1Kon singgai tobatuí ki Yesus sinimindog makow kom pintad in Danow Genesaret. Nobayong intau namangoi ko'i-Nia sim mokidongog kon Habar Mopia nongkon i Allah.
2Kon tua, ki Yesus noko'ontong doman kon uangga doyowa. Kitogi uangga tatua aindon noponag nongkon uangga tatua bo koyogot nondaritmai kon landaraí monia.
3Ki Yesus sinumakoi kon uangga tobatuí kon tua. Sinakoian-Nya tua in uangga i Simon. Pinoki'undud-Nya ko'i Simon pinoyayuk topií kom pintad bo ilimituí in Sia kom bonu in uangga tatua bo nopoyaput in Habar Mopia kon intau moaínto inta kon tua.
4Nopaḷut makow in Sia notunduí, Sia noguman ko'i Simon nana'a, "Pobotoy bo bayakdon in tampat inta molinow bo bukaí bui in landaraímu sim podomok kon toyak."
5Daí ki Simon noguman, "Pak Guru, tonggobi'idon na'a im pinoramijian nami nodomok kon toyak, ta'e diaí tobatuímai in noaílap nami. Tongaí na'a bo ki Pak Guru in nopotabaí daí duduiankudon. Baya'anku bui bukaían in landaraí."
6Naonda in dinuduian monia onu inta pinoguman i Yesus, daí noko'ulií im mosia kon toyak totok in nobarong, sahingga aindon mobisik in landaraí monia tua.
7Mosia dongkadon nokituḷung kon yobayat mita monia inta kon uangga ibanea. Daí namangoi in yobayat mita monia tatua bo noduḷu nongambeí nopobonu in toyak inta noaáḷap monia tua kom bonu in uangga doyowa nodapot ain tumaḷom in uangga mita tatua.
8Noko'ontongmai kon natua ing ki Simon inta dinonoi ki Petrus, sinumungkud in Sia kon tayowonmai i Yesus bo noguman, "Taḷaíaidon in aku'oi na'a Tuhan! Sin aku'oi na'a intaubií baradosa!"
9Sing ki Simon bo intau mita inta noyotakinnya nongoherang in noko'ontong kong kobarong in toyak inta noaáḷap monia tua.
10Natua doman yobayatnya ki Yakobus bo ki Yohanes inta ki Adií mita i Zebedeus. Daí noguman ko'i Simon ing ki Yesus, "Dika mo'ondok, sin nongkon tana'a makow, ikow baliíon-Kudon mololandaraí kon intau."
11Daí ki Simon takin yobayatnya mita nogugutdon kon uangga tatua pinobayak in toba, onda intua sinaḷa'andon monia intua komintan bo dinumudui ko'i Yesus.
12Kon singgai doman tobatuí, wakutu ing ki Yesus minayak in tobatuí kotaí, Sia noyodungkuḷ in tobatuí ḷoḷaki inta pinanyaki kusta. Naonda in sia noko'ontong ko'i Yesus, sinumungkud in sia kon tayowonmai i Yesus bo noguman, "Pak Guru, aka ki Pak Guru mo'ibog mongundam, yo aku'oi na'a mopiabií i Pak Guru!"
13Daí kinadaian i Yesus intau tatua poḷat noguman, "Aku'oi mo'ibog, kopiadon!" Kon dodaipa doman intua bo nopia im panyakinya.
14Tongaí diaí inogoi Yesus in intau tatua moguma-guman makow kon intau ibanea kon onu inta ain inaidan-Nya tua. Ta'e pinotabaí-Nya in intau tatua, "Bayakdon ikow ko'i imang bo liboí poḷat poki'tantuí ko'inia kon ikow in totu-totu'u bidon nopia. Mopaḷut makow kon tua bayak in ikow pobogoi kong kurban naí inta pinarentah i Musa, sin tua im mobalií bukti kon intau mita kon ikow in totu-totu'u bidon nopia."
15Ta'e habar soaáḷ ki Yesus totokdon no'isiar kon lipu-lipuíannya, sahingga in nobayongdon intau namangoi sim mokidongog kon onu im poguman-Nya bo moki'undam doman kom bayongan panyaki monia.
16Nopaḷut makow kon tua ki Yesus minayak nosambayang kon tampat inta mo'ingogow.
17Kon singgai tobatuí, wakutu ing ki Yesus koyogot motunduímai, oyuíon in tongonumai intau im Parisi bo mototunduí kon agama ilimituí kon tua mokidongog kon onu im poguman-Nya. Mosia tua in namangoi nongkon Yerusalem bo nongkon kotaí mita kong Galilea bo Yudea. Kawasa i Tuhan umuran kotaki-takin-Nya sahingga Sia mokopia kon intau mita inta notakit.
18Kon dodai intua oyuíon in intau mita nobulig mangoi kon intau lempeng inta dongkadon no'itosiug makow kon tosiugannya. Mosia noramiji mopotu'ot in intau tatua kom bonu im baḷoi simbaí mota'au popo'ukat monia in intau lempeng tatua kon tayowonmai Yesus.
19Ta'e lantaran intau mobarong totok ing kon tua, sahingga in diaí kinopotu'otan monia in sia. Tuamai dinia monia in sia pinoponik kon tudu atop im baḷoi. Bodongka iḷokatan monia in atop im baḷoi tatua bo sinuntun monia monag takin in tosiugannya no'itongkanaí doman kon tayowonmai i Yesus inta kon yuaí-yuaík in intau mobarong tatua.
20Naonda ing ki Yesus noko'ontong kon naímai tua im pirisaya monia, daí Sia noguman kon intau tatua, "Utat, taḷaímu inampungandon."
21Mototunduí mita kon agama bo intau mita im Parisi mulai moliboí kom bonu ing gina monia, "Ki inebií intau tana'a sim mobaranibií im moningkule ko'i Allah? Eta ki inebií im mota'au mongampung kon taḷaí kolikudbií ing ki Allah tontanií?"
22Ta'e kinota'auan i Yesus in raian monia tatua, tuamai Sia noliboí, "Nongonu sim mo'ikow im moraibií kon natua kom bonu ing gina monimu?
23Onda degaí im mogampa-gampang, moguman kon, 'Taḷaímu aindon inampungan', andeka moguman, 'Pobangondon bo bayakdon!'
24Ta'e tana'a makow im ponyata-Kudon ko'i monimu kong ki Adií Intau oyuíonbií ing kawasa-Nya mongampung kon taḷa kon dunia na'a." Onda intua Sia noguman kon intau lempeng tatua, "Pobangondon, bo buatdon in tosiuganmu bo pobuidon!"
25Bango-bangon in intau tatua kon tayowon monia komintan bo nobingkat kon tosiugannya bodongka nobui sindaḷan modayow ko'i Allah.
26Mosia komintan totok nongoherang bo nodayow ko'i Allah. Bo takin porasaan no'ondok mosia noguman, "Moaíjaib totok ing kajadian inta inontong naton singgai in na'a!"
27Onda intua ki Yesus iḷumuai bo noko'ontong kon intau mononagih kom pajak, tangoinya ki Lewi inta limituí makow kong kantornya. Ki Yesus nogoinií ko'inia, "Duduidon ko'i-Nakoí!"
28Daí sinimindog ing ki Lewi bo nonaḷaímai kom bayongan tua bo dinumudui ko'i Yesus.
29Naonda intua ki Lewi nomia kom pesta kom baḷoinya sim pinotomuannya ko'i Yesus. Kon tua noaíntoí doman im mononagih kom pajak bo intau doman baradosa ibanea nonga'an noyotakin monia.
30Tongonumai degaí intau im Parisi bo mototunduí mita kon agama noya'at ing gina noko'ontongmai kon natua. Daí mosia noliboí kom murií-Nya mita, "Nongonu im mo'ikow sin nonga'anbií noyotakin im mononagih kom pajak bo intau mita inta diaí mopia?"
31Daí kain tubag doman i Yesus ko'i monia, "De'emanbií intau mosehat im moparaḷu kon dokter, ta'e intaubií inta notakit;
32Aku'oi na'a im mamangoi de'emanbií mogoinií kon intau inta norai kon mosia intau mobanar ta'e mogoiniíbií kon intau mita baradosa simbaí mosia mo'ibog monaáḷaímai kon oaíid monia inta diaí mopia."
33Intau mita im Parisi noguman doman nana'a ko'i Yesus, "Murií i Yohanes bo murií mita intau im Parisi mokakitbií im mopuasa bo mosambayang. Ta'e murií-Mu mita in umuranbií monga'an bo monginum."
34Tubag i Yesus ko'i monia, "Degaí mokobaḷií im mo'ikow moguman kon undangan mita kom mopuasa ko wakutu in rame pinonika'an. Wakutu in nonika'an ḷoḷaki koyota-yotakinpa monia? Tantuí diaíbií kobali!
35Tongaí oyuíonbií in wakutunya kon nonika'an ḷoḷaki tatua gamaían nongkon imonia. Bambií kon dodai in tuata bo mopuasa im mosia."
36Nopaḷut makow kon tua, ki Yesus nongonguman kom porumpama'an tana'a ko'i monia, "Diaíbií in intau inta moduḷampong kon ḷambung nokoyongan takin didit inta berakon nongkon ḷambung mobagu. Sin tantuí ḷambung mobagu tatua in moberakbií domandon. Bo apapa doman didit in ḷambung nobagu tatua diaí bidon nococok in ḷambung inta nokoyongandon.
37Naí doman tua, diaíbií in intau mogalin kon anggur nobagu kom bonu im botutu kulit inta nokoyongandon, sin aka natua yo anggur nobagu tatua im mokopopisiíbií kong kobotakan im botutu koyongan tatua, sahingga anggurnya mo'ibutak bo botutu im mogoguya'at.
38Aka anggur nobagu mustibií bonuon kom botutu inta mobagu doman.
39Natua doman, diaíbií intau im mo'ibog monginum kon anggur nobagu, aka sia nonginumdon muna kon anggur inta ain sinaguí no'onggot, 'Sin anggur inta ain sinaguí no'onggot tuabií im mopira-pira in nanamnya, gumannya.'"
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel