1Ki Paulus bo ki Silas nopobayak in Tesalonika nongingguput kom bobayaían monia. Mosia nongin Ampipolis bo Apolonia. Kon tua oyuíon baḷoi pososambayangan intau Yahudi.
2Daí ki Paulus minayak im baḷoi pososambayangan tatua bo naí biasamai aidannya aka oyuíon im baḷoi pososambayangan otongonnya -- sia nongonguman takin intau mita kon tua soaáḷ tombonu in Alkitab. Toḷu nodiminggu noyodudui sia sinumuotmai kom baḷoi pososambayangan tatua.
3Buk Mosuci tatua im binaḷiínya dodoyonan noginsilang bo noponyata kong ki Raja Mopoposaḷamat inta pinodandi i Allah tua im mustibií motarima kon roriga, matoi ta'e bui mobiag. Ki Paulus noguman doman nana'a, "Ki Yesus inta pota'auku ko'i monimu na'a, Sia tuata ing ki Raja Mopoposaḷamat pinodandi i Allah."
4Daí tongonumai intau kon tua nobalií nopirisaya ko'i Yesus bo poḷat dinumudui mita ko'i Paulus bo ko'i Silas; natua doman bayongan intau in Yunani inta mo'ondok ko'i Allah bo bobay mita inta duduianmai monia kon tua, nodait doman nopirisaya ko'i Yesus.
5Ta'e noko'ontongmai kon natua, intau mita in Yahudi totok nongo-intoi. Daí nogoiniídon mosia kom bayongan intau mora'at kon tua inta tongaí umuran moyo-moyosipun sin diaí ko'oaíidan bo pinarentah monia nongacau kom bayongan kotaí kon tua bo minayak nonuntun kom baḷoi i Yason intau inta nopirisayadon ko'i Tuhan Yesus poḷat notayak ko'i Paulus bo ko'i Silas sim bayaían potayow kon intau moaíntoí.
6Ta'e diaí no'ulií monia in taya dua, daí ki Yasondon takin tongonumai intau mopirisaya ibanea in dinia monia kon tayowon intau mita moḷoben kong kotaí tatua. Bo totokdon nomaḷuí nana'a: "Intau mita tana'a mongongacau kom bayongan tampat! Mosia namangoi doman ing kotaí naton na'a,
7bo sinarima doman i Yason kom baḷoinya. Mosia na'a inta umuran moḷawang kon atorang mita i Kaisar kon Rum, sim mosia noguman kon oyuíonbií in raja ibanea inta ki Yesus in tangoinya."
8Singog monia tatua nokobingung kon intau mobarong bo kon intau mita moḷoben kon tua.
9Ta'e naonda inogoian i Yason bo i utat mita ibanea in doit mosia daí binuliandon bui monia.
10Doḷom tua ki Paulus bo ki Silas pinotabaídon im bayongan intau inta mopirisaya kong kotaí tatua, simbaí mayakdon im Berea. No'iyaputmai kon tua mosia minayak im baḷoi pososambayangan intau Yahudi.
11Intau mita in Yahudi kom Berea mopia-pia nongkon intau mita in Yahudi kon Tesalonika. Takin sanang gina mosia mokidongog kon habar soaáḷ ki Yesus, bo pomuḷoi in singgai mosia umuran mobaca kom Buk Mosuci sim monarukira mongo totu'u in sinunduí i Paulus ko'i monia tua.
12Nobarong kon sigad monia tua in nopirisaya ko'i Yesus, bo de'emanbií tongaí topilik intau mita in Yunani inta duduianmai monia in nopirisaya, pinomayak ḷoḷaki andeka bobay.
13Daí naonda in dinongog im bayongan intau Yahudi inta nogutun kon Tesalonika kon ki Paulus nopoyaput domandon in Habar Mopia kom Berea, intau mita in Yahudi tatua namangoi domandon intua, nohasut bo nopoyaying gina im bayongan intau kon tua.
14Daí ḷagido i utat mita kom Berea tua inatod ing ki Paulus kom pintad, ta'e ki Silas bo ki Timotius in tantuípabií nogutun kong kotaí tatua.
15Naonda ing ki Paulus inatodon dapot kon Atena, utat mita inta norogatod tatua nobuidon kom Berea takin nodia kong koyow i Paulus simba ki Silas bo ki Timotius musti ḷagi momatuk ko'inia.
16Wakutu ing ki Paulus nogoḷatpa makow ko'i Silas bo ko'i Timotius kon Atena, noaíjar totok ing ginanya sing kotaí tatua nopuling im berhala mita.
17Tuamai wakutu ing kom baḷoi pososambayangan, sia umuran mososirita'anmai takin bayongan intau Yahudi bo intau mita ibanea kon tua inta ain nopirisaya ko'i Allah. Naí doman tua, pomuḷoi in singgai aka moyodungkuḷ in intau mita kom pasa-pasarannya, sia umuran doman mososirita'anmai monia.
18Guru-guru nongkon golongan Epikuros bo Stoa nobobayowanmai takinnya. Oyuíon kon sigad monia tua in nosingog nana'a, "Eta onubií ing kota'auan intau mita tanion? Mosia nion in dondunguḷbií mita, ta'e moaíntoí in o'uman!" Bo ibanea in moguman doman, "Sia nion naí bií mopota'au in dewa tolaeng." Tua mita in singog monia sing ki Paulus nopota'au in habar soaáḷ ki Yesus ko'i monia bo soaáḷ doman kobiagan naonda im matoi.
19Bo dinia monia ing ki Paulus pinotayow kon sidang Areopagus. Kon tua mosia noguman ko'inia nana'a, "Kami mo'ibog monota'au kon totunduí mobagu inta poyaputmumai nion.
20Sin dongogon nami im mokoherangbií mita in o'umanmu. Manangka intua mo'ibog ing kami monota'au kom mangalenya."
21(Sim bayongan intau Atena bo intau mita mokokiaíngoi inta nogutun kon tua totok mongo'ibog tumompolituíanmai mongindongog bo mongonguman kon soaáḷ mita inta mobagu.)
22Ko wakutu in sinimindogdon ki Paulus kon tayowon intau moaíntoí inta noyosipun kon Areopagus tua, ki Paulus nosingog: "Hei intau mita in Atena! Ontongonku mo'ikow totokbií im motoindudui mita kon agama.
23Sin wakutu in akuoi nodondaḷoi kon kotaímu tana'a, bo nonarukiramai kon tampat mita pososambayangan monimu kon na'a, aku'oi noko'ontong doman kon tampat pobobogoian monimu kon sosumbah; kon tampat tatua pinaisan nana'a, 'Ko'i Allah Inta Diaí Kota'auan.' Yo ki Allahbií inta diaí kinota'auan monimu tuata im pota'auku na'a ko'i monimu.
24Ki Allah inta nomia kon dunia bo tombonunya mita, Sia tuata Tuhan in ḷangit bo butaí. Sia in diaíbií nogutun kom baḷoi in dewa-dewa inta pinomia in lima intau.
25Sia tua in diaíbií moparaḷu kon totuḷung in intau, sin Sia tua inta mobogoi ing kobiagan, tompot bo bayongan yagi-yagi kon intau.
26Nongkon intau tobatuí pinomia-Nya im bayongan intau bo pino'utun-Nya kon dunia na'a. Siabií doman tua inta nonantuí nongkon munamai, to'onu bo kon onda in mota'au kobiagan intau.
27Inaidan i Allah intua komintan simbaí tayakkon monia in Sia. Po'igumon makow doaí moyodungkuḷ monia in Sia ko wakutu i mosia motayak ko'i-Nia. Ta'e sabanarnya in diaíbií noyayuk ko'i naton ing ki Tuhan.
28Sin naí inta kain singog in intau, 'Kita na'a in nobiag bo mota'au mamagií mamakow modapot oyuíon kon dunia, lantaranbií kawasa-Nya.' Naí doman kain momomantun monimu, 'Kita na'a ing komintanbií ki adií-Nya mita.'
29Daí lantaran kita bo ki adiíbií mita i Allah, daí diaíbií mota'au anggapon naton kong ki Allah tua in naí bií onda bo patong inta inaidan nongkon buḷawan andeka inaidan nongkon perak andeka naí batu inta inaidan pinodudui ing kopopandoi intau.
30Oaíid mita naton inta diaí mopia inta kolipod aim bidon iliong i Allah, asaḷ bo tana'a makow kita bo bayongan intau kon dunia, mogogaidon mogaid kon dosa mita.
31Sin aim bidon sinantuí-Nya in wakutu pongadilan kom bayongan intau kon dunia na'a. Oaíidan tatua aidan in tobatuí intau inta aim pinilií i Allah tontanií. Bo baí totu-totu'u mopirisaya im bayongan intau kon soaáḷ tatua, daí biniag bui i Allah in Sia nongkon kinopatoian-Nya!"
32Naonda intau mita tatua nokodongog kon inta pinoguman i Paulus soaáḷ mobiag bui naonda im matoi, oyuíon ing kon sigad monia ing kinumosing. Oyuíon doman in noguman, "Kami im mo'ibogpa bui mokidongog ko'inimu mosingog kon soaáḷ natua."
33Da' sinaḷa'anmaidon in Paulus im mosia.
34Ta'e oyuíon kon sigad monia tua in dinumudui ko'i Paulus bo nopirisaya ko'i Yesus. Mosia tua ing ki Dionisius tobatuí anggota im majelis Areopagus, bo ki Damaris, tobatuí bobay kon tua takin tongonumai doman intau ibanea.
<< Kisah Para Rasul 17 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel