Alkitab Mobile SABDA
[VER] : [MONGONDOW]     [PL]  [PB] 
 <<  Matius 13 >> 

1Kon singgai tua ki Yesus iḷumuai nongkon baḷoi tatua bo minayak ilimitú kom bingkí in danow.

2Kon tua intau noroángoi bo nolipung ko'i-Nia, sahingga Sia minayak sinumakoi kon uangga bo ilimitú kon tua, intau moántó sinimindog komintan kom pintad.

3Bo mobarong in sinundú-Nya ko'i monia ta'e nomaké im porumpama'an. Sia nongonguman nana'a, "Tobatú intau monononggobá minayak bo nogambor.

4Ko wakutu in sia nogambor oyúon batoḷ noḷabú kom bingkí in daḷan, bo ḷagapan namangoi bo kina'annya nodait intua.

5Oyúon doman in noḷabú kom butá inta noántó im batu. Batoḷ tatua ḷagi nobiag sin nonipit im butánya.

6Ta'e naonda in nomukádon mata in singgai, biagnya tua noḷaḷow bo no'ingkag sin diá nonguakat.

7Oyúon doman in noḷabú kon yuá-yuák in diát. Dugi tatua nobiag bo nonisí kom biag im pinomuḷa tatua dapot im minatoi.

8Ta'e oyúon doman in noḷabú kom butá inta nopia bo sia nomungai: Oyúon mogatut noguntuḷ, oyúon in o'onom nopuḷuh noguntuḷ, oyúon doman in toḷu nopuḷuh noguntuḷ im bungainya.

9Ki ine ing kobongoḷan, yo pokidongog!"

10Bo murí-Nya mita namangoi bo noḷibó ko'i-Nia, "Nongonu sin ki Pak Guru motundú ko'i monia momakébí im porumpama'an?"

11Ki Yesus notubag, "Mo'ikow aindon inogoian ing karunia monota'au kon rahasia kon náonda ing ki Allah momarentah, ta'e mosia tua in diábí.

12Intau inta oyúondon ko'inia duganganbí bui, simbá sia moko'uḷí kom mo'iliu ing kobayongea, ta'e intau inta diá ing ko'inia yo onupa inta Oyúon ko'inia daitondon gamáan.

13Manangka intua Aku'oi motundú ko'i monia nomaké im porumpama'an, simbá umpakah noko'ontong, ta'e mosia náonda bo intau inta diá noko'ontong, bo umpakah mosia nokodongog, ta'e mosia náonda bo intau inta diá nokodongog sahingga in diá kota'auan monia im mangalenya.

14Mosia tua im pinonompodan kon onu inta pinoguman i Nabi Yesaya, nana'a: Ki Allah noguman: 'Mosia in umuran mokidongog, ta'e diá momangale; Mosia umuran monarukiramai ta'e diá monota'au kon onu inta nobalí.

15Sing gina i intau mita tana'a ain sinimimbunod, bo bongoḷan monia nobongoḷdon, bo mata monia aim binilogan; simbá mata monia diá moko'ontong bo bongoḷan monia diá mokodongog, sin dikabo komangaleandon monia onu inta pinoguman bo mosia mobui mamangoi ko'i-Nakó bo posaḷamaton-Ku im mosia.'"

16Ta'e mopia totok im matamu sin noko'ontong bo bongoḷanmu sin nokodongog.

17Sim poguman-Ku ko'i monimu: Mobarong in nabi bo intau inta mobanar im mo'ibog moko'ontong kon onu inta inontongdon monimu, ta'e mosia in diá noko'ontong, bo mosia i mo'ibog doman mokidongog kon onu inta aindon dinongog monimu, ta'e mosia in diá nokodongog.

18"Manangka intua indongogái mangale im porumpama'an tatua.

19Batoḷ inta noḷabú kon daḷan, tua im mangalenya: Intau inta nokodongog kom Pirman kon náonda ing ki Allah momarentah, ta'e diá kinomangalean monia. Kon tua namangoidon in Ibilis bo mogagow kon inta ain inambor kom bonu ing gina monia.

20Yo aka batoḷ inta noḷabú kon sigad im butá inta mobarong im batu, tua mangalenya, intau inta nokodongog kom pirman tatua, bo sia baḷú notarima takin pia ing gina,

21Ta'e Pirman tatua diá nonguakat kom bonu ing ginanya sahingga in diá nonahang. Aka koántugan in yoyiga andeka pomogutúan lantaran Pirman tatua, yo intau tatua baḷú mobaḷui im pirisaya monia ko'i Yesus.

22Bibit inta noḷabú kon yuá-yuák in diát, tua im mangaḷenya, intau inta nokodongog kom Pirman tatua tongá mohawatir kong kapunya'an kon dunia na'a bo mo'ibog mobiag mo'oyúon. Ibog monia kon in dunia tua im monisí kom Pirman tatua, dá diá momungai.

23Bibit inta noḷabú kom butá mopia, tua im mangaḷenya, intau inta nokodongog kom Pirman bo nonota'au kom mangaḷenya, manangka intua sia nomungai, oyúon inta mogatut noguntuḷ, oyúon in onom nopuḷuh noguntuḷ bo oyúon doman in toḷu nopuḷuh noguntuḷ."

24Ki Yesus bui nongonguman ko'i monia, kon tobatú porumpama'an, kai-Nia, "Aka ki Allah momarentah yo náonda bo intau inta nogambor kom bibit inta mopia kong gobánya.

25Ta'e kon dodai intau nongosiugdon, namangoi in saturunya bo noporangkap im bibit im padang kon sigad ing gandum mita tatua, nopaḷut makow sia minayak.

26Naonda ing gandum tatua moḷobendon bo nomangkoidon ḷumondut kino'ontongandon doman im padang mita tatua.

27Dá namangoidon in simpaḷ mita i togi gobá tatua bo noguman: Tuang, kinota'auan nami im bibitbí inta nopira inambor i tuang kong gobá! Dá degá nongkon ondabí im padang mita tatua?

28Ki togi gobá tatua notubag: Oyúon intau mosaturu namangoi bo noporarit intua. Dá bobantungnya mita tatua nolibo: Tuang, mota'au degá baya'an nami rabuton im padang mita tatua?

29Ta'e sia noguman: Dona'ai, sin dika bo mo'itakin doman ing gandumea ko wakutu im porabutan kom padang tatua.

30Pomayak makow kobiaganea modapot i wakutu porataban. Sing ko wakutu im porataban, pogumankudon kon intau mita inta mororatab: Tokosipundon muna im padang mita tatua bo bogot kom pangkoinya mita sin tubáan, onda intua sipundon ing gandum mita tatua kon ḷuntungku."

31Ki Yesus nongonguman bui kom porumpama'an ibanea ko'i monia, "Aka ki Allah momarentah, yo náumpama batoḷ in sesawi inta ginamá in intau bo pinomuḷa kong gobánya.

32Memang batoḷ tatua im paling mo'intok nongkon bayongan batoḷ, ta'e aka sia mobiagdon, sesawi tatua im moḷobe-ḷoben nongkon kuyat mita ibanea, sia simimpangkoi sahingga in ḷagapan mita mamangoi bo monompugad kon tanganya mita."

33Onda intua ki Yesus nongonguman doman kom porumpama'an nana'a ko'i monia, "Aka ki Allah mamangoi momarentah yo náumpama ragi inta ginamá im bobay bo pinobáuk kon topong torigu opat nopuḷú noliter nodapot ing kinumutad komintan."

34Tua komintan sinundú i Yesus kon intau moántó tongá nomaké im porumpama'an. Bo Sia notundú diábí in diá nomaké im porumpama'an.

35Makusud-Nya, bá motompodon Pirman inta pinoguman in nabi nana'a, "Aku'oi mo'ibog motundú ta'e momaké im porumpama'an, Aku'oi mo'ibog mongonguman kon inta nongo'ibuni mulaipa dunia na'a inaidan."

36Bo ki Yesus nonaḷámaidon kon intau mobayong tatua, bo nobui. Murí-Nya mita namangoi bo noguman ko'i-Nia nana'a: "Insilangaidon ko'inami mangaḷe im porumpama'an padang kon yuá-yuák ing gandum."

37Sia notubag, "Intau inta nogambor kom bibit mopia tua ing ki Adí Intau.

38Gobá tua in dunia. Bibit tatua in intau mita inta ain nobalí umat i Allah. Yo padang tatua in intau mita inta diá mopia.

39Yo saturu inta noporarit bibit im padang tatua, siata in Ibilis. Bo aka wakutu moratab, yo tua in singgai pangabisannya. Bo inta mororatab mita tua im malaekat.

40Náonda bo padang tatua sinipun bo sinubá kom bonu in tuḷu natua doman kon Singgai Tumi.

41Adí Intau nopotabá kom malaekat-Nya mita mosipun kom bayongan inta mokopoḷale bo komintan intau inta nogaid kom mora'at kom bonu ing Karaja'an-Nya.

42Bayongan tua daiton pogonag kom bonu in tuḷu; kon tua kodongogan amui bo roriga.

43Ko wakutu intuata intau mita inta nogaid kon onu ing kino ibog i Allah monindar ná mata in singgai kom bonu in dunia mobagu i Allah ki Amá monia. Ki ine ing kobongoḷan pokidongog!"

44"Aka ki Allah momarentah yo náonda bo kapunya'an inta no'iḷobong kong gobá, inta no'ulí in intau, bodongka iḷobongea bui. Lantaran pia ing ginanya, dá minayakdon in sia bo nopotaḷui im bayongan kapunya'annya bo notaḷui kong gobá tatua."

45"Ná doman tua, aka ki Allah momarentah yo náonda bo tobatú intau inta notayak kom mutiara inta mogagah.

46Naonda in no'ulínya im mutiara inta totok im mogagah tatua, ḷagi in sia minayak bo nopotaḷui im bayongan kapunya'annya bodongka notaḷui kom mutiara tatua."

47"Natua doman, aka ki Allah momarentah yo náonda bo landará inta binukayad kon danow, bo nokosipun kon norupa-rupamai in toyak.

48Naonda in nopuling, landará tatua inugut pinobayak im pintad, bo mosia ilimitú bo nosipun kon toyak inta nongopir bo binonu kom bokor, ta'e toyak inta diá nongopira in iḷumbú.

49Natua doman mobalí kon Singgai Tumi: Malaekat mita mamangoi bo mopoyotondí kon intau mita inta moromú bo intau inta mopia,

50bo intau mita inta mora'at tokoḷumbu'on-Nya kon yuák in tuḷu; kon tua mosia mongombaḷ bo mororiga."

51"Komangalean monimu in singog-Ku tua?" Mosia notubag: "O,o, komangalean nami!"

52Dá ki Yesus noguman ko'i monia, "Pomuḷoi in intau inta monota'au totok kon atorang i Musa bo notarima kon totundú kon náonda ing ki Allah momarentah tua, yo sia náonda bo ki togi baḷoi inta nopoḷuai im pakakatnya nobagu bo inta no'onggotdon nongkon tampat inta pinotagúannya."

53Naonda ing ki Yesus nopaḷut nongonguman kom porumpama'an mita tatua, minayakdon Sia nongkon tua.

54No'iyaputmai in lipú-Nya, Sia minayak notundú kon intau mita kon tua kom bonu im baḷoi pososambayangan monia. Intau mita nongoherang noko'ontong kon inta pinomia-Nya, sahingga mosia nolibó,nana'a: "Degá no'ulí-Nya kon onda im pandoi bo kawasa mita inta pinogaid-Nya kom mokoherang mita tatua?

55Aka diá moyotaḷá yo Siabí na'a inta ki Adí i bas? Bo ki iná-Nya ing ki Maria degá? Ki utat-Nya ing ki Yakobus, ki Yusup, ki Simon bo ki Yudas!

56Bo ki utat-Nya mita bobay ing koyota-yotakin naton! dá degá kon onda ing kino'ulían-Nya kon tua mita?"

57Dá mosia nokecewa bo doídon mosia notarima ko'i-Nia. Dá ki Yesus noguman ko'i monia: "Tobatú nabi in hormaton kon onda kabí kolikudbí ing kolipú-Nya tontaní bo kom baḷoi-Nya."

58Bo lantaran diá im pirisaya monia, sahingga in diá nobayong in soáḷ inta mokoherang im pinomia-Nya kon tua.



 <<  Matius 13 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran