Alkitab Mobile SABDA
[VER] : [MEYAH]     [PL]  [PB] 
 <<  Roma 7 >> 

1Edohuji, mar ongga ai juens dimefesij gu iwa bera idou ebriyi gij fob, jeska iwa inroru hukum Musa erek dektek fob. Hukum insa koma bera ofoka ereij keingg rusnok ojgomuja onjoros ranggos fob.

2Koma erek ojaga egens ongga ahi igers fob. Oisouska mar ongga hukum erebent rot bera ofa eker jera efen mahina insa koma ojgomuja. Tina erek efen mahina insa koma agos jeska ofa rot sismeni fog, beda ojaga koma osuwa jeska mar ongga hukum insa koma erebent rot fob.

3Tina, erek ojaga egens eja jeska efen mahina noba ejeker jera orna egens enjgineg deika, beda koma erek ofa esiri morototuma jera orna egens insa koma. Tina erek efen mahina agos sismeni fog, beda ojaga egens koma onsuwa jeska mar ongga hukum erebent rot insa koma fob. Noba erek ofa ahi igers enjgineg deika, beda koma enerek ofa esiri morototuma jera orna egens insa koma deika guru.

4Edohuji, erek koma tein hukum Musa bera onofoka ereij keingg iwa deika guru, jeska iwa yanggos morototuma jera Yesus Kristus ongga edebecki jeska agos fob. Noba ebeibeyaif iwa ija erek egens jera Ofa jeskaseda itunggom mar ongga oufamofa nou Allah ojgomu.

5Sis fob mar ongga oska ongga ah gij mudou efesi bera oroku mimif fogora mutunggom mar ongga hukum Musa eyahehir joug. Jefeda Allah oga ojga rot oida mimif mimagos rot ojgomu.

6Tina ebeibeyaif bera mimif munsuwa jeska hukum Musa insa koma ojgomu. Koma erek mimif manggos jefeda hukum insa koma ongga onoskotu mimif erek tentara egens ongga oskotu rusnok deika guru. Ebeibeyaif mimif munougif gu hukum Musa ongga ensis insa koma jeskaseda misma mudou ongga ebsi komowa ahah Allah eiteij deika guru. Tina mimif mugif gu Allah oisouska Efena Ebsi ongga ofij mimif ojgomuja.

7Erek koma jefeda rineya jeska iwa rimejeka rot oida, "Hukum Musa bera erek mar ongga oska ei?" Erek koma jinaga guru. Hukum insa koma bera orocunc gu didif rot oida dedin mar ongga oska enahif fob. Jeska hukum insa koma bera agot rot oida, "Iwa idou eneftirir keingg rot rusnok enjgineg rerin mareibra guru." Jefeda didif dijginaga rot oida erek mudou ongga eftirir keingg rot mareibra, beda koma bera erek didif dutunggom mar ongga oska fob.

8Jeska gij mona ongga didif dijginaga rot hukum egens insa koma fob, beda ainsa koma tein didif dudou os dikirsa rot hukum egens insa koma ojgomu. Mar ongga oska angh gij dudou efesi rot sismeni fob, jefeda didif dudou eftirir keingg mar ofoukou ojgomuja. Tina erek hukum egens insa koma enah guru, beda mar ongga oska ongga angh gij dudou efesi rot sismeni fob bera onoroku didif jeskaseda dikirsa rot hukum insa koma guru.

9Sis fob bera didif dudou enebriyi gij mar ongga hukum Musa anggot rot guru. Tina gij mona ongga didif dingg fogora dudou ebriyi gij hukum Musa fob, beda didif dijginaga rot oida dedin mar ongga oska enah gij dudou efesi fob. Noba didif dimagos rot mar insa koma ojgomu.

10Beda ainsa koma tein didif dijginaga rot oida dimeja eseiseifa rot dedin mar ongga oska insa kef si. Jeska hukum Musa insa koma ongga didif duroru jeskaseda disma eiteij ah ongga efeinah bera agot rot oida didif dagos rot dedin mar ongga oska ojgomu.

11Gij mona ongga didif dingg rot hukum Musa fob, beda ainsa koma tein mar ongga oska ongga angh gij dudou efesi bera oroku didif jeskaseda dutunggom mar ongga hukum insa koma eyahehir joug ojgomu. Koma erek didif durokrusa disinsa rot ojgomu. Jeska ebeibeyaif bera hukum Musa agot oida didif dimagos rot dedin mar ongga oska ongga duntunggom insa koma si.

12Jefeda hukum Musa insa koma bera erek ebsi komowa ojgomu. Noba mar ongga hukum insa koma agot rot bera erek ebsi komowa tein, jera oufamofa tein, jera tentenmen tein.

13Tina rineya jeska iwa rimagot rot oida, "Hukum Musa ongga erek oufamofa bera orotunggom didif fogora dimagos rot ojgomuja." Tina erek koma jinaga guru. Jeska mar ongga oska ongga angh gij mudou efesi bera ongga orotunggom mimif fogora miseiseifa rot ojgomuja. Noba oisouska hukum insa koma ongga oufamofa bera mimif mijginaga rot oida mimif mimagos rot mifmin mar ongga oska ojgomu. Beda oisouska mar koma bera mimif mijginaga rot oida mar ongga angh gij mudou efesi bera erek oska ojgomu. Jefeda oisouska hukum insa koma bera mimif mijginaga rot oida mar ongga angh gij mudou efesi bera erek oska eteb ekirsa fob.

14Mimif mijginaga rot oida hukum Musa bera en jeska Efena Ebsi Allah. Tina mar ongga mimif mutunggom bera en jeska dudou efesi ojgomu. Noba dugif gu mar ongga oska ongga angh gij dudou efesi erek osnok egens ongga ougif gu efen ebirfaga.

15Noba dedin dita mar insa koma bera orotunggom didif dudou efesi erek eineina gij. Jeska mar ongga oufamofa ongga didif dudou os dita bera didif dineita mar koma guru. Noba mar ongga oska ongga didif dunodou os dita guru bera didif dita mar koma ojgomu.

16Didif dijginaga rot oida didif dita mar ongga oska insa koma ongga dunodou os rot guru. Jefeda koma orocunc rot oida didif dusujohu oida hukum insa koma bera erek tenten ojgomu.

17Jefeda didif disinsa dunodou os dita mar ongga oska guru. Tina mar ongga oska ongga angh gij dudou efesi bera ongga oroku dudou efesi rot ojgomu.

18Noba didif dijginaga rot oida mar ongga oufamofa bera enen jeska didif disinsiyai dudou efesi guru. Jeska erek didif dudou os dita mar ongga oufamofa ojgomu, tina dedin owesa efek rot bera enadaij nou guru.

19Koma bera, didif dineita mar ongga oufamofa ongga dudou os rot guru. Tina didif mar ongga oska ongga didif dunodou os rot guru bera didif dita mar koma ojgomuja.

20Noba erek didif dita mar ongga didif dunodou os rot guru, beda koma orocunc rot oida mar ongga oska ongga angh gij dudou efesi bera ongga oroku dudou efesi rot ojgomu. Noba didif disinsiyai dineita mar ongga oska insa koma guru.

21Jefeda didif dik rot mar egens ongga angh gu didif erek kef oida, gij mona ongga didif dudou os dita mar ongga oufamofa, beda mar ongga angh gij dudou efesi bera eragou joug didif rot fogora dineita mar ongga oufamofa insa koma guru.

22Dudou efesi ongga ororu Yesus fob bera dudou os eteb rot hukum Allah.

23Tina didif dik rot oida mar ongga oska tein bera enah gij dudou efesi tein. Noba mar ongga oska insa koma bera eremeteima rot mar ongga oufamofa ongga didif dudou os dutunggom. Noba mar ongga oska insa koma bera onskotu didif erek tentara egens oskotu rusnok. Jefeda didif dita mar ongga oska insa koma ojgomu.

24Didif dudou okum eteb rot mar insa koma ongga angh gu didif. Jeska didif dudou os duroru mar ongga oufamofa ojgomu, tina mar ongga oska ongga angh gij dudou efesi bera oroku didif fogora dutunggom mar ongga oska insa koma ojgomuja. Osnok egens ojgomu bera omoskotu didif jeska mar okum kef ongga orotunggom didif fogora dimeja eseiseifa rot. Didif duis oufamofa eteb skoita Allah, jeska oisouska mifmin Tuhan Yesus Kristus bera Ofa omoskotu didif jeska mar insa koma si. Jefeda dedin dudou ongga egens jera Yesus fob bera odou os ororu hukum Allah rot tenten ojgomu. Tina dudou efesi odou os ororu mar ongga oska ojgomu.

25(7:24)



 <<  Roma 7 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel