Alkitab Mobile SABDA
[VER] : [MONGONDOW]     [PL]  [PB] 
 <<  1 Korintus 10 >> 

1Utatku mita, ibogonku mo'ikow diaí mokoliong kon onu inta ain nobalií kom mogoguyang naton wakutu im mosia dinumudui ko'i Musa. Mosia komintan inoliungan ing goḷom, bo nosaḷamat iḷumoḷan kon dagat Teberau.

2Simbaí mobalií dumodudui i Musa, daí mosia komintan binaptis kom bonu ing goḷom bo kom bonu in dagat tatua.

3Mosia komintan noka'an kong ka'anon inta ain sinantuí i Tuhan ka'anon monia,

4bo nonginum kon tubig inta ain doman sinantuí kon inumon monia. Mosia komintan nonginum kon tubig nongkon buḷud batu inta umuran kotaki-takin monia; buḷud batu tua ing ki Kristus.

5Ta'e umpakah natua nobayongbií doman ing kon sigad monia tua ing kinodoií i Allah. Tuamai nobarong ing kon sigad monia minatoi kom padang gurun.

6Tua komintan nobaliíbií contoh ko'i naton, mopotorop kom baí dona'ai ing kita mogaid kon inta diaí mopia naí inaidan monia.

7Bo baí diaí doman ing kita mosumbah kom berhala, naonda bo inaidan in tongonumai intau kon sigad monia. Kom bonu im Buk Mosuci pinais nana'a, "Bo nomangkoidon im bangusa tatua nonga'an bo nonginum poḷat nomanari sim mosumbah kom berhala."

8Kita in diaíbií mota'au mogaid kon diaí mopia naí inta inaidan in tongonumai intau kon sigad monia, sahingga doyowa nopuḷuh bo toḷu im minatoi kon sigad monia in singgai tua.

9Kita in diaíbií mota'au monungkuḷ ko'i Tuhan, naí inta inaidan in tongonumai intau kon sigad monia tungkuḷ intua, sahingga minatoi kinaḷut in uḷag inta mobisa im mosia.

10Kita in dikabií umuran mokarana; naí inta inaidan in tongonumai intau kon sigad monimu kolipod, sahingga ilimod im malaekat inta momomatoi.

11Tua komintan ain no'iantug ko'i monia saḷaku contoh kon intau mita ibanea. Bo komintan tua pinaisbií doman sim mobalií poringatan ko'i naton kon singgai tumi inta ain nodiug.

12Bo intau inta monganggap moropot in sia, musti mokopopia; dika bo moḷabuí.

13Bayongan totungkuḷ inta korasa'an monimu tua im bagubií totungkuḷ inta biasamai korasa'an intau. Ta'e ki Allah in tantuíbií mosatia kon dandi-Nya. Diaíbií pomayak-Nya makow mo'ikow ing koaíntugan totungkuḷ inta mo'iliudon kong komampuan monimu. Kowakutu ing koaíntugan in soba'an i mo'ikow, Sia umuranbií mobogoi in daḷan ko'i monimu, simbaí umuran moropot i mo'ikow bo mokotahang.

14Tuamai ule utatku mita inta kinotabiku, poyayuk ing gina monimu inta umuran mo'ibog mosumbah kom berhala.

15Aku'oi moguman ko'i monimu naonda bo moguman kon intau mita inta mopandoi. Raidon onu im pinogumanku na'a.

16Kowakutu in nonginum kon anggur bo nosukur ko'i Allah, tua mangalenya notobatuí bidon i Kristus ing kita kom bonu ing kinopatoian-Nya. Bo ko wakutu nosilai kon roti ing kita sing ka'anon moyotakin, yo tua mangalenya notobatuídon takin awak i Kristus ing kita.

17Sin tongaíbií tobatuí in roti, bo kita komintan ain noka'an kon roti tatua. Daí umpakah nobayong ing kita, ta'e tongaíbií toaíwakan monag.

18Tatukirakah in intau mita Israel. Mosia inta ain noka'an kong ka'anon inta aim pinosumbah kon tampat pobobogoian kon sosumbah, in intaubií mita inta ain notobatuí in tampat tatua.

19Onu degaí mangale in singogku na'a? Berhala andeka ka'anon inta pinosumbah kom berhala, komintanbií diaí im mangalenya.

20Onu im pinosumbah kom meja pogogukatan kon sosumbah inta inogoi kom berhala, de'emanbií pinosumbah ko'i Allah, ta'e kon dimukudbií mora'at.

21Mo'ikow in diaíbií mota'au monginum kom palo in anggur pongonginuman i Tuhan, bo monginum doman kom palo pongonginuman in dimukud mita mora'at. Natua doman, mo'ikow in diaíbií mota'au monga'an moyotakin i Tuhan bo monga'an doman moyotakin in dimukud mora'at.

22Ande degaí mopoterengbií ko'i Tuhan? Eta kita im moropo-ropot ing ki Tuhan?

23Kain intau, "Kita im mota'aubií mogaid kon onukadon ing ko'ibog naton." Totu'ubií doman! Ta'e onu in aidan naton tua, diaíbií komintan baraguna. "Kita mota'aubií mogaid kon onukadon ing ko'ibog naton" -- ta'e onu ing kino ibog naton tua, diaíbií komitan mokobiag ko'i naton.

24Dikabií tongaí morai kong kopontingan monimu tontanií, ta'e poraibií doman kong kopontingan intau ibanea.

25Onukabií im pinotaḷui kom pasar im ponoyak, mota'aubií monimu ka'anon. Kumudungbií im motaḷui, dikabií morai kon yagi-yagi.

26Sing kom bonu im Buk Mosuci aim pinais, "Dunia bo tombonunya na'a komintanbií kapunya'an i Tuhan."

27Aka mo'ikow bo inoinií i intau inta diaí mopirisaya ko'i Yesus sim monga'an moyotakin monia, bo minayak in ikow, yo ka'anbií onu in inoḷud monia ko'inimu. Kumudungbií im monga'an. Dikadon moliboí mongo no'ulií kon onda ing ka'anon tatua, simbaí mopia im pongonga'an monimu.

28Tongaí aka oyuíon im moguman ko'i monimu nana'a, "Ka'anon tanion aim bidon pinosumbah kon dimukud mora'at," yo dikabií ka'anon monimu intua sin aindon muna pinota'aunya, bo ka'anon tatua ing kinodoiíbií ing ginamu.

29Makusudku in diaíbií degaí kom bonu ing gina monimu intua, ta'e degaí kom bonu ing gina intau ibanea. Sin degaí oyuíon im moliboí nana'a, "Nongonu sing ginabií in intau ibanea im monantuí kon ibogku?

30Aka tua komintan bo kina'ankubií takin sukur ko'i Allah, daí umpakah yo singogonpa doman monimu in aku'oi sin noka'an kong ka'anon tatua, apapa doman munadon nosukur ko'i Allah in aku'oi bo noka'an kon ka'anon tatua?"

31Onukabií in aidan monimu -- pinomayak ka'anon ande inumon -- yo aidaibií komintan takin mopoyaput in sukur ko'i Allah.

32Kobiag mokopotompia baí diaí tongaí mokobaradosa kom bayongan intau; pinomayak intau Yahudi ande Yunani ande jama'at i Allah.

33Kobiagdon naí aku'oi. Kon soaáḷ yagi-yagi, ramijionku totok simbaí mokosanang kom bayongan intau. Bo tua in de'emanbií tongaí kopontinganku tontan, ta'e kopontinganbií im bayongan intau simbaí mosaḷamat im mosia.



 <<  1 Korintus 10 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel