1Pomuḷoi intau musti dumudui kom pomarentah, sin diaíbií im pomarentah in diaí noko'ulií kong kakuasa'annya nongkon i Allah. Bo pomarentah masai na'a nopobayak ing kakuasa'annya podudui im parentah i Allah.
2Tuamai intau inta momaḷawang kom pomarentah notongkaibií in nomaḷawang kon onu inta ain sinantuí i Allah. Bo ki ine im mogaid kon natua hukumonbií.
3Sing ki ine im mogaid kon inta mopia dona'ai bidon mo'ondok kom pomarentah, tongaíbií mosia inta mogaid kom mora'at tua im musti mo'ondok. Daí aka ikow mo'ibog baí diaí mo'ondok kom pomarentah, daí aidaidon onu inta mopia bo pujionbií in ikow.
4Sim pomarentah tua im mogogaidbií kon oaíidan i Allah inta mogaid kom kopia'anmu. Ta'e aka ikow mogaid kon inta mora'at, daí ikow im mustibií mo'ondok kom pomarentah, sin de'emanbií tongaí ibo-ibog sia inogoian kawasa mohukum kon intau. Sia tua im mogogaidbií kon oaíidan i Allah inta nopoḷabuí in hukuman i Allah kon intau mita inta mogaid kom mora'at.
5Tuamai utat, mo'ikow mustibií mokopotoindudui kom pomarentah, de'emanbií tongaí lantaran ikow doií hukumon, ta'e lantaranbií doman kong ginamu im moguman kon natua.
6Tuabií doman in nobalií alasan kon nongonu sim mo'ikow i mogubolibií kom pajak, lantaranbií pomarentah tua im pogawai i Allah inta nopobayak in tugas nongkon i Allah.
7Daí uboliaidon kom pomarentah onu im musti ubolianmu ko'inia. Uboliai im pajak, aka mustibií in ikow moguboli kom pajak; bo uboliaidon im bea, aka mustibií ubolianmu intua. Harga'aibií im mosia inta patus harga'an, bo hormatbií i mosia inta musti hormaton.
8Dona'aidon monomboli kon onuka ko'inekabií, ta'e mo'ikow musti mototabian. Sin intau inta motabi kon tumpaḷa intau, sia tua ain dinumudui kom bayongan hukum i Musa.
9Sin hukum agama Yahudi noguman nana'a: Dika monualing, dika molimod, dika monakow, dika mo'ibog ing kapunya'an intau ibanea, bo bayongan parentah ibanea ain notangkup kon hukum tobatuí tana'a, "Kotabibií in tumpaḷa intau, naonda bo kotabimu kon awakmu tontanií."
10Intau inta motabi kon intau ibanea, yo diaíbií in sia mopoaíid im mora'at kon intau tatua. Manangka intua intau inta motabi kon tumpaḷa intau, sia tua ain dinumudui kom bayongan inta aim pinarentah kon hukum i Musa.
11Kolikud intua komintan, kinota'auan monimu kom masai na'a wakutudon monimu mobangon nongkon pinosiugan. Sin wakutu poposaḷamatan ko'i naton lebedon modiug nongkon wakutu ing kita bagupa nopirisaya.
12Doḷom diaídon mo'onggot; topiípa mobayagdon. Daí koligai mogogaidon ing kita mogaid kon inta diaí mopia, bo momakeídon in sonjata inta mobayag.
13Musti ing kita mogaid kon soaáḷ mita motompia naí inta biasamai aidan intau ko wakutu im mobayagpa. Dika mogaid kon rame inta mo'iliu, ande moḷoḷangu. Dika mogaid kon inta mokoromuk ande oaíid inta diaí ko'endar. Dika moporopatoi bo dika mosi'intoian.
14Pomayakdon makow baí ki Tuhan Yesus Kristus monantuí kon onu im musti aidan monimu. Bo dika dumudui kon ibog in awak inta baradosa na'a lantaran mopopuas in onu inta ko'ibognya.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel