Alkitab Mobile SABDA
[VER] : [MEYAH]     [PL]  [PB] 
 <<  Wahyu 13 >> 

1Erek koma beda didif dik mar egens ongga ofogog orogna jeska mei mojumu efei. Mar koma efen oubukum ofog setka jera efen ebirfaga cinja erfeka. Noba efen manggem egens ongga ah tumu orofosutut oubukum ofog insa koma tein. Noba runggu ofoka tumu orofosutut efen ebirfaga egens egens. Noba rufoka insa koma bera erek mar ongga ruga oruh Allah rot.

2Noba mar ongga ofogog insa koma bera erek macan tutul. Tina efen okoda bera erek beruang efen. Noba efen awesi erek singa efen awesi tein. Beda magosu ongga erek Bilis insa koma eita ofoka aksa jera owesa efek eteb skoita mar ongga ofogog egens insa koma ongga orogna jeska mei mojumu efei jeskaseda ofoka ereij keingg mar enjgineg.

3Noba didif dik mar erek efera ofamosma tumu efen ebirfaga egens. Efera ofamosma koma bera orocunc rot efen efera ongga eteb doska sis fob. Noba rusnok mebif nomnaga rudou oubsaha eteb jeska ofa enagos rot efen efera eteb insa koma guru. Jefeda rua nomnaga ruroru ofa ojgomu.

4Noba rusnok rugif gu magosu egens insa koma ongga ofoka Naga jeska ofa eita owesa efek gu mar ongga ofogog egens insa koma. Noba rua rugif gu mar ongga ofogog insa koma tein. Rua ragot oida, "Rusnok egema tein rerin rufoka ongga morototuma erek ofa efen ofoka ongga aksa jinaga guru. Noba, enadaij nou rusnok rineya rukoja ofa tein jinaga guru."

5Beda mar ongga ofogog insa koma esma owesa efek jeskaseda esitit esinsa efaga noba oga oruh rot Allah tein ojgomuja. Beda mar ofogog insa koma eita owesa efek erek koma ojgomuja gij mesta rara setka tohkuru noba egeka.

6Beda gij mona insa koma tein mar ofogog koma oga oruh Allah ni, oga oruh Allah efen owesa efek ni, oga oruh Allah efen monuh mebaga ni, oga oruh Allah efen rusnok ongga ringker gij mebaga ni ojgomuja.

7Noba mar ongga ofogog insa koma esma owesa efek tein jeskaseda edi Allah efen rusnok fogora ot keingg rua. Noba ofa tein esma owesa efek jeskaseda ofoka ereij keingg rusnok ebic nomnaga ni, ruga rusnok nomnaga ni, jera monuh nomnaga ni ojgomuja.

8Noba rusnok mebif rufoukou rugif gu mar egens ongga ofogog insa koma. Tina rua bera rimeseiseifa rot si. Jeska sis fob bera Allah onogu keingg rerin rufoka gij Domba Efer efen buku ongga agot rot idu ongga rimesma eiteij ah ongga efeinah guru. Koma bera gij mona ongga Ofa onotunggom mebif enesi. Domba Efer insa koma bera ongga Allah ensejah rot gij mona ongga sismeni jeskaseda agos nou rusnok rerin mar ongga oska.

9Ongga ofoufem bera rusnok nomnaga rik mar erek kef ojgomu oida,

10"Rusnok enjgineg rimagei rua, beda enadaij nou rua rukoja mar koma jinaga guru. Jeska rusnok rimagei rua si. Noba rusnok enjgineg rimera meiteb kalawan rimagob rua, beda enadaij nou rua rukoja mar koma jinaga guru, jeska rusnok rimagob rua si." Jefeda Allah efen rusnok bera ruin keingg rudou efesi rot ahais noba ruroru Allah rot tenten askesi mar okum ah keingg rua ojgomu.

11Erek koma beda didif dik mar ofogog ongga egens deika orogna jeska mebi efesi. Mar koma efen oubukum egeka erek domba efen oubukum egeka. Tina mar koma efen oga bera erek magosu insa koma ongga ofoka Naga.

12Ofa ocunc mar gu rusnok oisouska mar ofogog ongga sismeni insa koma efen owesa efek. Noba mar koma eradgodu rusnok jeskaseda rua rugif gu mar ofogog egens ongga sismeni insa koma. Ofa bera ongga efen efera ofamosma ongga orocunc rot efera eteb ongga od fob tina enagos rot guru.

13Noba ofa tein otunggom mar ongga onswos eteb ahah rusnok riteij. Mar egens ongga ofa otunggom bera erek mah eteb ongga onjuj jeska mebaga gu mebif.

14Noba ofa otunggom mar onswos insa koma oisouska owesa efek ongga ofa esma jeska mar ofogog ongga sismeni insa koma. Jefeda ofa era mar insa koma orokrusa rusnok mebif nomnaga rot ojgomu. Noba ofa obk rusnok jeskaseda rira mega efaga beda ragosus mar egens ongga orocunc jeni erek mar ofogog ongga sismeni insa koma efen efaga ojgomu. Ofa bera ongga efen efera ofamosma ongga orocunc rot meiteb kalawan ongga riragob ofa sis fob, tina enagos rot guru.

15Noba mar ofogog ongga egeka insa koma esma owesa efek tein jeskaseda aha efeni gij mega efaga egens insa koma ongga rusnok ranggosus jeskaseda rugif gu. Jefeda mar egens ongga rusnok runtunggom insa koma tein agot mar noba efen owesa efek jeskaseda agob rusnok nomnaga ongga runougif gu ofa guru.

16Beda mar ofogog ongga egeka insa koma eradgodu rusnok ongga erek runok rufoka gij guru ni, rusnok ongga rufoka aksa ni, rusnok ongga runa mei ahta ni, rusnok ongga rufojingki ni, rusnok ongga rut gu risinsa ni, rusnok ongga rumfij rerin ebirfaga ni, nomnaga jeskaseda risma mar tumu ritma jah rugnosk era tumu ritoufu ojgomu.

17Mar insa koma bera orocunc rot mar ofogog ongga sismeni koma efen ofoka. Era mar insa koma orocunc rot efen ofoka ongga erek nomor. Ofa eradgodu rusnok insa koma jeskaseda erek mar egens koma enah tumu rerin ritma jah rugnosk era ritoufu guru, beda enadaij nou rua ringk maat era ruhu maat jinaga guru.

18Rusnok ongga rudou ebriyi gij bera rusujohu rot iskusk osok gij mar ofogog insa koma efen ofoka fog. Jeska huruf-huruf rot efen ofoka bera orocunc rot ofa efen nomor. Nomor koma bera 666.



 <<  Wahyu 13 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel