1Wakutu intua ki Saulus umuranpabií mogogondok bo molimod kom bayongan intau inta ain nopirisaya ko'i Tuhan Yesus. Sia minayak ko'i imang moḷoben,
2bo no'igum kon surat kuasa ko'inia sin diaannya kom majelis mita in Yahud inta kon Damsyik, simbaí aka sia mokodungkuḷ kon intau mita kon tua inta mopirisaya ko'i Tuhan Yesus, yo sia mota'au modomok ko'i monia bo diaan pobayak in Yerusalem.
3Bo wakutu in sia minayak in Damsyik, naonda in nodiugdon kong kotaí tatua, daliíbií bo oyuíon in sindar nongkon ḷangit nonindar ko'inia.
4Daí no'umpag in sia kom butaí bo dinongognya in singog noguman nana'a ko'inia, "Saulus, Saulus! Nongonu sim momogutuíbií in ikow ko'i-Nakoí?"
5Daí ki Saulus noliboí, "Ki ine in Ikow Tuang?" Daí kain tubag in singog tatua, "Aku'oi na'a ing ki Yesus inta pinogutuímu tua.
6Ta'e tana'a makow poguman-Ku ko'inimu pobangondon bo tu'otdon ing kotaí. Bain kon tua bo poguman-Ku ko'inimu mongo onu im poki aid-Ku ko'inimu."
7Bayongan intau inta noyotakinnya nongo-italikokog bo pinunguḷ; sim mosia nokodongog domandon kon singog tatua ta'e diaíbií tobatuímai intau in inontong monia.
8Ki Saulus sinimindog bo binukaínya im mata, ta'e diaídon moko'ontong in sia, daí dongka bidon kinapit monia sia minayak kong kotaí in Damsyik.
9Toḷu nosinggai sia diaí noko'ontong bo solama tua diaí doman nonga'a-nga'an bo diaí doman nonginu-nginum.
10Kon Damsyik oyuíon tobatuí dumodudui i Tuhan Yesus ki Ananias in tangoinya. Ki Tuhan nokipogontong ko'inia bo noguman, "Ananias!" Ki Ananias sinumubag, "Aku'oi na'a, Tuhan."
11Daí ki Tuhan noguman ko'inia: "Pobuatdon tana'a makow. Bayakdon kom baḷoi Yudas bo mongin daḷan inta sinangoian Daḷan Motulid. liboí kon tua intau inta ki Saulus in tangoinya. Sia tua intau in Tarsus. Koyogot mosambayang sia intua,
12bo kino tali'ontongannyadon kon oyuíon tobatuí intau inta ki Ananias in tangoinya namangoi nomarakat ko'inia, simbaí moko'ontongpa bui in sia."
13Ki Ananias noguman, "Tuhan, aindon dinongogku kom bayongan intau, kon nobayongdon totok intau im pinogutuí bo ilimod in intau tatua kon Yerusalem, intau mita inta mopirisaya ko'i Tuhan Yesus.
14Bo tana'a sia namangoi domandon na'a sin inogoiandon doman i imang mita itoi ing kasampatan modomok kon bayongan intau inta mopirisaya ko'i-Nimu."
15Ta'e ki Tuhan noguman ko'i Ananias, "Bayakdon! Sin sia tua aim bidon pinilií-Ku mobantung ko'i-Nakoí mopota'a-ta'au makow in Habar Mopia soaáḷ Aku'oi kom bangusa mita ibanea inta deeman intau Yahudi bo kon raja mita bo kon intau mita in Israel.
16Bain Aku'oi tontanií im mopo'ontong ko'inia kom bayongan roriga inta musti korasa'annya lantaran pirisayanya ko'i-Nakoí."
17Daí ki Ananias minayak domandon im baḷoi tatua bo nomarakat ko'i Saulus, kainia, "Saulus utatku, ki Tuhan Yesus inta ain nokipogontong ko'i utat kon daḷan, wakutu ing ki utat mopoaíngoi in na'a, Sia doman tua inta nopotabaí ko'inakoí mamangoi ko'inimu simbaí ki utat buipa moko'ontong bo kawasa'andon Roho i Allah."
18Daí kon dodaipa doman intua bo kinorasa'annya naí noḷabuí ing karapus matanya, bo noko'ontongdon bui in sia. Daí nobangondon in sia bo poḷat binaptis.
19Naonda in nonga'an makow, sia buidon noropot.
20Ki Saulus nogutunpa kon Damsyik tongonumai nosinggai noyotakin in dumodudui mita i Yesus kon tua.
21Bayongan intau noherang nokodongog ko'i Saulus. Mosia noguman, "Eta de'emanbií sia na'a inta moramiji molimod kom bayongan intau inta mopirisaya ko'i Tuhan Yesus kon Yerusalem? Bo inta mamangoi doman na'a sim modomok kom bayongan intau inta mopirisaya ko'i Tuhan Yesus bo diaan kon tayowon in imang mita itoi!"
22Ta'e moḷobendon totok im pongaruh i Saulus ko'i monia. Onu inta nobalií ko'inia soaáḷ ki Tuhan Yesus, nodaitnya ino'uman ko'i monia, sahingga nopirisayadon totok im mosia kong ki Yesus tuata in Rajabií Mopoposaḷamat, dapot intau mita Yahudi kon Damsyik dia'don mokobayow.
23Naonda in tongonumaidon nosinggai kon tua intau mita in Yahudi noyopakat molimod ko'i Saulus.
24Ta'e makusud monia tatua kinota'auan i Saulus. Doḷom bo singgai mosia mogoḷat makow kong ngara ing kotaí tatua, sim molimod ko'inia.
25Ta'e kon doḷom tobatuí, sia binonu in dumoduduinya mita kon karansi bo pinolimpat pinongin dinding kotaí tatua.
26No'iyaputmai kon Yerusalem, ki Saulus moramiji dumugang kon dumodudui mita i Yesus kon tua. Ta'e dumodudui mita i Yesus kon tua komintan mongo'ondok ko'inia, sin diaípa mopirisaya im mosia kon sia tua in totu-totu'udon nobali dumodudui i Tuhan Yesus.
27Ta'e inangoi i Barnabas bo ginamaí in sia bo pinotayow kon rasul mita. Bo nodait ino'uman i Barnabas ko'i monia in soaáḷ naíonda ing ki Saulus noko'ontong ko'i Tuhan kon yuaík in daḷan bo soaáḷ naíonda ing ki Tuhan nosingog ko'inia. Bo ino'umannya doman ko'i monia ing kinobobarani i Paulus nopoyaput in Habar Mopia soaáḷ ki Yesus kon Damsyik.
28Daí sinarimadon monia ing ki Saulus poḷat nogutundon noyotakin monia kon Yerusalem. Kon tua sia mobarani totok mopoyaput in Habar Mopia inta pinodoyon kom bonu in tangoi Tuhan.
29Sia umuran mongonguman bo mobobayowan takin intau mita in Yahudi inta nomakeí im bahasa Yunani, sahingga in totok ramijion monia limoddon.
30Ta'e naonda ing kinota'auan jama'at in roncana monia tatua, baya-bayak dinia monia in sia kon Kaisarea bo poḷat pinokibayaían monia in Tarsus.
31Daí bayongan jama'at kon Yudea, Galilea bo Samaria komintan nopia ing gina. Takin totuḷung in Roho i Allah, bo takin doman togu'ondok ko'i Tuhan, bayongan jama'at koropot-koropotdon bo kodugang-kodugang domandon ing kobayongea.
32Ki Petrus minaya-mayak makow nokipodungkuḷ kon jama'at mita kon lipu-liup'annya. Kom binaya'annya tatua sia nongandup kon jama'at mita i Tuhan inta kon Lida.
33Kon tua sia noyodungkuḷ Eneas, intau inta ain waḷu notaong no'itosiug makow sin diaídon mokobayak.
34Ki Petrus noguman ko'i Eneas, "Eneas, ki Yesus Kristus mongundam ko'inimu. Pobangondon bo to'inutdon in tosiganmu tanion." Daí ko wakutupa doman tatua nobangon ing ki Eneas, bo nopirisayadon im mosia ko'i Tuhan.
35Natua doman im bayongan intau kon Yope bo kon Saron. Mosia nopirisaya domandon mita, naonda in noko'ontong ko'i Eneas inta ain nokobayak tua.
36Kon lipuí tatua oyuíon doman bobay, tangoinya ki Tabita. Sia tobatuí intau inta mopirisaya ko'i Yesus. (Aka kon Yunani, ki Dorkas in tangoinya.) Sia umuran mogaid kon inta mopia bo umuran mo'ibog motuḷung kon intau mita inta nobiag nobogaí.
37Ta'e dodai intua sia notakit poḷat minatoi. Naonda iningguíandon, mayatnya inukat monia kong kamar kon limonik.
38Lantaran lipuí in Lida nodiug kon Yope, daí naonda in intau mita inta mopirisaya ko'i Yesus nokodongog kong ki Petrus oyuíon kon tua, binayak monia bo pinoki'oinií kon intau doyowa takin koyow nana'a, "ḷagipa angoi in na'a."
39Ki Petrus baḷuí nono'inut bo minayak noyotakin monia. Naonda in no'iyaputmai kon tua, dinia monia in sia noponik kong kamar inta pinogukatan kom mayat i Dorkas. Bayongan intau inta dongkadon boba-bobay komintan namangoi sinimindog kon diug i Petrus poḷat nongombaḷ bo mopo'ontong doman in ḷambung inta inaidan mita i Dorkas wakutu in nobiagpa.
40Ta'e nodaitnya pinokiḷuaian im mosia kong kamar tatua, bo sia sinumungkud nosambayang. Nopaḷut makow nosambayang, nobobui in sia kon mayat tatua bo noguman, "Tabita, pobangondon!" Daí ki Dorkas nobukaídon kom mata, bo naonda inontongnya ing ki Petrus, bango-bangon in sia bo ilimituí.
41Daí kinadaiandon i Petrus in limanya bo pinosindong. Onda intua inoiniínyadon in intau mita inta mopirisaya bo bayongan intau inta dongkadon boba-bobay kon tua, bo ki Dorkas inta ain nobiag bui pinosarahkannyadon ko'i monia.
42Onu inta ain nobalií tatua, no'isiardon kom bayongan lipuí kon Yope. Daí nobayongdon intau in nopirisaya ko'i Tuhan Yesus.
43Nopaḷut makow kon tua ki Petrus nogutunpa tongonumai nosingai kon Yope kom baḷoi i Simon, intau inta mororubus kong kulit.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel