Alkitab Mobile SABDA
[VER] : [MONGONDOW]     [PL]  [PB] 
 <<  1 Yohanes 4 >> 

1Utat mita inta kotabiku! Dona'aibií mogampang kinopiri-pirisayanya kon intau mita inta mongaku kinawasa'an in Roho i Allah, ta'e ujipa muna im mosia tua simbaí kota'auandon monimu mongo roho ko'i monia tua nongkon i Allah andeka de'eman. Sin nobayongdon intau maya-mayak makow bo mongaku nabi padahaḷ de'emanbií totu'u nabi.

2Nana'a in tandanya ko'i naton monota'au mongo tua Roho i Allah andeka de'eman: Intau inta mongaku kong ki Yesus Kristus namangoidon in dunia saḷaku intau, yo intau tatua kinawasa'an in Roho i Allah.

3Ta'e intau inta doií mongaku kon soaáḷ ki Yesus, yo sia tua diaí kinawasa'an in Roho i Allah, ta'e intau tatua kinawasa'andon in roho inta nongkon Saturu i Kristus. Bo soaáḷ sia tua aim bidon kinodongogan monimu kom mamangoibií in sia, bo tana'a sia namangoidon kon dunia na'a.

4Ta'e ule, mo'ikow nion ki Allahbií ing kitogi. Sinaḷowdon monimu in intau mita inta de'eman totu'u nabi, sin Rohobií inta nongawasa ko'i monimu im mokawa-kawasa nongkon roho mita inta nongawasa kon intau mita inta nobalií kapunya'an in dunia na'a.

5Intau mita inta de'eman totu'u nabi tua nongonguman kon soaáḷ mita in dunia na'a, bo onu in ino'uman monia tua indongoganbií in dunia na'a.

6Ta'e kita na'a ing ki adiíbií mita i Allah; bo intau mita inta nonota'au ko'i Allah mokidongogbií kon singog naton. Ta'e intau inta de'eman kapunya'an i Allah, diaíbií mokidongog kon singog naton. Natua in caranya kita monota'au kon koyoposi in Roho inta motunduí kom mobanar, bo roho inta motunduí kon diaí totu'u.

7Utat mita inta kinotabiku! Koligai baí kita umuran mobiag mositabian tobatuí bo tobatuí, sin tabi tua in nongkon i Allahbií, bo intau inta kototabi kon tumpaḷa intau ing ki adiíbií mita i Allah bo nonota'au ko'i Allah.

8Intau inta diaí kototabi, diaíbií nonota'au ko'i Allah; sing ki Allah tua in tabibií.

9Cara i Allah noponyata kon Sia im motabi ko'i naton, Sia nopotabaí ko'i Adií-Nya tuḷong namangoi in dunia na'a, simbaí kita moko'ulií kong kobiagan nongkon i-Nia.

10Na'abií in tabi tua: De'emanbií kita in notabi ko'i Allah, ta'e ki Allahbií in notabi ko'i naton bo nopotabaí ko'i Adií-Nya sim motobus kom bayongan dosa naton.

11Utat mita inta kinotabiku, aka tabi i Allah totu'u moḷoben ko'i naton, daí kita im mustibií doman mositabian.

12Diaíbií tobatuímai intau pernah noko'ontong ko'i Allah, ta'e aka kita mositabian, yo ki Allah notobatuídon takin naton bo tabi-Nya mobaliídon mosompurna ko'i naton.

13Lantaran ki Allah ain nobogoi in Roho-Nya ko'i naton, daí kinota'auan naton kong kita na'a in nobiag bidon notobatuí takin i Allah, bo ki Allah nobiag doman notobatuí takin naton.

14Kami tontanií ain noko'ontong ko'i Adií i Allah, bo kami nopohabar kon Sia im pinotabaí mangoi i Amaí sim mobalií Raja Mopoposaḷamat in dunia na'a.

15Ki ine im mopirisaya kong ki Yesus tua ki Adií i Allah, yo ki Allah notobatuí takin intau tatua, bo intau tatua notobatuídon doman takin i Allah.

16Kita tontanií ain nonota'au bo nopirisaya kon tabi i Allah ko'i naton. Ki Allah tua in tabibií. Intau inta umuran kototabi kon tumpaḷa intau, notobatuídon takin i Allah in Sia, bo ki Allah notobatuídon takin intau tatua.

17Tabi binaliídon nosompurna ko'i naton, simbaí oyuíondon ing kabaranian naton kon Singgai Ponantuían. Oyuíon ing kabaranian naton, sing kobiagan naton kon dunia na'a notongkaidon naí kobobiag i Kristus.

18Intau inta nobiag kom bonu in totabi i Allah, diaíbií angoian ondok, sin tabi inta mosompurna monginggamaídon kom bayongan ondok. Daí kota'auan bidon, aka intau bo mo'ondokpa in tumayow kon Singgai Ponantuían yo intau tatua diaípa notarima kon tabi inta nosompurna nongkon i Allah.

19Kita motabi, sing ki Allah aim muna notabi ko'i naton.

20Aka oyuíon intau moguman, "Aku'oi motabi ko'i Allah," ta'e sia diaí motabi ko'i utatnya, yo mo'uboḷ intau tatua. Sin intau inta diaí motabi ko'i utatnya inta ontongonnya makow, tantuí diaíbií doman kuma'an kon akaḷ aka sia motabi ko'i Allah inta diaí inontongnya.

21Tuamai, na'a im parentah inta inogoi i Kristus ko'i naton: Ki ine im motabi ko'i Allah musti motabi ko'i utatnya doman.



 <<  1 Yohanes 4 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel