1Iada'e sanandrõsa ba mbuala nibe'e Geheha Lowalangi. Sanandrõsa ba da'õ, omasido na mi'ila zindruhunia.
2Mitõrõ tõdõmi wa me lõ saboto ba dõdõmi Zo'aya, no adõni ami ba wolo'õ adu si lõ hede andrõ.
3Lõ tola lõ mibotokhi ba dõdõmi wa nifatõrõ Geheha Lowalangi, lõ tola iw̃a'õ, "Ni'elifi Yesu!" Si manõ gõi lõ tola iw̃a'õ niha, "No So'aya Yesu!" na tenga nifarou Geheha Lowalangi.
4Oya ngawalõ mbuala moroi ba Geheha Lowalangi, ba ha sambua Geheha same'e da'õ fefu.
5Oya ngawalõ halõw̃õ ba we'amõi enoni Zo'aya, ba Lowalangi si mõi ita enoni andrõ, no Lowalangi si ha samõsa!
6Oya ngawalõ lala wamalua halõw̃õ Zo'aya, ba same'e fa'abõlõ ba zi dozi niha ba wombambaya da'õ ya'ia Lowalangi si ha samõsa andrõ.
7Soguna ba wanga'azõkhi ya'ita fefu wa mohalõw̃õ Geheha Lowalangi andrõ ba zi dozi niha si fabõ'õbõ'õ.
8Ba zi samõsa, Ibe'e Eheha andrõ wa'abõlõ ba wahuhuosa solakhõmi. Eheha da'õ gõi zame'e ba danõ bõ'õ fa'abõlõ ba wangombakha sanandrõsa khõ Lowalangi.
9Eheha da'õ zui zame'e fa'abõlõ si lõ harumani ba niha ba wamati khõ Keriso; ba ba danõ bõ'õ Ibe'e Eheha andrõ kuaso ba wamadõhõ fõkhõ niha.
10Ba zi samõsa Ibe'e kuaso ba wolau sahõlihõli dõdõ, ba ba danõ bõ'õ Ibe'e mbuala ba wangombakha era'era dõdõ Lowalangi. Ba zi samõsa Ibe'e wa'abõlõ ba wamaehusi buala soroi Geheha Lowalangi ba heza zi tenga. So nibe'e fa'abõlõ wahuohuosa ba ngawalõ li sahõlihõli dõdõ, ba so gõi nibe'e fa'abõlõ ba wamo'eluaha li soya ngawalõ andrõ.
11Eheha si sambua da'õ manõ zangohalõw̃õgõi da'õ fefu; dozi niha tebe'e mbuala si fabõ'õbõ'õ molo'õ somasi Geheha andrõ.
12Hulõ mboto Niha Keriso andrõ; ha sambua mboto, ba oya sa ndrotondroto. Fefu ndrotondroto andrõ, hew̃a'ae oya, no ha sambua boto.
13Si manõ gõi ita fefu, he niha Yahudi ba si tenga niha Yahudi, he sawuyu ba ma si tenga sawuyu; no ibayagõ ita Eheha si fagõlõ andrõ, ena'õ tobali ha sambua ita ba mboto Keriso andrõ. No falukha ita gõi Geheha si ha sambua andrõ fefu.
14Boto andrõ tenga ha sambua ndrotondroto, hiza no oya ndrotondroto.
15Na imane ahe, "Tenga tanga ndra'odo, bõrõ da'õ tenga si fao ba mboto andrõ ndra'o," tenga da'õ geluaha wa tenga si fao ba mboto gahe andrõ.
16Na imane talinga, "Bõrõ me tenga hõrõ ndra'o," andrõ wa tenga ndrotondroto ba mboto ndra'o.
17Na ha hõrõ manõ zi sageu boto, hewisa wa tola i'ago hadia ia boto andrõ? Ma zui na ha talinga manõ fefu mboto andrõ, hewisa wa tola i'ila hadia ia boto andrõ?
18Ta'ila wa Lowalangi zamonaha ndrotondroto andrõ ba mboto. Ifonaha Lowalangi dozi ndrotondroto molo'õ si sõkhi ba dõdõ Lowalangi.
19Na ha sambua ndrotondroto manõ fefu, hezo nifotõi boto?
20Tobali, oya ndrotondroto, ba hiza ha sambua mboto andrõ.
21Bõrõ da'õ, tebai imane hõrõ ba danga, "Lõ moguna ndra'ugõ khõgu!" Ba ma hõgõ iw̃aõ ba gahe, "Lõ moguna ndra'ugõ khõgu."
22Hiza ndrotondroto niw̃a'õ dõdõda sambõ fa'abõlõ, no moguna sibai khõda.
23Ba ndrotondroto niw̃a'õda lõ tafosumange, no da'õ ndrotondroto sinangea abõlõ tafosumange. Ndrotondroto si lõ sõkhi wamaigi, no da'õ zinangea abõlõ tafaigi.
24Ndrotondroto si sõkhi famaigi, lõ moguna tafaduligõ sibai. No Ifa'anõ Lowalangi mbotoda irege ndrotondroto sambõ mufosumange, da'õ zoguna abõlõ mufosumange.
25Ba zi manõ lõ tebagibagi mboto andrõ; dozi ndrotondroto oi zara larorogõ nawõra.
26Na so zafõkhõ ba zi sambua ndrotondroto, fefu ndrotondroto tanõ bõ'õ oi afõkhõ gõi; na tesuno zi sambua ndrotondroto, fefu ndrotondroto tanõ bõ'õ oi omuso dõdõ.
27Fefu ami no boto Keriso, ba dozi ami gõi no ndrotondroto ba mboto andrõ.
28Si manõ gõi bakha ba mbanua Niha Keriso, no Ihonogõi Lowalangi nahia dozi ngawalõ niha: Si fõfõna ira sinenge; aefa da'õ sama'ele'õ, ira guruguru, awena ya'ira samazõkhi tandra sahõlihõli dõdõ, aefa da'õ ya'ira nibe'e buala ba wamadõhõ fõkhõ niha, ma zui ba wanolo niha bõ'õ, ma zui ba wondrõnia'õ, ma zui ba wahuhuosa ba ngawalõ li sahõlihõli dõdõ.
29Tenga sinenge ira fefu, ma zui sama'ele'õ, ma zui guru. Lõ fefu lasõndra kuaso ba wolau tandra sahõlihõli dõdõ,
30ma zui wamadõhõ niha, ma zui fahuhuosa ba ngawalõ li sahõlihõli dõdõ, ma zui ba wamo'eluaha li andrõ.
31Bõrõ da'õ, akha mi'odõdõgõ sibai ba wanõndra buala fondrege zebua andrõ. Ba hiza, ba ganete da'e ufaehagõ khõmi lala fondrege zi sõkhi.
Download Audio MP3 (1 Korintus 12):
Mobile (Low Quality) - CD (High Quality)
<< 1 Korintus 12 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel