Alkitab Mobile SABDA
[VER] : [MONGONDOW]     [PL]  [PB] 
 <<  1 Tesalonika 1 >> 

1Utatku mita jama'at kon Tesalonika, inta ain nobalií umat i Allah Amaí naton bo i Tuhan Yesus Kristus. Aku'oi ki Paulus, ki Silwanus bo ki Timotius umuran mopo'igum ko'i Allah simbaí tantuí-Nya ogoian im barakat bo kobiagan motompia im mo'ikow.

2Umuran ing kami mosukur ko'i Allah lantaran pirisaya monimu. Pomuḷoi ing kami mosambayang, tantuí kotoropan nami im mo'ikow.

3Umuran doman kotoropan nami in oaíid monimu inta pinodoyon kom pirisaya ko'i Tuhan naton ki Yesus Kristus inta motabi bo mo'ibog doman motuḷung kon tumpaḷa intau. Kinotoropan doman nami ing koro'roton gina monimu moharap makow ko'i Tuhan naton ki Yesus Kristus.

4Utat mita, kinota'auan bidon nami kom motabibií ing ki Allah ko'i monimu bo pinilií-Nyadon im mo'ikow mobalií umat inta kotabi-Nya.

5Sing kami nopoyaput in Habar Mopia ko'i monimu de'emanbií pinodoyon kom pandoi nami, ta'e pinodoyonbií kong kawasa in Roho i Allah inta umuran kotaki-takin nami. Bo totokbií iyakin nami kon totu'ubií in Habar Mopia tatua. Kinota'auan bidon monimu ing kobobiag nami wakutu ing kotaki-takinpa monimu. Kami umuran noramiji mogaid sing kopontingan monimu.

6Mo'ikow dinumuduidon kon onu inta inontong monimu inaidan nami bo inta inaidan i Tuhan. Umpakah mo'ikow nobiag nororiga sim pinogutuí totok in intau ibanea, ta'e Habar Mopia inta pinoyaput nami ko'i monimu in sinarimabií monimu takin sanang gina. Sanang gina tatua Rohobií i Allah in nobogoi.

7Tuamai mo'ikow nobalií duduianmai im bayongan intau inta mopirisaya kom Makedonia bo kon Akhaya.

8Sin nongkon imonimu, habar soaáḷ ki Tuhan no'isiardon dapot im Makedonia bo Akhaya. De'eman doman tongaí tua; sin nodapotbií doman in habar kon naíonda ing kopopirisaya monimu ko'i Allah no'isiar domandon magií makow kon lipu-lipuíannya, sahingga diaí bidon im musti pogumanku ko'i monimu.

9Bayongan intau mongonguman kon soaáḷ pinototomu monimu ko'inami wakutu in namangoi ko'i monimu. Ino'uman doman monia kom mo'ikow nonaḷaímaidon kon onu inta pinomia monimu berhala inta sumbaían domanmai. Mo'ikow nopirisayadon ko'i Allah inta mobanar bo tongaídon Sia in sinumbah monimu.

10Ino'uman doman monia ing kososatia monimu mogoḷat makow kong koaíngoian bui i Adií i Allah inta ki Yesus Kristus nongkon soroga. Sia inta aim biniag bui i Allah nongkon sigad in intau mita minatoi. Sia tuata inta moposaḷamat ko'i naton nongkon hukuman i Allah kon singgai mo'iduduimai.



 <<  1 Tesalonika 1 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran