1Limbah sampai saran dengan salamat, harue ikei katawan aran pulau te Malta.
2Oloh hong pulau te paham bajenta dengan ikei. Ewen manambang ikei samandiai dengan bahalap tuntang mambelom apui akan ikei awi wayah ujan jari sampai tuntang udara mahin sadingen.
3Paulus mamumpong kayu tuntang mina kare kayu te intu hunjun apui. Pandehan ie mawie, ije kongan handipe balua awi kalasot apui palus manotok lengee.
4Ganan oloh pulau te mite handipe te ginta-gintang intu lengen Paulus, ewen hamauh sama arep ewen, "Oloh toh musti oloh pamuno, basa aloh ie lapas bara bahaya laut, Dewa Bawi Kabujur dia manalua ie belom."
5Tapi Paulus mambirik handipe te akan huang apui tuntang isut mahin jaton ie mangkeme kapehe.
6Ewen manirok dia tahi hindai lengen Paulus akan kembang atawa Paulus akan balongkang matei manantekas. Tapi limbah mentai pire-pire katahie tuntang jaton kea taloh je malabien ampie manjadi buah Paulus, tirok ewen hobah tinai palus ewen manyewut Paulus te Dewa.
7Dia kejau bara eka te aton petak ain Publius, pejabat je mambatang hong pulau te. Dengan bahalap ie manambang ikei kilau tamu ayue katahin telo andau.
8Hong katika te bapae metoh haban, buah darem tuntang disentri. Paulus haguet manyengok bapae je haban te palus balakudoa tuntang mina lengee hunjun ie sampai ie keleh.
9Tagal kajadian te maka kakare oloh haban hong pulau te dumah manalih Paulus, tuntang ewen tau keleh.
10Ewen manyarah akan ikei are panenga, tuntang katika ikei handak balayar, ewen mimbit akan kapal taloh handiai je imerlu ikei hong panjalanan ikei.
11Limbah telo bulan intu hete, ikei haguet bara pulau te mandai ije kapal bara Aleksandria je katahin wayah sadingen tende manyandehan hong pulau te. Kapal te mahapan lambang "Dewa Hatatup Kastor tuntang Poluks".
12Ikei tende hong lewu Sirakusa tuntang melai intu hete telo andau.
13Bara hete ikei balayar manyaroroi pantai sampai lewu Regium. Andau jewue riwut nampara manampur bara hila salatan, awi te due andau katahie ikei sampai hong lewu Putioli.
14Intu hete ikei hasondau dengan pire-pire oloh je percaya dengan Yesus, tuntang tagal parawei ewen ikei melai eka ewen katahin ije minggo. Palus ikei haguet akan Roma.
15Kare pahari hong Roma je percaya dengan Yesus mahining barita tahiu ikei, sampai ewen manalih Pasar Apius tuntang Pasanggarahan Telo mangat manambang ikei. Katika Paulus hasondau dengan ewen, ie manyewut tarima kasih akan Hatalla tuntang ateie manjadi salawah.
16Metoh sampai hong Roma, Paulus tau melai kabuate hayak ingawal awi ije biti prajurit.
17Limbah telo andau, Paulus mantehau kare oloh Yehudi je basewut hong eka te. Tuntang limbah ewen hapumpong, ie hamauh dengan ewen, "Pahari handiai! Aku jaton basala en-en dengan bangsa itah, atawa malanggar kare hadat kabiasaan je inarima itah bara tato hiang itah. Aloh kalote aku inawan hong Yerusalem tuntang inyarah akan kare oloh Roma.
18Limbah perkara ayungku iriksa, ewen handak malapas aku, awi gitan batantu ije mahin jaton kasalan je iawiku sampai patut ihukum hapan hukuman matei.
19Tapi awi kare oloh Yehudi malawan, aku tarapaksa manuntut perkara ayungku inyidang hong pangadilan Kaisar Roma. Aku malalus jete dia jaka awiku aton taloh je handak ingaduku mawi bangsa ayungku kabuat.
20Tuntang jete bukue aku balaku hasondau dengan keton mangat tau hapander-sarita dengan keton; basa aku imasong puna tagal Panyalamat je ientai awi bangsa Israel."
21Palus ewen hamauh dengae, "Ije kalambar surat mahin dia aton ikei tarimae bara Yuda tahiu pahari. Tuntang ije mahin jaton pahari bara kanih je dumah mimbit kabar tahiu pahari atawa manahiu taloh je papa mawi pahari.
22Tapi ikei mipen kea mahining tahiu kapercayan pahari, basa ikei uras jari mahining oloh manyalan auh ajar je ain pahari te."
23Maka ewen tuntang Paulus manukas ije andau uka hasondau. Hong andau te are oloh dumah akan eka Paulus melai. Bara hanjewu sampai halemei Paulus manarang tuntang mambarita akan ewen barita tahiu kilen ampie Hatalla marentah kilau raja. Awie mahapan kare ayat bara surat Moses tuntang Surat Kare Nabi, Paulus manggau jalan mangat ewen percaya dengan Yesus.
24Aton je percaya dengan taloh je insanan Paulus, tapi aton kea je dia percaya.
25Marak angat pandirian je hakalawan, ewen malihi eka te, limbah Paulus mansanan akan ewen je kalotoh auhe, "Puna pas toto taloh je insanan awi Roh Hatalla mahalau Nabi Yesaya akan tato hiang keton!
26Hatalla hamauh, 'Lius ih sanan akan bangsa jetoh: keton kareh harajur mahining tapi dia harati; keton kareh harajur manampayah tapi jaton katawan taloh je akan manjadi.
27Basa tirok pikir bangsa jetoh jari manjadi tumpul. pinding ewen jari badengen tuntang matan ewen jari ingambutepe. Jete manjadi uka matan ewen ela mite, pinding ewen dia mahining, tirok ewen dia harati, tuntang dia haluli manalih Aku, palus Aku akan mampakeleh ewen.'"
28Kajariae Paulus hamauh, "Pahari handiai musti katawan iete, kabar tahiu salamat je bara Hatalla toh jari imbarita akan kare bangsa beken je dia Yehudi. Ewen jari manumuoe!"
29[Limbah Paulus hamauh kalote, kare oloh Yehudi te malihi eka te sambil hakalawan sama arep ewen.]
30Due nyelo katahie Paulus melai intu Roma, hong huma je inyewae kabuat. Ie hanjak manarima oloh handiai je dumah manalih ie.
31Tuntang dengan kahanyie ie mambarita akan ewen tahiu kilen ampie Hatalla marentah kilau Raja tuntang tahiu Tuhan Yesus Kristus. Paulus malalus jete dengan bebas, jaton oloh je mahambang ie.
<< Kisah Para Rasul 28 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel