Alkitab Mobile SABDA
[VER] : [MONGONDOW]     [PL]  [PB] 
 <<  1 Petrus 1 >> 

1Utatku mita umat inta pinilií i Allah, inta no'ibaya-bayak makow kom butaí im Pontus, Galatia, Kapadokia, Asia bo Bitinia! Aku'oi, ki Petrus, rasul i Yesus Kristus mopo'igum makow simbaí ki Allah mobogoi im barakat bo kobiagan motompia ko'i monimu. Mo'ikow pinilií nobalií umat i Allah podudui in roncana i Allah, Amaí naton. Roho i Allah nopobaliídon ko'i monimu umat inta mokudus, inta mobiag bo tongaí mosumbah ko'i Allah, simbaí mo'ikow tongaí motoindudui ko'i Yesus Kristus bo daritan in duguí-Nya.

2(1:1)

3Koligaidon ing kita mosukur ko'i Allah, ki Amaí i Tuhan naton ki Yesus Kristus! Sia totok motabi ko'i naton, manangka intua kita inogoian-Nya ing kobiagan mobagu inta pinodoyon kong kinobiagan bui i Yesus Kristus nongkon kinopatoian. Na'abií im mobogoi in harapan moroton ko'i naton.

4Kita moharap makow simbaí moko'ulií kom barakat mita inta ain sinadia i Allah kon umat-Nya. Barakat mita tatua ain sinaguí-Nya kon soroga, sahingga in diaíbií mogoguya'at, ande mobongkog ande mobaḷui.

5Tua komintan ogoi ko'i monimu, sim mo'ikow mopirisaya ko'i Allah. Mo'ikow iḷukadanbií doman ing kawasa i Allah simbaí mo'ikow motarima kong kasaḷamatan inta sinadiadon bo poponyata kon singgai tumi.

6Tuamai mo'ikow musti mokoposanang kong gina, umpakahbií tana'a makow moaíjarpa ing gina, sim mo'ikow kinoaíntugan in noyagi-yagimai in totungkuḷ.

7Tujuan intua komintan im mogujibií ko'i monimu mongo totu'udon mopirisaya ko'i Tuhan andeka diaí. Buḷawanpa inta mogogoguya'atbií, mustibií ujionpa muna in tuḷu. Pirisayabií monimu im momaha-mahaḷ nongkon buḷawan mita tatua, tuamai mustibií doman ujion simbaí mo'ikow mobaliídon totok moroton. Aka natua yo mo'ikow im pujionbií bo hormaton poḷat diaan mayak in soroga aka ki Yesus Kristus buidon mamangoi.

8Bo umpakahbií mo'ikow diaípa dodai onda noko'ontong ko'inia, ta'e mo'ikow im motabibií bo umuran mopirisaya ko'i-Nia. Manangka intua moḷungangabií totok ing gina monimu, ḷunganga ing gina inta diaíbií im poporupa'an.

9Sin tujuan im pirisayamu kino dapotandon, tuata ing kasaḷamatan jiwamu.

10Kasaḷamatanbií tana'a inta aim pinirikisa kinopia totok in nabi mita inta nopoyaput ing koyow i Allah soaáḷ totabi bo barakat inta inogoi i Allah ko'i monimu.

11Mosia nonyolidik mongo naíonda bo to'onu ing kobaliían soaáḷ tatua, inta imakusud in Roho i Kristus tua in onubií inta oyuíon kon awak monia. Ko wakutu intua Roho-Nya ain noguman muna ko'i monia soaáḷ roriga mita inta musti korasa'an i Kristus bo soaáḷ kamulia'an-Nya inta mo'iduduimai onda intua mopaḷut.

12Ki Allah ain noguman kon nabi mita tatua, kon onu im pinomia monia tatua, de'emanbií inaidan monia sing kopontingan monia tontanií, ta'e kopontinganbií monimu, tua in soaáḷ mita inta tana'a makow ain dinongog monimu notarang nongkon intau mita inta nopoyaput in Habar Mopia soaáḷ ki Yesus Kristus. Mosia nopoyaput intua komintan ko'i monimu takin kawasa in Roho i Allah inta pinotabaí-Nya mangoi nongkon soroga. Bo umpakahbií malaekat mita yo mo'ibogbií doman totok monota'au kon habar inta pinoyaput monia tua.

13Tuamai mo'ikow musti umuran mobasadia. Poko'ingat bo totu-totu'u poharap kom barakat inta bain ogoi ko'i monimu ko wakutu ing ki Yesus Kristus mamangoi bui.

14Kotoinduduidon ko'i Allah, bo dona'aidon mobiag podudui in ibogmu kolipod, wakutu i mo'ikow diaípa nonota'au ko'i Allah.

15Ta'e aidaibií in na'a: "Kosucidon mo'ikow kom bayongan yagi-yagi inta inaidan monimu, naí ki Allah inta ain nogoinií ko'i monimu tua im mosucibií totok."

16Kom bonu im Buk Mosuci pinais nana'a: "Kosucibií im mo'ikow, sin Aku'oi im mosuci."

17Ki Allah tangoion monimu ki Amaí wakutu im mo'ikow mosambayang. Baí kota'auan monimu kong ki Allahbií tatua im mohakim kon intau podudui in oaíid monia tontanií bo diaíbií poyoposion-Nya intau. Tuamai wakutu im mo'ikow kon duniapa na'a ko'ondokbií ko'i Allah aka mobiag.

18Sing kinota'auan bidon monimu kom mo'ikow sinobus bidon nongkon kobobiag monimu inta diaí im mangalenya, sin tuabií im pinopoponag im mogoguyang monimu. Pinoguboli ko'i monimu tua in de'emanbií barang inta mogogoguya'at naí perak andeka buḷawan,

19ta'e duguíbií inta totok im momahaḷ, tuata in duguí i Kristus inta pinoduguí naonda bo duguí adií in domba inta diaí nopelong ande diaí pinali-paliaín. Sia pinokurban ko'i Allah.

20Ki Kristus piniliídon i Allah kowakutupa in dunia na'a diaípa pinomia. Bo kon singgai mita tumi na'a, sia namangoi in dunia na'a simbaí posaḷamaton im mo'ikow.

21Sia im pinopodoyonan im pirisaya monimu ko'i Allah inta ain nomiag bui ko'i-Nia. Daí ki Allahbií im pinirisaya monimu bo ki Allahbií doman im pinopoaíndoḷan monimu in harapan.

22Lantaran mo'ikow bo umuran dinumudui kon onu inta sinunduí i Allah, daí tabidon in nondarit ko'i monimu sahingga in totu-totu'udon im mo'ikow motabi kon intau mita inta tumpaḷa mopirisaya ko'i Kristus. Pogumanku bui, totu-totu'udon positabian i mo'ikow kon tobatuí bo tobatuí takin gina motulid.

23Sin lantaran mo'ikow mopirisaya kom pirman inta nobiag bo inta mononoi tua, daí mo'ikow binaliídon intau inta mobagu bo de'emanbií pinolahir nongkon intau inta mato-matoi tua, ta'e nongkon i Amaíbií inta diaí mato-matoi.

24Kom bonu im Buk Mosuci pinaisdon nana'a: "Bayongan intau kon dunia na'a naonda bo bonok, bo bayongan kamulia'annya naonda bo bungai im bonok. Bonok moḷaḷow, daí bungainya im mototak doman,

25ta'e pirman i Tuhan im mononoibií." Pirman tatua in Habar Mopia inta aim pinota'au ko'inimu.



 <<  1 Petrus 1 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel