefeda didif dudou erirei eteb rot mar ongga didif dita nou Allah oisouska Yesus Kristus fob.
18Noba mar ofoka egens ongga didif dudou os difesij rot bera erek kef oida, oisouska mar ongga didif dumftuftu rot bera Yesus oroun rusnok ongga Yahudi guru skoita Allah fob. Rua ruroru Allah oga jeska didif dumfij gu rua noba dumftuftu rua rot Yesus efen oga fob.
19Noba rua rik mar onswos ongga didif duntunggom oisouska owesa efek jeska Efena Ebsi fob. Didif dumftuftu gu rua osok gij Allah efen oga ongga oufamofa osok gij Yesus Kristus jeska kota Yerusalem ojgomuja onjoros rejrej monuh Ilirikum tein. Jefeda didif dimfesij rot efen oga gij monuh insa koma oisa fob.
20Noba ebeibeyaif didif dudou os difesij rot Allah oga ongga oufamofa gij monuh enjgineg ongga rusnok rineg mar osok gij Yesus Kristus oga enesi. Jeska didif dunodou os difesij mar osok gij Allah oga ongga oufamofa gu rusnok ongga ringg rot mar insa koma fob guru. Jeska koma bera erek osnok egens ongga ofra mod efeb esij mowuj mosu ongga osnok enjgineg efen ojgomu.
21Tina didif dudou os difesij rot Allah oga skoita rusnok ongga rineg enesi jeskaseda rudou ebriyi gij tein. Koma morototuma erek mar ongga nabi egens onggu gij Mar Efeyi Ebsi sis fob erek kef oida, "Rusnok ongga rineg rot efen ofoka sis fob enesi bera rimejginaga rot Ofa si. Noba rua ongga rinejginaga rot efen oga enesi bera rudou emebriyi gij si."
22Erek gij ari mega ofoj ofoukou fob bera didif dudou os dujogog iwa gij kota Roma. Tina dedin mar ongga dimfarur rot bera eragou joug didif jefeda dinen skoita iwa jah suma enesi. Noba ebeibeyaif mar ongga didif dimfarur jah sif bera erek oisa fob.
23(15:22)
24Jefeda didif dudou os dijek iwa gij mona ongga didif dija jah monuh Spanyol. Nou ongga didif dingker morototuma jera iwa gij mona ongga adaij fob, beda iwa yufij didif rot mar ongga ducosu rot fogora didif dumotoiru jah monuh Spanyol tein.
25Erek koma tina didif dimeja jah kota Yerusalem sismeni fog. Jeska didif dudou os durka fifi nou Allah efen rusnok gij kota insa koma fog.
26Koma jeska rusnok ongga ruroru Yesus Kristus gij monuh Makedonia jera monuh Akaya runcunc rudou ongga eskeiramera fob fogora ringkeba rerin fifi egema nou Allah efen rusnok ongga rufojingki gij kota Yerusalem.
27Rua risinsa rudou os rikeba rerin fifi insa koma, tina rua rucosu rot rutunggom mar insa koma ojgomu. Jeska rua, ongga erek Yahudi guru, bera rinsma oufamofa eteb jeska Allah fob. Noba koma bera en oisouska rusnok Yahudi ongga rumftuftu rua rot Allah efen oga ongga oufamofa sis fob. Jefeda adaij nou rua rufij rusnok ongga Yahudi sons fogora rikeba rerin fifi egema nou rua ongga rufojingki ojgomu.
28Nou ongga didif dita fifi insa koma gu rua ongga rufojingki gij kota Yerusalem fob, beda didif dimeja skoita iwa gij kota Roma askesi dincira jah monuh Spanyol.
29Noba didif dijginaga rot oida gij mona insa koma bera Allah emeita oufamofa eteb gu mimif nomnaga oisouska Yesus Kristus si.
30Edohuji, didif duis gu iwa jeskaseda iwa yufij didif fogora yum iteij gu Allah nou didif rot mar ongga dimfarur gij ainsa kef tein. Iwa itunggom mar insa koma nou didif ojgomu, jeska mimif bera erek ebic egens oisouska Yesus Kristus fob. Noba Efena Ebsi ofij mimif fogora mudou omokorema ojgomuja.
31Iwa yum iteij jeskaseda Allah omoskotu didif jeska rusnok rineya gij monuh Yudea ongga runororu Allah guru. Jeska rua rudou os rutunggom mar ongga ofogog skoita didif. Noba yum iteij jeskaseda fifi ongga didif durka jah kota Yerusalem nou Allah efen rusnok jah suma bera emereita rudou eskeira eteb rot.
32Noba erek Allah odou os rot, beda didif dimeja skoita iwa rot dudou ongga eskeiramera ojgomu. Beda didif dimeker keingg dufons askesi diker jera iwa jah suma ros.
33Didif duis gu Allah ongga eita eiteij ah ongga eskeira gu rusnok jeskaseda Ofa omofij iwa tein ojgomuja. Ainsoma.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel