Alkitab Mobile SABDA
[VER] : [NIAS]     [PL]  [PB] 
 <<  1 Petrus 3 >> 

1Si manõ gõi ami, ya'ami fo'omo ira alawe, si lõ tola lõ mi'o'õ li ndra matua, ena'õ na so ba gotaluara zi lõ mamati ba duria andrõ khõ Lowalangi, tedõnisi ira ba wamati bõrõ mbuabuami. Ba lõ moguna miw̃a'õ hadia ia khõra,

2lanehegõ sa mbuabuami si lõ faruka si lõ sõkhi awõ wa no ohauhau.

3Bõi ha fa'asõkhi soroma ba hõrõ wa'asõkhimi si mane ba wangehao bumi, ba famake gamagama ba ma ba wonukhami.

4Soadunia, ena'õ fa'asõkhimi mo'atumbukha moroi bakha ba dõdõ, fa'asõkhi gamuata ba fa'ahonohono, da'õ wa'asõkhi so'ahonoa sebua bõli ba wamaigi Lowalangi.

5Si mane wolau ndra alawe ni'amoni'õ sanõtõna khõ Lowalangi ba gõtõ fõna, lahaogõ la'a'azõkhi ira faoma folo'õ li ndra matuara.

6Si manõ gõi Zara, i'o'õ li Gaberahamo, fatuha ia khõnia. Ono Zara ami iada'e, na milau ngawalõ zi sõkhi ba na lõ ata'u ami hadia ia.

7Ba ya'ami fo'omo ira matua, ya sifahõna fa'omasi ami ba khõ wo'omomi ira alawe, si fao fa'aboto ba dõdõ wa no sambõ fa'abõlõ ira. Mifosumange ira, me fao ira awõmi ba wanema buala fa'auri sindruhu si otarai Lowalangi. Mifalua da'e, ena'õ lõ sanahaini fangandrõmi.

8Amarahutania ya'ia da'e: ena'õ fefu ami ha sara dõdõmi. Ena'õ faoma mi'omasi'õ nawõmi si mane si fatalifusõ. Ya sahakhõ tõdõ ami ba si lõ fayaw̃a.

9Bõi misulõni zi lõ sõkhi awõnia si lõ sõkhi, ba falelesa awõnia falelesa; si sõkhinia, misulõni faoma fangandrõ howuhowu moroi khõ Lowalangi.

10Ba Mbuku Ni'amoni'õ no tesura, imane, "Niha somasi auri, ba somasi mangila baw̃a si sõkhi, si lõ tola lõ itaha lelania ba zi lõ sõkhi, ba bewenia fabõi ilau waya.

11I'arõu'õ ia ba zi lõ sõkhi ba ilau zi sõkhi, ya sindruhundruhu iforege wangalui fa'atulõ.

12Bõrõ me lõ aetu Ihõrõhõrõgõ So'aya niha solo'õ somasi Ia, ba Ifondrondrongo wangandrõra, ba Ilaw̃a So'aya zamazõkhi si lõ sõkhi."

13Haniha zomasi molau si lõ sõkhi khõmi, na no somasi molau si sõkhi ami?

14Ba hew̃a'ae mitaõgõ wamakao na bõrõ wolau si sõkhi, ba so luomi! Bõi ata'u ami gofu ha'õkhõ, ba bõi mangiwa dõdõmi.

15Bakha ba dõdõmi, mibe'e zumange nifõfõgõ khõ Keriso, si faudu ba wetaro-Nia, tobali So'aya. Mifa'anõ ami ba wame'e fanema li ba zi dozi niha sanofu khõmi ba wanõtõna andrõ si so khõmi.

16Ba mifalua da'õ faoma fa'ohahau ba famosumange. Ba ya satulõ tõdõ ami, ena'õ na labõbõgõ khõmi zi lõ sõkhi bõrõ me milau zi sõkhi ba wolo'õ khõ Keriso, ba aila zamõbõgõ si lõ sõkhi andrõ.

17Abõlõ sõkhi na mitaõgõ wamakao ba wolau si sõkhi -- na nilau dõdõ Lowalangi -- moroi na mitaõgõ wamakao ba wolau si lõ sõkhi.

18Bõrõ me no mate Keriso samuza, soguna ba zi sagõtõ fa'ara bõrõ horõ niha -- samõsa lõ si lõ horõ, mate salahi zi so horõ. Ifalua da'õ Keriso, ena'õ I'ohe ami khõ Lowalangi. Mibunu Ia dali mboto, ba ni'orifi dali geheha.

19Ba geheha, mõi Ia mangombakha turia Lowalangi ba zi so ba gurunga:

20ya'ia geheha niha si lõ molo'õ khõ Lowalangi ba gõtõ Noakhi. Ba ginõtõ da'õ no Ibase'õ Lowalangi si fao fa'ebolo dõdõ sagõtõ famazõkhi Noakhi owonia. Ha niha si so ba nowo -- daw̃alu niha fefu -- ni'orifi ba molõ sebua andrõ.

21Salua andrõ ba no famaedo ba wamayagõ idanõ iada'e sangorifi ya'ami. Famayagõ idanõ andre ba tenga halõw̃õ ba wangeheta da'i nõsi, no amabu'ula limi khõ Lowalangi, moroi ba dõdõ si lõ sinegu. I'orifi ami famayagõ idanõ andrõ, bõrõ wemaoso Yesu Keriso moroi ba ngai zi mate,

22ba si no manahae ba zorugo. Khõ-Nia so wa'abõlõ iada'e, dumadao ba gambõlõ Lowalangi ba wamatõrõ mala'ika fefu, sokhõ fa'abõlõ fefu awõ ngawalõ wa'abõlõ andrõ fefu.



Download Audio MP3 (1 Petrus 3):
Mobile (Low Quality) - CD (High Quality)

 <<  1 Petrus 3 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran