Alkitab Mobile SABDA
[VER] : [NIAS]     [PL]  [PB] 
 <<  1 Korintus 15 >> 

1Iada'e ya'ami ira talifusõ, omasi ndra'o mitõrõ tõdõmi Duria Somuso Dõdõ soroi Lowalangi ni'ombakha'õgu khõmi luo no. No mitema Duria andrõ ba faduhu dõdõmi khõ Keriso bõrõ Duria Somuso Dõdõ andrõ.

2Na lõ mibõhõli faduhu dõdõmi ba nituriagõgu andrõ khõmi, ba i'orifi ami Turia Somuso Dõdõ andrõ; ha tõ na lõ khõmi fa'aboto ba dõdõ, he wa'ae faduhu dõdõmi.

3Hadia nifa'emagu khõmi no nitemagu gõi. Ba sabõlõ moguna, si mane nisura ba Mbuku Ni'amoni'õ, ufa'ema khõmi wa no mate Keriso bõrõ horõda;

4no muko'o Ia, ba hiza no mu'orifi Ia mangawuli ba ngaluo si tõlu. No tesura gõi da'õ ba Mbuku Ni'amoni'õ.

5No u'ombakhaõ gõi khõmi wa Keriso si no auri mangawuli andrõ, no I'oroma'õ Ia khõ Wetero, ba aefa daõ khõ ndra sinenge si felendrua.

6Aefa da'õ Iforoma'õ Ia gõi ba zi tõra lima ngaotu nifahaõ-Nia. Ato ba gotaluara zauri irugi iada'e, ha ma'ifu zi no mate.

7Aefa daõ I'oroma'õ Ia Keriso khõ Yakobo ba aefa da'õ khõ ndra sinenge fefu.

8Afuriata sibai Iforoma'õ Ia khõgu gõi -- hulõ ndraono sawuyu si tumbu ba zi tenga baw̃ania ndra'o!

9Sinenge Zo'aya fondrege zide'ide ndra'o. Tenga sinangea latõtõi ndra'odo sinenge, bõrõ me no ufakao mbanua Lowalangi.

10Ba bõrõ wa'ahakhõ dõdõ Lowalangi no tobali ndra'odo si mane ya'odo iada'e. Ba hiza, tenga zayazaya gõlõ Lowalangi wangefa'õ ya'o. Ma na'i ya'o zabõlõ abua halõw̃õ ba gotalua ndra nifahaõ bõ'õ fefu. Ba tenga fa'abõlõgu da'õ; no fa'abõlõ Lowalangi sangomasi'õ ya'o si fao khõgu wohalõw̃õ.

11Tobali, gofu heza moroi mitema Duria Somuso Dõdõ andrõ -- he moroi khõgu ma zui moroi ba zinenge bõ'õ -- lõ hanania. Sabõlõ moguna ya'ia wa mafa'ema duria andrõ ba faduhu dõdõmi wa no Turia Somuso Dõdõ da'õ soroi Lowalangi.

12Ba na nituriaigõma andrõ no sanandrõsa ba wa'auri Keriso sangawuli moroi ba wa'amate, ba hana wa so ba gotaluami zanguma'õ lõ te'orifi mangawuli niha si no mate?

13Na sindruhu lõ te'orifi mangawuli niha moroi ba wa'amate, eluahania lõ te'orifi mangawuli Keriso gõi moroi ba wa'amate.

14Ba na lõ auri mangawuli Keriso moroi ba wa'amate, ba no lõ guna wanuriaigõma, ba no si lõ guna gõi wamatimi, bõrõ me lõ danedane wamatimi andrõ.

15Mendrua manõ falimo ndra'aga khõmi sanandrõsa khõ Lowalangi na si manõ, bõrõ me maturiaigõ wa no I'orifi Lowalangi mangawuli Keriso moroi ba wa'amate, ba sindruhunia sa lõ'õ -- na sindruhu lõ te'orifi mangawuli niha si no mate!

16Bõrõ, na lõ mu'orifi mangawuli niha si no mate, ba lõ gõi te'orifi Keriso mangawuli moroi ba wa'amate.

17Ba na lõ te'orifi Keriso mangawuli ba no ha fangifi wamatimi; eluahania lõ mamalõ si so horõ ami ba si lõ fanõtõna sa'ae.

18Da'õ geluaha gõi nasa wa niha si no mate si faduhu tõdõ khõ Keriso no si lõ fanõtõna, tehuku gõi.

19Na ha ba wa'aurida ba gulidanõ andre manõtõna ita khõ Keriso, no fondrege si lõ harazaki ita moroi ba danõ bõ'õ!

20Ba hiza, no te'orifi mangawuli Keriso moroi ba wa'amate. Da'e zi tobali lohelohe wa te'orifi mangawuli dania niha si no mate.

21Bõrõ zi samõsa niha andrõ wa so wa'amate ba gulidanõ, si manõ gõi wa bõrõ zi samõsa niha wa tola auri ita moroi ba wa'amate.

22Fefu niha no mate bõrõ me farahu khõ Gadamo, ba si manõ gõi te'orifi fefu, bõrõ me farahu khõ Keriso.

23Ba hiza, te'orifi mangawuli molo'õ ngenolinia: si fõfõna Keriso; aefa da'õ ngenoli niha si no okhõta Keriso, na inõtõ tohare Yesu mangawuli ba gulidanõ.

24Aefa da'õ alua luo safuria. Ba ginõtõ andrõ Ibe'e barõ mbawa-Nia Keriso fefu wamatõrõ, fefu kuaso ba fefu wa'abõlõ; ba aefa da'õ Itou'õ kuaso wa'arazo-Nia khõ Lowalangi, Amada.

25Lõ mamalõ mamatõrõ Keriso irege mõi barõ mbawa Keriso fefu nudu-Nia Ibe'e Lowalangi.

26Udu afuriata, nifatõrõ-Nia ya'ia wa'amate.

27No tesura ba Mbuku Ni'amoni'õ zi mane da'e, "No Ibe'e barõ mbawa-Nia Lowalangi fefu hadia ia." Eluaha "fefu hadia ia" ba da'e, lõ farahu Lowalangi, sombali'õ fefu hadia ia andrõ mangalulu barõ mbawa Keriso.

28Ba hiza me aefa tebe'e fefu barõ wamatõrõ Keriso, ibe'e Ia samõsa Ono Lowalangi andrõ barõ mbawa Lowalangi, si no mame'e fefu hadia ia barõ wamatõrõ-Nia. Ba Lowalangi samõsa dania zamatõrõ fefu hadia ia.

29Na lõ te'orifi mangawuli niha si no mate, hana wa so nibayagõ idanõ ba khõ niha si no mate? Hadia nitõtõna moroi ba niha andrõ? Na duhu lõ te'orifi mangawuli niha si no mate, hadia guna mulau zi manõ?

30Ba hadia guna gõi wa mafaondragõ de'ala ero inõtõ?

31He ya'ami ira talifusõ! Ero ma'õkhõ utaõgõ wamakao bõrõ me omuso dõdõgu ba wa'aurimi, me no faduhu dõdõmi khõ Keriso So'aya ya'ita.

32Na ha ba wa'aniha manõ da'õ fefu, hadia haregu ba wolow̃a zi hulõ gurifõ samu'i ba da'e, ba Nefeso? Na lõ mu'orifi mangawuli niha si no mate, abõlõ sõkhi da tago'õ niw̃a'õ andrõ: "Da talau mangamanga ba mamadumadu, ta'omusoi'õ dõdõda, bõrõ me mate sa'atõ ita mahemolu."

33Bõi telimo ami! Na fa'awõ ami ba zi lõ sõkhi, ba tobali lõ sõkhi gamuatami si sõkhi.

34Ya'aboto ba dõdõmi iada'e, ba bõi milau horõ sa'ae. Sinangea aila ami sa, me so ba gotaluami zi lõ mangila Lowalangi.

35Te so zanofunofu, "Hewisa wangorifi si no mate? Hewisa nga'eu nibe'e khõra, na no auri ira mangawuli?"

36Bodo sibai ami! Na mitanõ danõmõ bakha barõ danõ, lõ tumbu danõmõ andrõ dania, na lõ mate ua.

37Ba tanõmõ nitanõ bakha ba danõ andrõ -- he gandru ma zui tanõmõ bõ'õ -- ha hunõ danõmõ andrõ, tenga ma'afefu zinanõ si tumbu andrõ dania.

38Lowalangi samõsa zame'e ba danõmõ andrõ nga'eu si sõkhi wa'atobali sinanõ andrõ molo'õ famaigi-Nia. Ero'ero sambua danõmõ, Ibe'e Lowalangi nga'eu ba danõmõ andrõ.

39Lõ fagõlõ fefu nga'eu zaliw̃aliw̃a si so noso. Fabõ'õ nga'eu niha, fabõ'õ nga'eu gurifõ; fabõ'õ gõi nga'eu wofo, ba fabõ'õ nga'eu gi'a.

40Si manõ gõi ba ngawalõ zi so ba dalu mbanua awõ ba gulidanõ. Dozi oi so wa'amoadu he ba zi so ba mbanua si yaw̃a, ba si manõ gõi ba zi so ba gulidanõ.

41Fabõ'õ wa'asõkhi haga luo moroi ba haga mbaw̃a. Dozi dõfi oi so wa'amoadunia. Oi fabõ'õbõ'õ na'i wa'asõkhi ndrõfi andrõ.

42Si manõ gõi dania niha si mate ni'orifi mangawuli. Boto sobou mboto niko'o andrõ; ba boto ni'orifi mangawuli no boto si lõ obou.

43Me muko'o mboto andrõ, no si lõ sõkhi ba si lõ abõlõ; ba me mu'orifi mangawuli, boto si sõkhi ia ba sabõlõ.

44Me muko'o mboto andrõ, no boto gulidanõ ia; ba na no auri mangawuli dania, no boto nibe'e Geheha Lowalangi mboto andrõ. So mboto soroi gulidanõ ba so mboto soroi Lowalangi.

45No tesura ba Mbuku Ni'amoni'õ, "Niha si fõfõna andrõ, Adamo, no saliw̃aliw̃a si so noso," ba hiza Adamo safuria andrõ no Eheha same'e fa'auri.

46Si fõfõna so ya'ia mboto, tenga noso. Afuriata so noso andrõ.

47Tewõwõi moroi ba danõ Gadamo si fõfõna, ba Adamo si mendrua no moroi ba zorugo.

48Niha gulidanõ andre no hulõ Gadamo si fõfõna, niwõwõi moroi ba danõ, ba niha zorugo, no hulõ si mane Ya'ia si tohare soroi zorugo.

49Si mane ya'ita iada'e hulõ Gadamo niwõwõi moroi ba danõ, ba tobali dania ita si mane Ya'ia soroi zorugo andrõ.

50Ohitõ dõdõgu, ya'ami ira talifusõ, ya'ia da'õ: tebai tobali ono mbanua amatõrõw̃a Lowalangi mboto nifangamõi moroi ba nagole ba do; boto si mate tebai tobali boto si lõ mate.

51Mitõngõni zi tobini andre: lõ fefu ita mate dania, ba hiza fefu ita sa tefabõ'õini.

52Alua da'õ ba zi lõ mudõnadõna, ba zi ha mamõ'i hõrõ, na inõtõ mufoli dorofe safuria. Na terongo li dorofe andrõ, mu'orifi mangawuli niha si no mate faoma boto si lõ mate, ba tefabõ'õini fefu ita.

53Botoda si tola mate andre mu'ali faoma boto si tebai mate, ba boto soroi gulidanõ andre lõ tola lõ mu'ali faoma boto soroi zorugo.

54Na boto andrõ si tola mate no mu'angali'õ faoma boto si tebai mate, ba boto soroi gulidanõ te'angali'õ faoma boto soroi zorugo, ba ginõtõ da'õ awena alua nisura ba Mbuku Ni'amoni'õ, "No mu'alani wa'amate andrõ; ba no musõndra wemõna!"

55"Hezo wemõnamõ, fa'amate? Hezo zõfumõ, fa'amate?"

56Sõfu wa'amate horõ, ba ilau halõw̃õnia horõ andrõ ba goroisa.

57Ba ta'andrõ saohagõlõ khõ Lowalangi; no Ibe'e khõda wemõna ba khõ Yesu Keriso So'aya ya'ita!

58Bõrõ da'õ, ya'ami ira talifusõ ni'omasi'õ, mi'abõlõ'õ ami ba mi'a'aro'õ dõdõmi. Bõi mifamalõ wohalõw̃õ khõ Lowalangi soroi ba dõdõ, bõrõ me aboto ba dõdõmi wa fefu nilaumi khõ Zo'aya, no tenga zayazaya gõlõ.



Download Audio MP3 (1 Korintus 15):
Mobile (Low Quality) - CD (High Quality)

 <<  1 Korintus 15 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran