Alkitab Mobile SABDA
[VER] : [MONGONDOW]     [PL]  [PB] 
 <<  Kisah Para Rasul 11 >> 

1Rasul mita bo bayongan intau kon Yudea nokodongogdon kon habar kon intau inta de'eman agama Yahudi ain notarima kon Habar Mopia.

2Daí naonda ing ki Petrus minayak in Yerusalem, sinoruían monia in sia.

3Kai monia, "Ikow aindon sinumu'ot kom baḷoi mita in intau inta diaí sinunat bo nonga'an domandon takin monia!"

4Tuamai ininsilangan i Petus ko'i monia onu inta ain nobalií tatua. Kai-nia:

5"Wakutu in aku'oi yogot mosambayang kong kotaí in Yope, daliíbií bo kinawasa'an Roho i Allah in aku'oi bo noko'ontong kon naíonda bo daing mobanat no'ituntun monag nongkon ḷangit, no'ibambeí kon sikunya opat bo nogogai kong kilidkumai.

6Naonda inindoianku im bonunya, daí inontongku im mahaḷuk mita inta opat in sioḷnya, bo mahaḷuk mita inta kalig, mahaḷuk mita inta ḷumanday im mayak bo ḷagapan doman mita inta lindong.

7Bo dinongogku in singog noguman ko'inakoí nana'a, 'Hei Petrus, pobangondon! Rataídon mita intua bo ka'an!'

8Ta'e aku'oi notubag, 'Doiíbií aku'oi, Tuhan! Sin diaípabií dodai onda aku'oi noka'an kom mahaḷuk inta haram bo nonajis.'

9Ta'e buiku dinongog in singog nongkon ḷangit tatua noguman, 'Onu inta kai Allah mota'au ka'anon, yo dona'aibií kai monimu in haram.'

10Singog tatua kotoḷuku dinongog, onda intua no'isintakdon monik bui kon soroga intua komintan.

11Kon dodai doman tuata no'iangoi ko'inakoí, in intau taya toḷu kom baḷoi inta pinogutunanku. Mosia namangoi nongkon Kaisarea.

12Bo Roho i Allah nopotabaí ko'inakoí mayak moyotakin monia takin diaí mohawatir. Daí taya onom tanion dinumuduidon doman ko'inakoí minayak ing Kaisarea, bo sinumu'ot ing kami komintan kom baḷoi i Kornelius.

13Bo kon tua nodait ino'uman i Kornelius ko'inami kon sia in noko'ontong kom malaekat sinimindog kom baḷoinya bo noguman, 'Potabaídon intau mayak in Yope mogoinií kon tobatuí intau inta ki Simon Petrus in tangoinya.

14Sin sia im mopota'au ko'inimu in Habar Mopia inta mokosaḷamat ko'inimu bo mokosaḷamat doman kom bayongan ginaḷummu.'

15Bo naonda aku'oi nomangkoidon nongonguman, Roho i Allah noponag bo nongawasa ko'i monia komintan naí inta nobalií ko'inaton kolipod.

16Daí kinotoropankudon in singog i Tuhan nana'a, 'Ki Yohanes mobaptis in tubig, ta'e mo'ikow baptison in Roho i Allah.'

17Daí tantuí notarang bidon kong ki Allah im mobogoibií doman in totabi-Nya kon intau inta de'eman Yahudi, naí totabi inta inogoi-Nya ko'inaton wakutu ing kita bagu nopirisaya ko'i Tuhan Yesus Kristus. Tuamai, diaíbií doman inta ampaganku ing ki Allah!"

18Naonda in dinongog monia intua, nopiadon gina monia komintan poḷat nodayow ko'i Allah. Kai monia, "Aka natua, daí intau mita inta de'eman Yahudi inogoianbií doman i Allah ing kasampatan mogogai mogaid kon dosa mita bo moko'ulií kong kobiagan mononoi!"

19Naonda ilimodon ing ki Stefanus, intau mita inta nopirisaya ko'i Yesus Kristus nongo'irangkap noḷagui sin tokodomokon bo tokopogutuíon in intau mita inta diaí mopirisaya. Oyuíon no'ibayak kom Penisia, bo oyuíon doman no'idapot in Siprus bo Antiokhia. Kon tua mosia nopoyaput in Habar Mopia kon intau mita in Yahudi.

20Ta'e kon sigad in intau mita inta mopirisaya tatua, inta nongkon Siprus bo Kirene, oyuíon doman minayak kon Antiokhia bo nopoyaput in Habar Mopia kom bayongan intau inta de'eman agama Yahudi doman.

21Kawasa i Tuhan umuran kotaki-takin monia, sahingga in nobayongdon in intau nopirisaya bo moposarahkan ing kobiagannya ko'i Tuhan.

22O'uman mita tatua no'iyaput kon jama'at mita inta kon Yerusalem. Manangka intua pinotabaí monia ing ki Barnabas minayak in Antiokhia.

23Naonda in no'iyaput kon tua ing ki Barnabas, bo noko'ontong kon naíonda ing Allah nomarakat ko'i monia, nopia totok ing ginanya. Bo sia nopo'igum domandon kom baí mosia totu-totu'udon mopirisaya bo motoindudui ko'i Tuhan.

24Ki Barnabas na'a intaubií mopia, inta umuran kinawasaan in Roho i Allah bo intau inta totok mopirisaya ko'i Tuhan sahingga moaíntoídon intau in dinumudui ko'i Tuhan.

25No'iduduimai kon tua ki Barnabas minayakdon in Tarsus notayak ko'i Saulus.

26Naonda in noyodungkuḷnya ing ki Saulus, dinianya ing ki Saulus minayak in Antiokhia nogutun totaong kon tua bo noyobiag takin jama'at kon tua poḷat doman notunduí kom mobarong intau. Kon Antiokhia tuata intau mita inta mopirisaya ko'i Yesus muna-munamai sinangoian Keresten.

27Wakutu intua oyuíon tongonumai in nabi namangoi nongkon Yerusalem mopobayak in Antiokhia.

28Kon sigad monia tua oyuíon ing ki Agabus in tangoinya. Sia kinawasaan in Roho i Allah bo sinimindog nopota'au kom mobalií im malarat moḷoben kon dunia na'a. (Bo totu'ubií nobalií kon sempo ki Kaisar Klaudius nomarentah.)

29Daí dumodudui mita notobatuí kong gina bo nosipun kon totuḷung podudui ing komampuan tobatuí bo tobatuí. Totuḷung tatua inogoi monia kon utat mita inta kon Yudea.

30Daí notobatuí doman kong gina im mosia, bo nosipun kon totuḷung ogoi kom penatua mita. Totuḷung mita tatua inogoi pinokidia monia ko'i Barnabas bo ko'i Saulus.



 <<  Kisah Para Rasul 11 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran