1Ko wakutu intua namangoidon murí mita i Yesus ko'i-Nia bo nolibo, "Ki inebí degá im moḷobe-ḷoben kon sigad umat i Allah na'a?"
2Dá ki Yesus nogoiní kon adí tobatú, bo pinosindog kon yuá-yuák monia.
3Bo nosingog, "Poguman-Ku ko'i monimu. Aka mo'ikow bo diá mogogai mogaid kom mo'itaḷá bo mobalí ná mongoadí tana'a, yo mo'ikow in diábí mobalí umat i Allah.
4Ki ine im mokopo'ompá kon oáid bo mobalí ná mongoádí tana'a, yo sia tua im moḷobe-ḷoben kon sigad in umat i Allah.
5Bo ki ine inta notarima kon adí ná tana'a sin lantaran Aku'oi, yo sia in notarima ko'i-Nakó."
6"Ta'e ki ine im mobalí sobab kon tobatú nongkon sigad im mongoádí mita tana'a diádon mopirisaya ko'i-Nakó, yo totok im mopia aka gantung bo popotogot kon sigogowea bodongka taḷomon kon dagat.
7Koboditodon in dunia na'a sin totundú inta mokobalí kon intau baradosa'an. Memang oyúonbí i wakutu pogaidan kom mokobaradosa kon intau, ta'e moboditodon intau inta mogaid kon tua!
8Aka limamu andeka sioḷmu bo moko baradosa ko'inimu, yo pongkó bo ḷumbúdon intua, sim manikah bo mayak in tampat inta kobiagan takin diá kolima bo sioḷ tosimpaḷ, daripada lima bo sioḷ motompodpa ta'e pogonag kom bonu in tuḷu inta diá mopio-piong.
9Bo aka matamu mokobaradosa ko'inimu, yo kuil bo ḷumbú, sim manikah diá ko mata tosimpaḷ ta'e tumu'ot kon tampat inta kobiagan moyotakin i Allah, daripada mata notompodpa im mata ta'e pogonag kom bonu in tuḷu inta diá mopio-piong."
10"Pokotorop, dika mopandang enteng kom mongoádí mita tana'a, bá poguman-Ku ko'i monimu, oyúon im malaekat monia kon soroga inta umuran mo'indoi kom pogot i Amá-Mu inta kon soroga.
11Sin Adí Intau namangoi sim moposaḷamat kon intau mita inta nongobuli!
12Podudui in raianmu yo náonda in na'a? Aka intau bo oyúon in dombanya mogatut kobayongea, bo tobatú kon sigad in domba mita tatua nobuli, yo onu degá in aidannya? Tantú taḷa'annyapabi muna in domba inta siow nopuḷuh bo siow tua bodongka mayak motayak, kon inta tobatú nobuli tua!
13Bo poguman-Ku ko'i monimu, aka mo'ulínyadon bui in domba inta nobuli tatua, yo tua in totok kotabinya nongkon inta siow nopuḷuh bo siow inta diá nobuli.
14Natua doman ki Amámu inta kon soroga diábí mo'ibog in Sia aka kobulian in tobatú mai nongkon mongoádí mita tana'a."
15"Aka ki utatmu bo nogaid kon dosa ko'inimu, yo tonggina'ai in sia ko wakutu in tongá kamu-kamunda. Aka sia bo mokidongog kon tongginamu, yo ikow nopotutui in daḷan inta mopia ko'inia.
16Tongá aka diá indongogannya in ikow, yo podiadon kon tobatú andeka doyowa in intau simbá mosia mobogoi doman ing katarangan, 'Sin takin katarangan in doyowa andeka toḷu intau, soáḷ tatua mota'au pirisaya'an.'
17Aka sia bo doípa doman mokidongog kon tonggina monia tatua, yo poyaputdon intua komintan kon jama'at, bo anggapdon sia náonda bo intau inta diá nonota'au ko'i Allah andeka náonda bo intau inta móoigum kom pajak."
18"Poguman-Ku ko'inimu: Onu inta ilarang monimu aidan kon dunia na'a yo tua doman inta ilarang kon soroga. Bo onu inta sinotu'u monimu kon dunia na'a yo tua in totu'uon doman kon soroga.
19Aku'oi im bui doman moguman ko'i monimu: Aka doyowa in intau kon sigad monimu bo motobatú kong gina bo mo'igum kon onukabí, yo onu inta pino'igum monia tua, ogoibí i Amá-Ku inta kon soroga.
20Sin kon onda in oyúon doyowa andeka toḷu intau moyosipun mosumbah ko'i-Nakó, yo Aku'oi ing kon tua kon yuá-yuák monia."
21Onda intua namangoi ing ki Petrus bo nolibó ko'i Yesus, "Tuhan, dapot ing kotongonumai degá aku'oi mongampung ko'i utatku aka mosia mogaid kon taḷá ko'inakó? Dapot in kopitu degá?"
22Ki Yesus noguman ko'inia, "De'eman! Poguman-Ku ko'inimu, de'emanbí tongá dapot kopitu, ta'e modapot im pitu nopuḷuh popokali kom pitu doman!
23Sin aka ki Allah momarentah saḷaku Raja yo mota'au popo'umpama nana'a: Tobatú raja inta mogiapdon kom boli in simpaḷnya mita.
24Naonda in sia momangkoidon mogiap, pinotayowdon in tobatú intau inta koboli kom pulúan juta.
25Ta'e lantaran intau tatua diádon moko'uboli kom bolinya tatua, dá raja tatua nomarentah nokipotaḷui ko'i buḷoi bo ko'i adínya bo takin bayongan kapunya'annya sim poguboli kom bolinya.
26Dá sinumungkudon in simpaḷnya tatua kon tayowon i raja bo nosumbah takin noguman ko'inia, 'Posabarpa muna, sim bayongan boliku daitonkubí ubolian.'
27Bo noliai ing ginanya sin tabinya kon simpaḷnya tatua, sahingga in diádon pinokíubolinya im bolinya tatua bo pinopatnyadon.
28Tongá naonda in simpaḷnya tatua iḷumuai bo noyodungkuḷ in sia in simpaḷ ibanea inta koboli doman ko'inia ta'e tongá pulúan ribu. Dinomok bo binongkugnya in yobayatnya tatua, bo poḷat noguman, 'Uboliai im bolimu!'
29Yobayatnya tatua sinumungkud bo nopo'igum ko'inia, 'Posabarpa muna, uboliankubí im boliku tatua.'
30Ta'e diábí inindongogannya mai in singog in yobayatnya tatua bo binayaknya pinobonu kom ponjara nodapot inuboliannya nodait im bolinya tatua.
31Noko'ontongmai kon natua in yobayatnya mita ibanea nokuyang totok ing gina monia bo binayak pinoguman monia ko'i tuang monia tatua in onu inta ain nobalí tua.
32Dá pinokíoiní i raja in intau tatua bodongka siningognya, 'Hei! ikow simpaḷ inta mora'at! Komintan bolimu aindon nodait pinopatanku sim pino'igummu ko'inakó.
33Manangka intua ikow im mustibí doman mongampung bo motabi kon yobayatmu tatua ná Aku'oi notabi ko'inimu?'
34Bo sinumorú totok ing ki tuangnya tatua sahingga im pinobonunya kom ponjara in sia nodapot in nodaitnya inubolian bayongan bolinya."
35Pokotorop: "Ki Amá-Ku inta kon soroga im momia doman kon natua ko'inimu, aka mo'ikow komintan doí mongampung ko'i utatmu totu-totu'u."
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel