Alkitab Mobile SABDA
[VER] : [MONGONDOW]     [PL]  [PB] 
 <<  Kolose 1 >> 

1Utatku mita umat i Allah kong Kolose inta umuran mosatia motobatuí i Kristus! Saḷaku rasul i Yesus Kristus, -- inta inoinií i Allah tontanií -- aku'oi, ki Paulus bo ki Timotius inta ki utat naton, mopo'igum makow doaí simbaí ki Allah, ki Amaí naton tantuí mobogoi im barakat bo kobiagan motompia ko'i monimu.

2(1:1)

3Dinongogdon nami kom mo'ikow ain nopirisaya ko'i Yesus Kristus bo motabi doman kom bayongan umat i Allah. Manangka intua wakutu in sinambayangan nami i mo'ikow, kami umuran doman nopoyaput in sukur ko'i Allah, ki Amaí i Yesus Kristus, Tuhan naton.

4(1:3)

5Mo'ikow mopirisaya bo motabi, sim mo'ikow moharap kon onu inta ain sinadia i Allah ko'i monimu kon soroga. Ain dinongog monimu in soaáḷ tatua wakutu in Habar Mopia inta sabanarnya pinoyaput ko'i monimu.

6Habar nongkon i Allah tatua no'iwayadon kom bayongan dunia na'a, bo kobiagan intau umuran binarakatan in habar tatua, notongkai doman ing kobiaganmu aim binarakatan pinangkoipamai mo'ikow nokodongog kon soaáḷ totabi i Allah bo totu-totu'u inindongogan monimu intua.

7Habar tatua dinongogdon monimu nongkon i Epapras, yobayat topogaidan inta kinotabi nami. Sia tua mogogaid kon oaíidan i Kristus inta mosatia mogaid kong kopontingan naton.

8Sia doman tua inta nopoyaput in habar ko'inami kom mo'ikow ain kinawasa'an in Roho i Allah sahingga in nobiagdon mototabian.

9Manangka intua umurandon sambayangan nami im mo'ikow naonda ing kinodongogandon nami in habar soaáḷ mo'ikow. Kami mopo'igum ko'i Allah simbaí mo'ikow mobijaksana bo mopandoi lantaran kawasa in Roho i Tuhan, sahingga ing kota'auandon totok monimu onu ing kino ibog i Allah.

10Daí mo'ikow im mobiagdon podudui in ibog i Allah bo umuran mokosanang kon gina-Nya, sahingga kom bayongan yagi-yagi mo'ikow umuran mobogoi im bungai inta mopia. Bo pongotahuan monimu soaáḷ ki Allah modugang domandon.

11Igumondon makow, simbaí kawasa i Allah inta momulia tantuí moginrigon ko'i monimu, sahingga umuran mosanang bo mopia ing gina monimu wakutu im moyogintayow im bayongan roriga.

12Bo diaí doman mokoliong im mosukur ko'i Amaí, sing ki Amaí tua in nopopatus motarima kon onu inta sinadia i Allah kon umat-Nya inta nobiag kom bonu im bayag.

13Pinilatan-Nyadon ing kita nongkon kawasa inta nosindip bodongka pinamping kom bonu ing karaja'an i Adií-Nya inta kinotabi-Nya.

14Ki Adií-Nya tatua inta nopobebas ko'i naton, mangalenya bayongan dosa naton ain inampungan-Nya.

15Ki Kristus tua ing ko'ontongan. Sia tua ing gambar i Allah inta diaí ko'ontongan; Sia ing ki Adií i Allah inta guya-guyang, bo inta totok im moponting nongkon bayongan inta pinomia,

16sim pinongin i-Nia tua ki Allah nomia kom bayongan yagi-yagi kon soroga bo kon dunia na'a, inta ko'ontongan bo inta diaí ko'ontongan, no'itakin doman im bayongan roho inta nongawasa bo inta nomarentah. Bayongan inta kon ḷangit bo inta kom butaí pinomia pinongin i Kristus bo untuk doman ko'i Kristus.

17Kon wakutu im bayongan yagi-yagi diaípa, ki Kristus koyongan bidon oyuíon. Bo bayongan tua oyuíon lantaran Sia, tuamai, tua komintan ain notobatuí-Nya.

18Siata uḷu in awak-Nya, bo awak-Nya tua inta sinangoi jama'at. Sin Siabií tua pangkoi ing kobiagan jama'at tatua. Sia doman tua in Adií guya-guyang, inta muna-munamai biniag bui nongkon kinopatoian, sahingga Sia nobalií totok moponting nongkon bayongan yagi-yagi.

19Ibogbií i Allah tontanií im mopo'oyuíon kom bayongan yagi-yagi ko'i-Nia, bo bayongan tua oyuíon domandon ko'i Adií-Nya.

20Bo Sia doman tua inta pinakeí i Allah namangoi nopoyodame kom bayongan yagi-yagi takin-Nya, inta kon butaí ande kon soroga. Tua pinomia i Allah pinodoyon kong kinopatoian i Adií-Nya kong kayu pinoyotalempang.

21Kolipod mo'ikow noyayuk nongkon i Allah, bo Sia in sinaturu monimu sin oaíid bo raian monimu mora'at.

22Ta'e tana'a, pinodoyon kong kinopatoian i Adií-Nya, sinopiadon bui i Allah in hubungan monimu takin-Nya. Natua im pinogogaid-Nya simbaí mo'ikow mota'au diaan tumoyow ko'i Allah takin ka'ada'an mokudus, modarit bo diaí in aid mora'at.

23Manangka intua, mo'ikow musti umuran mosatia im mopirisaya bo umuran doman kumadai mokoporopot kon onu inta aim pinirisaya monimu. Dika modapot in ukatan monimu harapan inta ain inogoi ko'i monimu wakutu im mo'ikow notarimadon kon Habar Mopia nongkon i Allah. Habar Mopia tatua aim pinota'au kom bayongan intau kon dunia na'a. Bo lantaranbií tuata, aku'oi ki Paulus nobalií mogogaid kon oaíidan i Allah.

24Tana'a mopiabií ing ginaku mororiga sing kopontinganmu. Sin aka awakku bo mororiga, yo tua im mangalenya aku'oi nogintopodon kon roriga inta diaípa kinorasa'an i Kristus, sing kopontingan in jama'at saḷaku awak-Nya.

25Aku'oi im binalií i Allah mogogaid-Nya sing kopontingan monimu saḷaku jama'at-Nya. Aku'oi im mustibií mopoyaput im bayongan habar nongkon i Allah.

26Habar inta no'onggotdon totok binuni-buni makow i Allah kom bayongan intau, ta'e tana'a im pino'ontong-Nyadon kon umat-Nya.

27Kon umat-Nya tatua ki Allah mo'ibog moponyata kon totokbií im mopia bo moḷoben onu im binuni kon intau mita ibanea. Na'a inta binuni tatua: Ki Kristus tua in nionbií ko'i monimu, bo tua im mangalenya, kom mo'ikow im mo'itakin doman mokorasa kong kamulia'an i Allah.

28Ki Kristusbií tatua inta pinota'au nami kon intau mita. Kami nomakeí ing kabijaksana'an bo pongotahuan im mononggina bo motunduí ko'i monia, simbaí pomuḷoi intau mota'au diaan ko'i Allah saḷaku intau inta noguyangdon kon soaáḷ pirisaya, sim mosia ain notobatuí i Kristus.

29Simbaí koyaputanku intua, daí tuamai aku'oi moramiji totok mogaid. Aku'oi moramiji takin bayongan tonaga inta inogoi i Kristus ko'inakoí bo inta nongawasa doman ko'inakoí.



 <<  Kolose 1 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran