1Erek koma beda malaikat egens insa koma ocunc mei mosu egens ongga erek mei ongga eita eiteij ah gu didif. Noba mei mosu ongga eita eiteij ah insa koma bera efen efei eskeiramera eteb ojgomu.
2Noba mei koma eya jeska kursi ongga Allah jera efen Domba Efer gengker gij fogora oroisa moroju efembra. Noba mega egens ongga eita eiteij ah bera ot jah mei insa koma efembra enama tein enama tein. Noba mega insa koma efen efek setka kungkob erfeka erek toga toga. Noba orofosut mesta egens beda efen efek ongga efeinah deika. Noba efen efeyi bera erek ariawun nou rusnok mebif nomnaga.
3Noba mar ongga Allah oncunc erek oska bera egema tein enah gij kota insa koma jinaga guru. Jeska Allah jera Domba Efer bera gengker gij kursi gu kota koma ojgomu. Noba Ofa efen rusnok rumofij Ofa jah suma ojgomuja.
4Rua rimek Ofa efen osum ojgomu. Noba Ofa efen ofoka bera runggu tumu rerin ritoufu tein.
5Noba rua rinek motkobah deika guru. Rua runocosu rot mowa ongga eisa era lampu ongga eisa deika guru. Jeska Tuhan Allah bera erek rerin eisa ongga adaij nou ojgomu. Rua rumofoka ereij keingg mar nomnaga morototuma jera Ofa gij mona ongga ah aibin ojgomuja.
6Erek koma beda malaikat egens agot gu didif oida, "Mar insa koma nomnaga ongga bua bingg noba bingk fob bera erek tenten ojgomu, jefeda bua buroru ojgomu. Jeska Allah, ongga ombk Efena Ebsi skoita efen nabi-nabi sis fob, bera ombk didif skoita bua ongga erek efen osnok egens ongga omfij Ofa tein. Ofa otunggom erek koma jeskaseda orocunc rot mar nomnaga ongga ai juens omorogna keingg rusnok si."
7Noba Yesus bera agot erek kef oida, "Iwa ig rot kef oida, gij mona ongga ai estir ojgomu beda Didif dimen si. Noba rusnok nomnaga ongga ruroru mar ongga runggu keingg gij surat kef rot mona kahma bera rudou emefaga ouka rot mona ongga Didif din fob si."
8Didif, Yohanes, bera ongga dingg noba dingk rot mar nomnaga ongga dunggu keingg gij surat kef. Nou ongga didif dingk noba dingg rot mar insa koma fob, beda didif disiri jah malaikat odou fogora dugif gu ofa ojgomu. Jeska ofa bera ongga ocunc rot mar insa koma nomnaga gu didif fob.
9Tina malaikat egens insa koma agot gu didif oida, "Bua bineita erek koma guru. Jeska didif bera dumfij Allah morototuma erek bua jera bebin obhujir jera nabi-nabi jera rusnok nomnaga ongga ruroru mar ongga angh gij surat egens kef ojgomu. Jefeda mimif nomnaga mugif gu Allah ojgomu."
10Beda ofa agot gu didif oida, "Bua binedemdemi mar ongga bunggu keingg gij surat kef guru. Jeska gij mona ongga ai estir, beda mar insa koma nomnaga omorogna keingg rusnok si.
11Jefeda osnok egens ongga eita mar ongga oska ros, beda ofa otoiru mar insa koma ojgomu. Noba osnok egens ongga ororu mar ongga oska efekeifa ros, beda ofa otoiru mar insa koma ojgomu. Noba osnok egens ongga eita mar ongga erek ongkoska ros, beda ofa otoiru mar insa koma ojgomu. Noba osnok egens ongga eita mar rot odou ongga ebsi komowa ros, beda ofa otoiru erek koma ojgomu. Jeska gij mona ongga ai estir deika ojgomu, beda Yesus omorogna keingg rua insa koma nomnaga si.
12Noba Yesus agot erek kef oida, "Gij mona ongga ai estir deika ojgomu beda Didif dimen si. Beda Didif dimeita yeyin ifons ongga oufamofa eteb skoita iwa orofosutut osnok egens egens ororu jeni mar ongga iwa intunggom sis fob.
13Didif bera Alfa jera Omega. Didif bera ongga osumbohka jera ongga osuira. Noba Didif bera erek ongga sismeni jera erek ongga omoisa rot mar nomnaga tein.
14Oufamofa eteb skoita rusnok ongga rerin mar ongga oska enah gij rudou efesi deika guru. Rua bera erek rusnok ongga runt rerin meisoufa fogora runtunggom erek ebsi komowa fob. Jefeda rua bera ongga rimet efek jeska mega ongga eita eiteij ah si. Noba rua tein bera ongga rumoira gij montouj kota koma ongga erek efeinah si.
15Tina rusnok ongga oska efekeifa ni, rusnok ongga runtasa rusnok enjgineg ni, rusnok ongga risiri morototuma ebireira ni, rusnok ongga ragob rusnok ni, rusnok ongga rugif gu mar ongga erek tenten guru ni, rusnok ongga rudou os rurokrusa rusnok enjgineg ojgomuja ni, rusnok insa koma nomnaga bera rimeker jah kota insa koma ejmeg ojgomu. Rua runoira gij jinaga guru.
16Didif, Yesus, bera ongga dumbk dedin malaikat egens insa koma skoita bua fob, jeskaseda bua bifesij rot mar insa koma nomnaga gu dedin rusnok Mod Ari nomnaga. Didif bera Ofa ongga onjuj jeska raja Daud. Noba Didif bera erek mensir efaga ongga eisa egigir nou rahah tentena."
17Efena Ebsi jera rua ongga erek Domba Efer efen arja bera ruis rot oida, "Bua bin." Noba rusnok nomnaga ongga ringg rot mar ongga oufamofa insa koma tein ragot oida, "Bua bin." Noba iwa ongga magon en iwa beda in noba ij mei ongga eita eiteij ojgomu. Yesus emeita mei koma gu iwa rot oubji ojgomu.
18Didif, Yohanes, diahehir joug rusnok nomnaga ongga ringk rot mar ongga angh gij surat insa kef fob ongga anggot rot mar ongga emen gij mona kahma erek kef oida, rusnok ongga runggu mar egema dokun gij surat egens kef, beda Allah omogun mar okum ongga ranggot rot gij buku kef keingg rua rot si.
19Noba rusnok ongga rusuna rot mar ongga ranggot rot gij surat kef erek oskiyai tein jeska, beda Allah omokoja rua fogora rinet mega ongga eita eiteij ah insa koma jinaga guru. Noba rua runoira gij kota efeinah insa koma tein guru. Mar egeka insa koma bera rimfesij rot gij surat kef fob.
20Yesus bera ongga oncunc mar insa koma gu didif rot tenten ojgomu. Noba Ofa bera ongga agot oida, "Gij mona ongga ai estir deika, beda Didif dimen si." Beda rusnok ruroun rot oida, "Yo, mimif mudou os ojgomu. Tuhan Yesus Kristus, Bua bin ebeirens."
21Didif dum diteij jeskaseda Tuhan Yesus Kristus ocunc odou ongga oufamofa eteb skoita Allah efen rusnok nomnaga. Ainsoma.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel