Alkitab Mobile SABDA
[VER] : [MONGONDOW]     [PL]  [PB] 
 <<  2 Timotius 1 >> 

1Ule Timotius adiíku inta totok ing kotabiku! Aku'oi, ki Paulus, nomais kon surat tana'a, mopo'igum makow doaí simbaí ki Allah inta ki Amaí naton bo ki Yesus Kristus, Tuhan naton, umuran mobogoi ko'inimu im barakat, totabi bo kobiagan motompia. Pinoduduibií kon ibog i Allah aku'oi na'a nobalií rasul i Kristus Yesus bo poḷat pinotabaí mopota'au in daḷan kobiagan inta pinodandi i Allah. Kobiagan tatua sinarimadon naton sing kita ain notobatuí i Kristus Yesus.

2(1:1)

3Aku'oi mopoyaput in sukur ko'i Allah inta binantunganku takin gina motulid bo modarit naí inta inaidan im mogoguyangku tungkuḷ intua. Umuranku sambayangan im mo'ikow pomuḷoi ing kotoropanku doḷom ande singgai.

4Tantuíku kotoropan ko'oajar ing ginamu, tuamai mo'ibogdon totok aku'oi mokipodungkuḷ ko'inimu baí mosanangdon ing ginaku.

5Umuran kotoropanku ing kopopirisayamu ko'i Kristus inta totu-totu'u tua naonda bo kopopirisaya i ba'aymu ki Lois bo ki inaímu ki Eunike. Bo moyakinbií totok in aku'oi kong kopopirisayamu nion naí bií doman onda bo kopopirisaya monia tua.

6Manangka intua tantuíku bui ponorop ko'inimu simbaí umuranmu pakeíon kopira'an in totabi inta inogoi i Allah ko'inimu wakutu im binarakatanku ikow.

7Sin Roho inta inogoi i Allah ko'i naton in de'emanbií baí mo'ondok ing kita, ta'e Rohobií inta mobogoi in ropot bo mopuling in tabi bo mokotahang kong gina ing kita.

8Manangka intua dikabií mo'ondok im mopota'au bo moguman kon onu inta inaidan i Tuhan naton. Dika doman mo'oyak, sin aku'oi im pinobonu kom ponjara lantaran mopirisaya ko'i-Nia, ta'e pakeíbií in ropot inta inogoi i Allah motanggung moyotakin kon roriga sim mopoyaput in Habar Mopia tatua.

9Ki Allah noposaḷamat bo nogoinií ko'i naton baí mobalií umat inta kinotabi-Nya. Tua inaidan-Nya, de'emanbií pinodoyon kon oaíid naton mopia, ta'e pinodoyon-Nyabií kom makusud-Nya tontanií bo totabi-Nya inta pinongin i Kristus Yesus ko wakutupa in dunia na'a diaípa pinomia.

10Bo masa in tana'a pino'ontongdon i Allah in totabi-Nya tatua ko'i naton. Pinotabaí-Nya namangoi in Raja Mopoposaḷamat naton ki Yesus Kristus. Sia inta ain nonaḷow kong kawasa im popatoi. Tuata inta pinota'au kon Habar Mopia tatua.

11Bo lantaranbií mopoyaput in Habar Mopia tatua daí inoinií i Allah in aku'oi mobalií rasul bo guru.

12Tuamai aku'oi nokorasa kom bayongan roriga tatua, ta'e aku'oi in umuranbií moyakin sing kinota'auankubií totok ki ine im pinirisayaku tua. Moyakinbií in aku'oi kon onu inta ain inogoi-Nya pinoki aid ko'inakoí tantuíbií koḷukadan-Nya modapot in singgai pangabisan.

13Duduiaibií totu-totu'u in totunduí no'itutui inta ain inogoiku ko'inimu. Dika umukat kon onu inta aim pinirisayamu bo kon tabi inta ain nobalií kapunya'an naton, sing kita notobatuídon i Kristus Yesus.

14Takin totuḷung in Roho i Allah inta umuran kotaki-takin naton, umurai ḷukadai kopira onu inta ain inogoi i Tuhan ko'inimu, sing kobolibií totok intua.

15Baí kota'auanmu kom bayongan intau inta kon Asia Kecil ain nonaḷaímai ko'inakoí. Umpakah ki Pigelus bo ki Hermogenes.

16Ta'e tombonu im baḷoi Onesiporus umuran namangoi moposanang ing ginaku, daí po'igumonku makow ki Tuhan tantuí mobogoi im barakat ko'i monia, sin umpakahbií kom bonu im ponjara aku'oi ta'e ki Onesiporus bo tombonu im baḷoinya tua diaíbií mo'oyak im mamangoi mokipodungkuḷ ko'inakoí.

17Wakutu ing ki Onesiporus no'iyaputdon kon Rum, baḷuínya sinayak in aku'oi nodapot noyodungkuḷ ing kami.

18Bo kinota'auanmu bidon totok wakutu in aku'oi kon Epesus, mobayong totok in totuḷungnya ko'inakoí. Daí aku'oi in tongaí tantuí mopo'igum makow in doaí simbaí ki Allah umuran mobogoi im barakat bo totabi ko'inia ko wakutu in singgai ponantuíandon i Tuhan kom bayongan intau.



 <<  2 Timotius 1 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran